ភ្នំពេញ ៖ គណៈប្រតិភូមួយក្រុមនៃតំណាងពាណិជ្ជកម្មសហរដ្ឋអាមេរិក (USTR) និងក្រសួងការបរទេសសហរដ្ឋអាមេរិក កំពុងធ្វើទស្សនកិច្ចនៅប្រទេសកម្ពុជា ពីថ្ងៃទី ៣ ដល់ថ្ងៃទី ៧ ខែមិថុនានេះ ដើម្បីពិភាក្សាពីបញ្ហាពាណិជ្ជកម្មទ្វេភាគី ដោយរាប់ទាំងបទដ្ឋានបច្ចេកទេសយានយន្ត ក៏ដូចជាស្ថានភាពវិស័យការងារនៅប្រទេសកម្ពុជាផងដែរ។ គណៈប្រតិភូ ដឹកនាំដោយ Karl Ehlers ឧបការី តំណាង ពាណិជ្ជកម្មសហរដ្ឋអាមេរិក ទទួលបន្ទុកការិយាល័យប្រចាំតំបន់អាស៊ីអគ្នេយ៍ និងប៉ាស៊ីហ្វិក និងលោក Lewis Karesh ឧបការីតំណាងពាណិជ្ជកម្មសហរដ្ឋអាមេរិកទទួលបន្ទុកកិច្ចការការងារ។
ទស្សនកិច្ចគណៈប្រតិភូក្រសួងការបរទេសសហរដ្ឋអាមេរិក បានកើតឡើងដំណាលគ្នានៃបេសកកម្មរបស់សហភាពអឺរ៉ុប ពីថ្ងៃទី០៣-៧ ខែមិថុនា ដូចគ្នា។ នេះមិនមែនជាការគាប់ជួនទេ តែអាចជាការគ្រោងទុកជាមុន ៕ ដោយ៖កូឡាប
