គេហទំព័រ Livemint របស់ឥណ្ឌា នៅថ្ងៃទី២/១ បានដកស្រង់សេចក្តីថ្លែងការណ៍របស់ក្រសួងការពារជាតិប្រទេសនេះឲ្យដឹងថា ឥណ្ឌានឹង
ទិញកាំជ្រួច Barak (ដីទល់មេឃ) ចំនួន ១៣១គ្រាប់ របស់អ៊ីស្រាអែល ទុកបំពាក់ឲ្យនាវាផ្ទុកយន្តហោះដែលខ្លួន កំពុងតម្លើង។
កិច្ចសន្យាតម្លៃ ៧០លានដុល្លារ ខាងលើ ត្រូវបានក្រសួងការពារជាតិឥណ្ឌា លើកឡើងមុនដំណើរទស្សនកិច្ចរបស់នាយករដ្ឋមន្ត្រី
អ៊ីស្រាអែល Benjamin Netanyahu មកកាន់ប្រទេសឥណ្ឌាក្នុងអំឡុងពាក់កណ្តាលខែនេះ។ Barak ជាប្រភេទកាំជ្រួចផលិតដោយ
ក្រុមហ៊ុន Rafael Advanced Defense Systems របស់អ៊ីស្រាអែល។ គួរកត់សម្គាល់ថា ជាមធ្យមក្នុងមួយឆ្នាំៗ អ៊ីស្រាអែល លក់បរិក្ខារ
យោធាតម្លៃ ១ពាន់លានដុល្លារ ឲ្យទៅឥណ្ឌា។
កាលពីអំឡុងខែ ៤/២០១៧ ប្រទេសទាំងពីរ បានចុះកិច្ចព្រមព្រៀងយោធាមួយតម្លៃ ២ពាន់លានដុល្លារ ដែលរួមមានការផ្គត់ផ្គង់កាំជ្រួច
រយៈចម្ងាយមធ្យម ប្រព័ន្ធបាញ់បង្ហោះ និងបច្ចេកវិទ្យានាំផ្លូវ៕ ចន្ទ្រា
