ភ្នំពេញ ៖ សម្ដេចពិជ័យសេនា បានថ្លែងថា “នំបញ្ចុក” គឺជាអាហារដ៏ពេញនិយមមួយ របស់បងប្អូនប្រជាពលរដ្ឋខ្មែរ តាំងពីយូរលង់ណាស់មកហើយ។ វាគឺជាអាហារតំណាងអត្តសញ្ញាណជាតិខ្មែរ សាមគ្គីភាព និងឯកភាពជាតិតែមួយ។ បើយោងទៅតាមដំណាលតៗគ្នាមក “នំបញ្ចុក” មានប្រភពកើតចេញពីគ្រួសារអ្នកស្រែពីរនាក់ប្តីប្រពន្ធ ដែលធ្វើស្រែស្រូវវារ។
នៅមុនមួយថ្ងៃនៃពិធីពិសានំបញ្ចុកសាមគ្គី សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនៅថ្ងៃទី ៨ មិថុនា បានសរសេរលើហ្វេសប៊ុកផ្លូវការថា ៖ តាមរយៈរឿង “ធនញ្ជ័យ” យើងអាចសន្និដ្ឋានបានថា “នំបញ្ចុក” មានវត្តមានជាយូរយារណាស់មកហើយ នៅលើទឹកដីនៃព្រះរាជាណាចក្រកម្ពុជា ហើយក៏ប្រហែលជាមានវត្តមានតែនៅក្នុងប្រទេសកម្ពុជាតែមួយប៉ុណ្ណោះ។ បើយោងទៅតាមដំណាលតៗគ្នាមក “នំបញ្ចុក” មានប្រភពកើតចេញពីគ្រួសារអ្នកស្រែពីរនាក់ប្តីប្រពន្ធដែលធ្វើស្រែស្រូវវារ ព្រោះថា ពួកគាត់រស់នៅតំបន់ទឹកលិច មិនអាចដាំស្រូវល្អបាន ហើយស្រូវវារជាប្រភេទស្រូវដែលដាំបាយឆីមិនឆ្ងាញ់។ ពួកគាត់ក៏បែកគំនិតយកស្រូវវារទៅធ្វើជានំសរសៃ ដើម្បីទទួលទានជាមួយសម្លនិងល្បោយបន្លែផ្សេងៗជំនួសវិញ ហើយក៏ដាក់ឈ្មោះថា “នំសរសៃស្រូវវារ”។ រាល់ពេលពួកគាត់ធ្វើ “នំសរសៃស្រូវវារ” ម្តងៗ ពួកគាត់តែងតែចែកញាតិសន្តានក្នុងភូមិពិសារ។ ព្រោះតែរសជាតិដ៏ឆ្ងាញ់របស់ “នំសរសៃស្រូវវារ” អ្នកស្រុកបាននាំគ្នាមកសុំក្បួនធ្វើពីពួកគាត់ទាំងពីរ ហើយក៏នាំគ្នាធ្វើឆីនៅតាមផ្ទះរៀងៗខ្លួនតរៀងមក។ លុះជរាបន្តិច ពួកគាត់ពីរនាក់ប្តីប្រពន្ធក៏ដូរមុខរបរមករែក “នំសរសៃស្រូវវារ” លក់វិញ។ គាប់ជួនថ្ងៃមួយ មានរាជកុមារ នាំពលសេនាចុះមើលតាមស្រុកភូមិ ក៏ឃើញអ្នកស្រុកចោមរោមឆី “នំសរសៃស្រូវវារ” ហើយក៏ចង់សាកមើលនឹងគេដែរ។ តែដោយជំនាន់នោះមិនទាន់មានការអភិវឌ្ឍនៅឡើយ ការទទួលទាន “នំសរសៃស្រូវវារ” គឺត្រូវប្រើម្រាមដៃ ដែលធ្វើឱ្យរាជកុមារមិនហ៊ានសាកល្បង ព្រោះខ្លាចប្រឡាក់ដៃ។ ពួកគាត់ទាំងពីរនាក់ប្តីប្រពន្ធក៏ទូលសុំឱ្យស្នំ ដែលជាមេដោះរបស់រាជកុមារ យកដៃចាប់ “នំសរសៃស្រូវវារ” បញ្ចុករាជកុមារ។ ព្រោះតែជាប់ចិត្តនឹង “នំសរសៃស្រូវវារ” ដ៏ឆ្ងាញ់មួយចាននោះ រាជកុមារតែងតែទទូចឱ្យព្រះរាជមាតា តាមរកទិញនំដែលស្នំបញ្ចុកនោះ យកមកសោយក្នុងរាជវាំង។ ដោយសារខ្ជិលប្រើស្នំឱ្យទៅទិញនំពីអ្នកស្រែជារៀងរាល់ព្រឹក ព្រះរាជមាតាក៏បញ្ជាឱ្យសេនា ទៅអញ្ជើញអ្នកស្រែពីរនាក់ប្តីប្រពន្ធ មកធ្វើនំសម្រាប់រាជកុមារ សោយប្រចាំរាជវាំងរៀងរហូតមក។ គេក៏នាំគ្នាហៅថា “នំដែលស្នំបញ្ចុក” រហូតក្រោយៗមក ក៏ត្រូវហៅកាត់ខ្លីថា “នំបញ្ចុក” ដល់សព្វថ្ងៃនេះ។
សម្ដេចពិជ័យសេនាបានថ្លែងបន្តថា តាមរយៈដំណាលនេះ “នំបញ្ចុក” គឺជាអាហារដ៏ពេញនិយមមួយ របស់បងប្អូនប្រជាពលរដ្ឋខ្មែរ តាំងពីយូរលង់ណាស់មកហើយ។ វាគឺជាអាហារតំណាងអត្តសញ្ញាណជាតិខ្មែរ សាមគ្គីភាព និងឯកភាពជាតិតែមួយ។ សូមបងប្អូនកងទ័ពទាំងអស់ ក៏ដូចជាបងប្អូនប្រជាពលរដ្ឋគ្រប់រូប ចូលរួមទទួលទាន “នំបញ្ចុកសាមគ្គីភាព និងឯកភាពជាតិខ្មែរ” នៅថ្ងៃស្អែក ទី០៩ ខែមិថុនា ឆ្នាំ២០១៩ ឱ្យបានគ្រប់ៗគ្នា ដើម្បីបង្ហាញពីសាមគ្គីភាព និងឯកភាពជាតិខ្មែរតែមួយរបស់យើង៕ ដោយ៖កូឡាប
