ត្បូងឃ្មុំ៖ សម្តេចក្រឡាហោម ស ខេង បានណែនាំដល់អាជ្ញាធរមូលដ្ឋាន ជាពិសេសកងកម្លាំងនគរបាល តាមបណ្តាភូមិនានា ត្រូវ បង្ក្រាបបទល្មើស ដែលបញ្ហាចម្បងជាងគេគឺ បញ្ហាគ្រឿងញៀន នៅនឹងមូលដ្ឋានភូមិឃុំ ។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ដែលជាអធិបតី ក្នុងទិវាសប្តាហ៍ជាតិសុវត្ថិភាពចរាចរណ៍ លើកទី១២ នាព្រឹកថ្ងៃទី១១ ខែមិថុនា ឆ្នាំ២០១៩ នៅស្រុកពញាក្រែក ខេត្តត្បូងឃ្មុំ បញ្ជាក់ថា ការបង្ក្រាបបទល្មើស នៅនឹងមូលដ្ឋានភូមិឃុំ ជាចំណុចសំខាន់ណាស់។ យើងមានសុខសន្តិភាព មានស្ថិរភាព ប៉ុន្តែបើសុខសុវត្ថិភាពរបស់ប្រជាពលរដ្ឋ ប្រចាំថ្ងៃ មិនមានទេនោះ វាក៏ប៉ះពាល់ដល់ដំណើរការកសាងជីវភាពរស់នៅរបស់ពួកគាត់ដែរ។ អីចឹងហើយ សូមឲ្យអាជ្ញាធរសមត្ថកិច្ចពាក់ព័ន្ធ បងប្អូនប្រជាពលរដ្ឋទាំងអស់ សូមមេត្តាចូលរួម ដើម្បីវែកមុខ ហើយលុបបំបាត់នូវចោរលួចចោរប្លន់នៅក្នុងមូលដ្ឋានរបស់ខ្លួនឲ្យបាន។ នេះជាសំណូមពរដ៏សំខាន់ណាស់ ដើម្បីភាពសុខដុមរមនា សប្បាយរីករាយរបស់ប្រជាពលរដ្ឋ និងការអភិវឌ្ឍន៍ជីវភាព។
សម្តេចក្រឡាហោម ស ខេង បន្ថែមថា បញ្ហាគ្រឿងញៀន គឺជាបញ្ហាមួយដ៏គ្រោះថ្នាក់ សម្រាប់សង្គមណាស់។ នេះគឺទាក់ទងដល់សន្តិសុខជាតិ។ ដែលហៅថាសន្តិសុខជាតិ មិនចាំបាច់ថា មានសង្គ្រាម ទើបអសន្តិសុខនោះទេ ឬក៏ចាំបាច់ថា មានអំពើភេរវកម្ម ថាអសន្តិសុខនោះទេ ក៏ប៉ុន្តែសុខសុវត្ថិភាពប្រជាពលរដ្ឋនេះ ដែលវាទន់ខ្សោយ ដោយសារគ្រឿងញៀនវាវ៉ៃលុកចូល បំផ្លាញប្រព័ន្ធសរសៃប្រសាទរបស់យើង នោះក៏ទាក់ទង ឬក៏ហៅថា បញ្ហាសន្តិសុខជាតិដែរពីព្រោះអី? ពីព្រោះថា គ្រឿងញៀនវាវ៉ៃលុកចូលស្រទាប់យុវវ័យ ហើយក៏ដូចជា ចរាចរណ៍ ក៏វាទាក់ទង។ អីចឹងទេ សូមកសាងភូមិរបស់យើង ឃុំរបស់យើង ជាឃុំស។ បើមានអ្នកមកពីក្រៅមក គេយកគ្រឿងញៀន មកចែកចាយ ត្រូវតែរួសរាន់ ដើម្បីរាយការណ៍ឲ្យទៅសមត្ថកិច្ចហើយបើសមត្ថកិច្ច នៅនឹងកន្លែងមិនយកចិត្តទុកដាក់ ឥឡូវស្រួលណាស់ ប្រព័ន្ធផ្សព្វផ្សាយយើង ដាក់តាមហ្វេសប៊ុក ឬមួយតាមតេឡេក្រាម ឬមួយក៏ទូរស័ព្ទធម្មតា ទៅនរណា ដែលយើងអាចទាក់ទងបាន សូមឲ្យជួយ ហើយយើងខ្ញុំ ស្វាគមន៍។ អគ្គនគរបាល ក៏មានលេខ ដើម្បីទាក់ទង។ ប៉ុន្តែបើមានករណីអ្នកនៅនឹងកន្លែងហ្នឹង ជាមេចែកចាយគ្រឿងញៀន។ នោះគឺយើងរឹតតែត្រូវយកចិត្តទុកដាក់ ដើម្បីនឹងដោះស្រាយ កុំឲ្យមានករណីនេះ។ ករណីគ្រឿងញៀននេះ ធំណាស់! ដែលនៅលើសកលលោកទាំងមូល គេប្រឆាំង។ អង្គការសហប្រជាជាតិ មានច្បាប់ ដើម្បីប្រឆាំងគ្រឿងញៀន ដែលគេហៅថា គ្រឿងញៀនខុសច្បាប់។ អីចឹង ត្រូវកសាងភូមិឃុំយើង ឲ្យទៅជាភូមិឃុំស កុំឲ្យមានគ្រឿងញៀន៕ ដោយ៖កូឡាប
