នៅវេលាដើមឆ្នាំថ្មី ប្រធានាធិបតីអាមេរិក Donald Trump បានសរសេរគំរាមលើ Twitter ថា “អាមេរិកពិតជាល្ងង់ខ្លៅ គ្រាផ្តល់ជំនួយ ៣៣ពាន់លានដុល្លារ ឲ្យប៉ាគីស្ថានក្នុងអំឡុងពេល ១៥ឆ្នាំកន្លងមក។ ហើយពួកគេពុំបាននាំឲ្យយើងនូវអ្វីក្រៅពីពាក្យភូតកុហក និងការបោកប្រាស់។ ពួកគេកិតថា មេដឹកនាំទាំងឡាយរបស់យើងជាមនុស្សល្ងង់ (ប៉ាគីស្ថាន) បានផ្តល់កន្លែងលាក់ខ្លួនឲ្យពួកភេរវករ ដែលអាមេរិកកំពុងរុករកនៅអាហ្គានីស្ថាន។ វានឹងពុំមានរឿងបែបនេះទៀតទេ”។
ប្រមុខការទូតប៉ាគីស្ថាន Pakistan Khawaja Asif
តបសងចំពោះការចោទប្រកាន់នេះ ប្រមុខការទូតប៉ាគីស្ថាន Khawaja Asif ឲ្យដឹងថា រដ្ឋអំណាចប៉ាគីស្ថាន កំពុងត្រៀមនូវចម្លើយ “នឹងបណ្តាលឲ្យពិភពលោកដឹងអំពីការពិត”។
កាសែត Dawn របស់ប៉ាគីស្ថាន បានចុះផ្សាយឲ្យដឹងថា ប្រមុខការទូតប្រទេសនេះ ក៏បានកោះហៅឯកអគ្គរដ្ឋទូតអាមេរិក ប៉ុន្តែគេពុំទាន់ឃើញមានការប្រកាសណាមួយទាក់ទិនដល់ខ្លឹមសារនៃការកោះហៅភ្លាមៗនោះទេ។
ស្របពេលជាមួយគ្នានោះឆ្លើយតបនឹងការស្តីបន្ទោស “មានទៅតែគ្មានមក” របស់ប្រធានាធិបតីអាមេរិក រដ្ឋមន្ត្រីការពារជាតិប៉ាគីស្ថាន Khawaja Asif និយាយថា អាមេរិកបានប្រើប្រាស់បណ្តាមូលដ្ឋានយោធា ហេដ្ឋារចនាសម្ព័ន្ធ ទាក់ទងលើអាកាស ផ្លូវគោក និងកិច្ចសហប្រតិបត្តិការ ចារកម្ម “គ្មានកម្រៃ” នៅប៉ាគីស្ថាន ក្នុងអំឡុងពេល ១៦ឆ្នាំមកហើយ ផ្ទុយមកវិញអាមេរិក បានត្រឹមបន្សល់ទុកឲ្យប៉ាគីស្ថាន នូវការ “ស្តីបន្ទោស និងមន្ទិលសង្ស័យប៉ុណ្ណោះ”។
ចំណងទាក់រទងរវាងប៉ាគីស្ថាន និងអាមេរិកចាប់តាំងពីលោកត្រាំ ឡើងកាន់តំណែងជាប្រធានាធិបតី កាលពីដើមឆ្នាំ ២០១៧មក កាន់តែអាក្រក់ឡើងៗ។ មុននោះប៉ាគីស្ថាន គឺជាប្រទេសមួយ ក្នុងចំណោមប្រទេសចំនួន ១៦ ត្រូវបានអាមេរិកចាត់ទុកថា “បណ្តាសម្ព័ន្ធមិត្តធំៗ ក្រៅណាតូ” ហើយតែងទទួលបាននូវការជួយឧបត្ថម្ភពីវ៉ាស៊ីនតោន។ តាមប្រព័ន្ធផ្សព្វផ្សាយអាមេរិកប៉ាគីស្ថាន បានទទួលជំនួយ ៣៣ពាន់លានដុល្លារ ពីអាមេរិក គិតចាប់តាំងពីឆ្នាំ ២០០២មក៕ សូយន