ភ្នំពេញ៖ សម័យប្រជុំលើកទី២ នីតិកាលទី៦ នៃរដ្ឋសភា បានបិទបញ្ចប់ ត្រឹមព្រឹកថ្ងៃទី៤ ខែកក្កដា ឆ្នាំ២០១៩នេះ បន្ទាប់ពីបានបំពេញការងារ រយៈពេល៣ខែ ក្នុងនោះ មានការអនុម័តសេចក្តីព្រាងច្បាប់ចំនួន១០។
រដ្ឋសភាបន្តសម័យប្រជុំ លើកទី២ នីតិកាលទី៦ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា នាព្រឹកថ្ងៃព្រហស្បតិ៍ ៣កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវថ្ងៃទី៤ ខែកក្កដា ឆ្នាំ២០១៩ ដើម្បីស្តាប់ចម្លើយបំភ្លឺរបស់ លោក អង្គវង្ស វឌ្ឍានា រដ្ឋមន្រ្តីក្រសួងយុត្តិធម៌ តបតាមសំណើរបស់ លោកកិត្តិនីតិកោសលបណ្ឌិត ប៉ែន បញ្ញា ប្រធានក្រុមតំណាងរាស្រ្ត ទី៦ និងជាប្រធានគណៈកម្មការនីតិកម្ម និងយុត្តិធម៌ នៃរដ្ឋសភា។ ការតាំងសំណួររបស់បណ្ឌិតប៉ែន បញ្ញា បានផ្តោតលើការអនុវត្ត យុទ្ធសាស្រ្តចតុកោណដំណាក់កាលទី៤ និងកម្មវិធីនយោបាយ របស់រាជរដ្ឋាភិបាលអាណត្តិទី៦ របស់ក្រសួងយុត្តិធម៌។ លោកអង្គវង្ស វឌ្ឍនា រដ្ឋមន្រ្តីក្រសួងយុត្តិធម៌ និងសហការី ជាតំណាងរាជរដ្ឋាភិបាល បានអញ្ជើញមកឆ្លើយ សំណួរជូនអង្គសភា។ បន្ទាប់ពីការតាំង និងការឆ្លើយសំណួរ របស់លោករដ្ឋមន្រ្តីក្រសួងយុត្តិធម៌ រួចមក សម្តេចពញាចក្រីហេង សំរិន ប្រធានរដ្ឋសភា បានប្រកាសបិទសម័យប្រជុំរដ្ឋសភា លើកទី២ នីតិកាលទី៦ ចាប់ពីពេលនេះ។ អាស្រ័យដោយសម័យប្រជុំរដ្ឋសភា លើកទី២ នីតិកាលទី៦ បានចាប់ផ្តើមពីថ្ងៃទី១ ខែមេសា ឆ្នាំ២០១៩ រហូតដល់ថ្ងៃទី៤ ខែកក្កដា ឆ្នាំ២០១៩ មានរយៈពេលជាង៣ខែ ស្របតាមបទប្បញ្ញត្តិនៃរដ្ឋធម្មនុញ្ញ និងបទបញ្ជាផ្ទៃក្នុង នៃរដ្ឋសភា ។
តាមសេចក្តីប្រកាសរបស់រដ្ឋសភា បានឱ្យដឹងថា រយៈពេល៣ខែមកនេះ ក្នុងសម័យប្រជុំលើកទី២ នីតិកាលទី៦ ដែលបានចាប់ផ្តើមពីថ្ងៃទី១ ខែមេសា ឆ្នាំ២០១៩ រហូតដល់ថ្ងៃទី៤ ខែកក្កដា ឆ្នាំ២០១៩ រដ្ឋសភាសម្រេចបាននូវលទ្ធផលដូចតទៅ៖
១៖ សម្រេចអំពីសុពលភាព នៃអាណត្តិ លោកស្រី គឹម សុវណ្ណា តំណាងរាស្រ្តមណ្ឌលរាជធានីភ្នំពេញ និង លោក សុខ ផេង តំណាងរាស្រ្តមណ្ឌលខេត្តព្រៃវែង នីតិកាលទី៦ នៃរដ្ឋសភា។
២៖ បោះឆ្នោតជ្រើសតាំងបំពេញបន្ថែម លោក ប្រាជ្ញ ចន្ទ ជាសមាជិកគណៈកម្មការទី១ និង លោក ច័ន្ទ សុផល ជាសមាជិកគណៈកម្មការទី៤ នៃរដ្ឋសភា។
៣៖ បោះឆ្នោតជ្រើសតាំង លោកស្រី លី វួចឡេង សមាជិកក្រុមប្រឹក្សាធម្មនុញ្ញ សម្រាប់អាណត្តិ ឆ្នាំ(២០១៩-២០២៨)។
៤៖ អនុម័តសេចក្តីព្រាងច្បាប់បានចំនួន១០ ដែលស្នើឡើងដោយរាជរដ្ឋាភិបាលកម្ពុជា។
៥៖ ការតាំង និងការឆ្លើយសំណួររបស់ លោក អង្គវង្ស វឌ្ឍានា រដ្ឋមន្រ្តីក្រសួងយុត្តិធម៌៕ ដោយ: កូឡាប
សេចក្តីប្រកាសព័ត៌មាន ស្តីពី លទ្ធផលសម័យប្រជុំរដ្ឋសភា លើកទី២ នីតិកាលទី៦ ថ្ងៃព្រហស្បតិ៍ ទី៤ ខែកក្កដា ឆ្នាំ២០១៩៖
