ភ្នំពេញ ៖ អធិការដ្ឋាននគរបាលស្រុកមេមត់ កាលពីថ្ងៃទី១២មិថុនា បានឲ្យដឹងថា មានប្រជាពលរដ្ឋមិនតិចឡើយតែងជួបប្រទះបញ្ហាចំពោះឯកសារសំខាន់ៗក្នុងជីវិត ដូចជាអ្នកខ្លះខុសឈ្មោះក្នុងសំបុត្រកំណើត ហើយចង់ដឹងថា ប្រសិនបើចង់កែតម្រូវត្រូវធ្វើយ៉ាងណាខ្លះ? តទៅនេះជាការចែករំលែកបទពិសោធន៍ពីពលរដ្ឋម្នាក់ទើបតែទៅកែតម្រូវឈ្មោះក្នុងសំបុត្រកំណើតកាលពីថ្ងៃទី ១១ ខែមិថុនា ឆ្នាំ ២០១៩ នៅឯតុលាការខេត្តត្បូងឃ្មុំ។
លោកឱ្យដឹងថា ករណីខុសឈ្មោះក្នុងសំបុត្រកំណើត បុគ្គលដែលជាអ្នកចង់កែតម្រូវ ត្រូវទៅកាន់តុលាការខេត្តរបស់ខ្លួនដែលភ្ជាប់ទៅជាមួយសំបុត្របញ្ជាក់កំណើតដែលខុសឈ្មោះនោះ ព្រមទាំងឯកសារយោងមួយចំនួនដែលមានឈ្មោះត្រឹមត្រូវ ដូចជា ៖
១. អត្តសញ្ញាប័ណ្ណសញ្ជាតិខ្មែរ
២. វិញ្ញាបនបត្របណ្ដោះអាសន្នបឋមភូមិ
៣. វិញ្ញាបនបត្របណ្ដោះអាសន្នទុតិយភូមិ
៤. សញ្ញាបត្របរិញ្ញាបត្រ
៥. វិញ្ញាបនបត្រ ឬ ប័ណ្ណសរសើរផ្សេងៗដែលទទួលបានកន្លងមក ។
សូមបញ្ជាក់ថា ឯកសារយោងនេះ គឺមិនដូចគ្នាឡើយ អ្នកខ្លះមានត្រឹមបាក់ឌុប ឬ ឌីប្លូម ឬ អ្នកខ្លះទៀត មានតែលិខិតបញ្ជាក់ផ្សេងៗ តែហោចណាស់ត្រូវភ្ជាប់ទៅជាមួយយ៉ាងហោចណាស់ ឱ្យបានពីរទៅបីសន្លឹកក្រៅពីអត្តសញ្ញាណប័ណ្ណ ទើបមន្ត្រីព្រមជឿជាក់ និងធ្វើការកែតម្រូវជូន ។ ក្រោយភ្ជាប់ឯកសារយោងគ្រប់គ្រាន់ដែលបញ្ជាក់ថា យើងពិតជាឈ្មោះបែបនេះមែន នោះមន្ត្រី ឬ បុគ្គលិកបណ្ដែតក្នុងតុលាការខេត្ត ឬ ក្រុង នឹងឱ្យពាក្យបំពេញសុំកែតម្រូវ បន្ទាប់ពីបំពេញ និង ផ្ដិតមេដៃហើយ បងប្អូនត្រូវបង់ថ្លៃពន្ធត្រឹមតែ ៥ ០០០ រៀលប៉ុណ្ណោះជាការស្រេច ។ ក្រោយបំពេញពាក្យស្នើសុំកែតម្រូវបាន ១ ទៅ ២ សប្ដាហ៍ ទើបក្រុមការងារទាក់ទងដើម្បីទៅទទួលតាមរយៈលេខ ទូរស័ព្ទដែលដាក់ក្នុងពាក្យស្នើសុំនោះ ។
នគរបាលស្រុកមេមត់ បានបញ្ជាក់ថា កន្លងមកអគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃក៏បានឱ្យដឹងដែរថា ប្រសិនបើបងប្អូនចង់កែតម្រូវទិន្នន័យអត្តសញ្ញាណ អាចអញ្ជើញទៅកាន់ទីតាំងមួយចំនួនដូចជា ៖
១.នាយកដ្ឋានអត្រានុកូលដ្ឋាន នៃអគ្គនាយកដ្ឋាន អត្តសញ្ញាណកម្ម នៃក្រសួងមហាផ្ទៃ ដែលមានអាស័យដ្ឋាននៅផ្លូវជាតិលេខ១ សង្កាត់ និរោធ ខណ្ឌច្បារអំពៅ រាជធានីភ្នំពេញ (ទល់មុខបុរី ប៉េងហួត បឹងស្នោ) ។
២.សាលាក្រុង ស្រុក ខណ្ឌ នៃទីតាំងដែលបញ្ជី អត្រានុកូលដ្ឋានរបស់សាមីខ្លួនបាននឹងកំពុងរក្សាទុក ៕ ដោយ៖កូឡាប
