ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀង នៅព្រឹកថ្ងៃទី២៤ ខែកក្កដា ឆ្នាំ២០១៩នេះ បានអនុញ្ញាតឲ្យ លោក ជៀវ ស៊ន់ហ្វា ទីប្រឹក្សាក្រុមហ៊ុន TTC Group លោក ឡឹម នាយករង ក្រុមហ៊ុន TTC Energy លោកថាញ់ ប្រធានទំនាក់ទំនងការបរទេស TTC Group និងប្រតិភូរួមដំណើរបានចូលជួបសម្តែងការគួសម និងពិភាក្សាការងារវិនិយោគដំណាំអំពៅនៅស្រុកចំនួន៣ នៃខេត្តស្វាយរៀង។
លោកអភិបាលខេត្ត បានសម្ដែងនូវការស្វាគមន៍ និងគាំទ្រយ៉ាងពេញទំហឹងចំពោះតំណាងក្រុមហ៊ុនដែលគ្រោងវិយោគ ដាំអំពៅនៅលើទឹកដីនៃស្រុករមាសហែក ស្រុករំដួល និងស្រុកស្វាយទាប ខេត្តស្វាយរៀង នាពេលខាងមុខ។ ក្នុងនាមអភិបាលខេត្តក៏បានថ្លែងនូវការអរគុណចំពោះក្រុមហ៊ុននានា ដែលបានមកបណ្ដាក់ទុនវិនិយោគ នៅលើទឹកដីនៃខេត្តស្វាយរៀង នារយៈពេលកន្លងមកនេះ។
ក្នុងនាមអភិបាលខេត្ត លោកតែងតែបានកៀងគរក្រុមហ៊ុននានា ជាច្រើនរួចមកហើយមកបណ្ដាក់ទុនវិយោគ ដើម្បីបង្កើតការងារធ្វើជូនប្រជាពលរដ្ឋក្នុងខេត្តស្វាយរៀង ហើយក៏ជាកិច្ចការសំខាន់ដែលលោក អភិបាលខេត្តតែងតែយកចិត្តទុកដាក់ទាំងការរក្សាសន្តិសុខ សុវត្ថិភាពជូនដល់ក្រុមហ៊ុនផងដែរ៕ ដោយ៖ វ៉ៃកូ
