កសិករអាមេរិចភាគច្រើនបានរងការប៉ះពាល់ដោយសារសង្គ្រាមពាណិជ្ជកម្មរវាងអាមេរិច និងចិន ប៉ុន្តែសម្រាប់កសិករផលិតខ្ទឹមស និងទឹកឃ្មុំ មានការសប្បាយចិត្ត និងអបអរចំពោះវិធាការរបស់លោក ដូណាល់ ត្រាំ ដែលបានដំឡើងពន្ធលើទំនិញរបស់ចិន។
“វាគឺជាពេលដ៏សប្បាយរីករាយមួយសម្រាប់ពួកយើងនៅទីក្រុង Gilroy រដ្ឋ Califonia”។ នេះបើតាមការបញ្ជាក់របស់លោក Ken Christopher ដែលជាម្ចាស់កសិដ្ឋាន Christopher Ranch ដែលជាកន្លែងដាំខ្ទឹមសដ៏ធំបំផុតនៅអាមេរិច។
លោកថ្លែងប្រាប់ AFP ដូច្នេះថា ខ្ទឹមសស្ទើរតែទាំងអស់ដែលត្រូវបានគេប្រើប្រាស់ត្រូវបានដាំដុះនៅអាមេរិចមុនឆ្នាំ ១៩៩៣ ប៉ុន្តែវាបានផ្លាស់ប្តូរក្នុងពេលមួយយប់ប៉ុណ្ណោះ នៅពេលអ្នកជំនួញចិនចាប់ផ្តើមនាំចូលផលិតផលរបស់ពួកគេដ៏ច្រើនមកកាន់ទីផ្សារអាមេរិច ដែលធ្វើឲ្យអ្នកដាំខ្ទឹមសទូទាំងប្រទេសបាត់ខ្លួន។
លោកនិយាយថា “បើត្រឡប់ទៅកាន់ទសវត្សន៍ឆ្នាំ ១៩៩០វិញ នៅអាមេរិចធ្លាប់មានកសិដ្ឋានដាំខ្ទឹមសធំៗ ចំនួន ១២ ប៉ុន្តែបច្ចុប្បន្ន កសិដ្ឋាននៅសល់ត្រឹមតែ ៣ប៉ុណ្ណោះ ហើយនោះដោយសារតែការនាំចូលខុសច្បាប់នូវខ្ទឹមសរបស់ចិនយ៉ាងច្រើន”។
“ចាប់តាំងពីឆ្នាំ ១៩៩៣មក ពួកគេបាននាំចូលផលិតផលខ្លួនមកកាន់ទីផ្សារអាមេរិចដែលតម្លៃខ្ទឹមស គឺថោកជាងតម្លៃផលិតកម្មរបស់ពួកគេ”។
សូមបញ្ជាក់ថា កសិដ្ឋានរបស់លោក Ken Christopher ផលិតបានខ្ទឹមសចំនួន ៤៥លានគីឡូក្រាមជារៀងរាល់ឆ្នាំ ដែលចំនួននេះស្មើនឹងចំនួន ៣០ភាគរយនៃខ្ទឹមសប្រើប្រាស់ក្នុងអាមេរិច។
ខ្ទឹមសចិនមួយប្រអប់មានតម្លៃ ២៥ដុល្លាប៉ុណ្ណោះ មុនពេលលោកដូណាល់ ត្រាំ ដំឡើងពន្ធ ហើយបច្ចុប្បន្នខ្ទឹមសចិនមួយប្រអប់ទម្ងន់ ១៣គីឡូក្រាមមានតម្លៃ ៤៥ដុល្លា។ តម្លៃនេះប្រហាក់ប្រហែលទៅនឹងខ្ទឹមសដែលដាំនៅអាមេរិចដែលមានតម្លៃ ៥០ ទៅ ៦០ដុល្លាក្នុងមួយប្រអប់ដូចគ្នា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
