ភ្នំពេញ៖ ក្នុងពិធីជួបជុំជាមួយកម្មករកម្មការិនី សម្តេចតេជោ នាយករដ្ឋមន្ត្រី បានអំពាវនាវដល់បងប្អូនជនរួមជាតិ ដឹងច្បាស់ណាស់ថា “វិមានឯករាជ្យ” គឺជាបូជនីយដ្ឋានប្រវត្តិសាស្ត្រខ្មែរ ដែលមានទាំង ព្រះមហាក្សត្រ នាយករដ្ឋមន្ត្រី និងគណៈប្រតិភូអន្តរជាតិតូចធំយាង នឹងអញ្ជើញមកគោរពវិញ្ញាណក្ខន្ធ។ ទីនេះក៏ជាកន្លែងទាក់ទាញភ្ញៀវទេសចរណ៍យ៉ាងច្រើនផងដែរ។
សម្តេចតេជោ បានថ្លែងថា “គួរឲ្យសោកស្តាយ ដែលមានបងប្អូនកូនក្មួយអ្នកធ្វើដំណើរមួយចំនួន បានជិះបញ្ច្រាសទិសចរាចរណ៍។ សូមកុំឲ្យទម្លាប់អាក្រក់បែបនេះ បន្តកើតមានឡើងតទៅទៀត។ គ្រប់ៗគ្នាត្រូវតែគោរពច្បាប់។ សូមកូនក្មួយចូលរួមគោរព និងអនុវត្តិច្បាប់ចរាចរណ៍អោយបានត្រឹមត្រូវល្អ។ បើបើកបរខុសច្បាប់ហើយ នគរបាលចរាចរណ៍ហៅឈប់ គឺសូមឈប់ ហើយមិនត្រូវទូរស័ព្ទសុំអន្តរាគមន៍ពីនរណាម្នាក់ទេ ទោះបីគេនោះជាផ្កាយ ឬលោកខែ ក៏មិនអាចជួយបានដែរ”។
សម្តេចតេជោ បានបញ្ជាក់ថា ទន្ទឹមនឹងនេះ ក្រសួងសាធារណៈការ និងអាជ្ញាធរ និងមន្ទីរពាក់ព័ន្ធទាំងអស់ត្រូវតែត្រួតពិនិត្យ និងដាក់ផ្លាកសញ្ញាចរចរណ៍ ហាមបត់បញ្ច្រាសទិសឲ្យបានត្រឹមត្រូវ និងជាបន្ទាន់។ ទាំងអស់គ្នាត្រូវរួមគ្នាជំរុញការអនុវត្តន៍ច្បាប់ចរាចរណ៍ឲ្យមានប្រសិទ្ធភាពខ្ពស់បំផុត ដើម្បីកាត់បន្ថយគ្រោះថ្នាក់ចរចារណ៍នៅទូទាំងប្រទេស។
បើតាមសម្តេចតេជោ “ខ្ញុំនឹងបង្កើតមូលនិធិស៊ីក្លូ”។ បងប្អូនអ្នកធាក់ស៊ីក្លូ ក៏ជាបងប្អូនកម្មករក្រៅប្រព័ន្ធដែរ។ បងប្អូនក៏ត្រូវការកិច្ចគាំពារសុខុមាលភាពដូចគ្នា។ ខ្ញុំសូមជម្រាបជូនបងប្អូនកម្មករស៊ីក្លូទូទាំងប្រទេសបានជ្រាបថា បងប្អូនគឺនឹងទទួលបានការពិនិត្យ និងព្យាបាលជំងឺដោយមិនគិតថ្លៃទេ នៅក្នុងមន្ទីរពេទ្យរដ្ឋ។ ទន្ទឹមនឹងនេះ ខ្ញុំនឹងបង្កើត “មូលនិធិទ្រទ្រង់ស៊ីក្លូ” ដើម្បីជួយទ្រទ្រង់ និងអភិរក្សស៊ីក្លូ។ សូមបងប្អូនចូលរួមវិភាគទាន និងចូលរួមថែរក្សានិងជិះស៊ីក្លូដើម្បីកុំឲ្យស៊ីក្លូខ្មែរយើងបាត់បង់។ ស៊ីក្លូក៏អាចទាក់ទាញភ្ញៀវទេសចរផងដែរ។ សូមសប្បុរសជន និងបងប្អូនដែលមានបំណងចង់ចូលរួមគាំទ្រ និងទ្រទ្រង់ស៊ីក្លូគឺសូមចូលរួមផ្តល់វិភាគទានជាមួយខ្ញុំ។ ខ្ញុំគ្រោងនឹងបរិច្ចាគក្នុង១ឆ្នាំ ១២០លានរៀល។
សម្តេចតេជោ មានប្រសាសន៍ថា ខ្ញុំសូមស្វាគមន៍យ៉ាងកក់ក្តៅ និងអរគុណម្ចាស់រោងចក្រ ម្ចាស់ក្រុមហ៊ុន និងកូនក្មួយកម្មករទាំងអស់ ដែលបានមកចូលរួមក្នុងពិធីសំណេះសំណាលព្រឹកថ្ងៃទី៣ខែមករាឆ្នាំ២០១៨នេះ។ ខ្ញុំក៏សូមអរគុណចំពោះបងប្អូនជីដូនជីតារបស់កូនក្មួយ កម្មករកម្មការិនី ដែលបានគាំទ្ររូបខ្ញុំ និងបោះឆ្នោតឲ្យ គណបក្សប្រជាជន ដឹកនាំ និងកសាងប្រទេសជាតិមកទល់សព្វថ្ងៃ។ ខ្ញុំសូមឆ្លៀតយកឱកាសនេះ អរគុណដល់អាជ្ញាធរ កងកម្លាំងប្រដាប់អាវុធគ្រប់ប្រភេទ ដែលបានខិតខំការពារសន្តិសុខសណ្តាប់ធ្នាប់ និងបានបញ្ចៀសបាននូវគ្រោះថ្នាក់ និងអំពើហឹង្សាគ្រប់យ៉ាងនៅក្នុងពិធីចូលឆ្នាំសកល ២០១៨ ដែលបានព្រឹត្តិទៅយ៉ាងល្អកាលពី២ថ្ងៃកន្លងមកនេះ។
សូមជូនពរកូនក្មួយកម្មករកម្មការិនីទូទាំងប្រទេសទទួលបានជោគជ័យក្នុងការងារ និងសុខចម្រើននៅក្នុងឆ្នាំសកលថ្មី ២០១៨ គ្រប់ៗគ្នា។
នៅព្រឹកថ្ងៃពុធទី៣ខែមករាឆ្នាំ២០១៨នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជួបសួរសុខទុក្ខកូនក្មួយកម្មករកម្មការិនី ចំនួន ១៣.៥៤៦នាក់ មកពីរោងចក្រចំនួន១៣ ស្ថិតនៅរោងចក្រតំបន់ផ្សាសាំហាន់ ក្នុងខណ្ឌឫស្សីកែវ រាជធានីភ្នំពេញ។ គោលបំណងសំខាន់នៃការអញ្ជើញចុះជួបសំណេះសំណាលប្រចាំសប្តាហ៍នេះ គឺដើម្បីស្វែងយល់ពីសុខទុក្ខរបស់បងប្អូនកូនក្មួយកម្មករ កម្មការនីដោយផ្ទាល់ និងដើម្បីដោះស្រាយបញ្ហាប្រឈមនានា។ ទន្ទឹមនឹងនេះដែរ គឺដើម្បីជំរុញគោលនយោបាយអភិវឌ្ឍន៍វិស័យឧស្សាហកម្ម (២០១៥-២០២៥) ឲ្យកាន់តែមានប្រសិទ្ធភាពខ្ពស់ ដើម្បីពង្រឹងសេដ្ឋកិច្ចជាតិ និងលើកកម្ពស់ជីវភាពរស់នៅរបស់ពលរដ្ឋអោយកាន់តែល្អប្រសើរឡើង។
សម្តេចតេជោ ហ៊ុន សែន ក៏បានថ្លែងអំណគុណ ចំពោះអាជ្ញាធរគ្រប់លំដាក់ថ្នាក់ ដែលបានចូលរួមការពារសន្តិភាពសុវត្ថិភាព ជូនបងប្អូនប្រជាពលរដ្ឋ ក្នុងថ្ងៃឆ្លងឆ្នាំសកលកន្លងទៅថ្មីៗនេះ។ ក្នុងថ្ងៃឆ្លងឆ្នាំសកលនោះ សម្តេចតេជោក៏បានចូលរួមឆ្លងឆ្នាំផងដែរ នៅអគារវឌ្ឍនៈដែលនៅទីនោះ សម្តេចតេជោ បានមើលឃើញពីភាពរីកចម្រើននៃទីក្រុងភ្នំពេញ ដែលមានការអភិវឌ្ឍរីកចម្រើនគួរអោយកត់សំគាល់ ដែលខុសប្លែកពីអតីតកាល ដែលពេលនោះទីក្រុងភ្នំពេញមិនមានការអភិវឌ្ឍរីកចម្រើនទេ ផ្ទះភាគច្រើនពេលនោះគឺប្រើតែចង្កៀងប្រេងកាតប៉ុណ្ណោះ។
នៅថ្ងៃនេះ សម្តេចតេជោ ហ៊ុន សែន នាយករដ្ឋមន្ត្រី បានអបអរសារទរចំពោះកម្មករកម្មការិនី ដែលបាន ទទួលកាដំឡើងប្រាក់ខែចាប់ពី ១៥៣ មក ១៧០ ដុល្លារអាមេរិក ក្នុង១ខែចាប់ពីពេលនេះតទៅ។
សម្តេចតេជោ បានបន្តថា នៅសល់តែ៤ថ្ងៃទៀតតែប៉ុណ្ណោះ ថ្ងៃ៧មករា នឹងឈានចូលមកដល់ គឺថ្ងៃកំណើតទី២ របស់យើងដែលបានរួចផុតពីរបបប្រល័យពូជសាសន៍ប៉ុលពត។ នៅល្ងាចថ្ងៃទី៣នេះ សម្តេចតេជោ បញ្ជាក់ថានឹងមានការចាក់ផ្សាយនូវវីដេអូរឯកសារ១ស្តីពីដំណើរឆ្ពោះទៅរកការសង្គ្រោះជាតិដែលទូរទស្សជាតិនឹងចាក់ផ្សាយហើយទូរទស្សន៍នានានឹងផ្សាយបន្តផងដែរដោយវីដេអូនេះបានឆ្លុះបញ្ចាំងពីប្រវត្តិរឿងរ៉ាវអតីតកាលជាពិសេសដំណើរឆ្ពោះទៅរកការរំដោះប្រទេសកម្ពុជាពីរបបប្រល័យពូជន៍សាស្ត្រប៉ុលពត ក្រោមការដឹកនាំរបស់សម្តេចតេជោ ហ៊ុន សែន៕ ដោយ៖កូឡាប
