ភ្នំពេញ៖ក្នុងរយៈពេល ០៦ខែ ដើមឆ្នាំ២០១៩ ទេសចរអន្តរជាតិមកទស្សនាកម្ពុជាមានចំនួន ៣,៣លាននាក់ កើនឡើង ១១.២% ធៀបនឹងរយៈពេលដូចគ្នាឆ្នាំ២០១៨។
លោកថោង ខុន រដ្ឋមន្ត្រីក្រសួងទេសចរណ៍ កាលពីរសៀលថ្ងៃទី 6 ខែសីហា ឆ្នាំ 2019 បានថ្លៃក្នុងពិធីប្រកាសតែងតាំងប្រធានមន្ទីរទេសចរណ៍រាជធានីភ្នំពេញថា កត្តាសន្តិភាព សន្តិសុខ សុវត្ថិភាព ស្ថិរភាពនេះហើយ គឺជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍរីកចំរើនលើគ្រប់វិស័យ ក្នុងនោះវិស័យទេសចរណ៍ក៏មានការរីកចម្រើនគួរឱ្យកត់សម្គាល់។ វិស័យទេសចរណ៍ដែលត្រូវបានរាជរដ្ឋាភិបាលចាត់ទុកជា មាសបៃតង គឺជាវិស័យមួយដែលចូលរួមទ្រទ្រង់កំណើនសេដ្ឋកិច្ច-សង្គម បង្កើតការងារ និងកាត់បន្ថយភាពក្រីក្ររបស់ប្រជាពលរដ្ឋ ជាការនាំចេញនៅនឹងកន្លែង ព្រមទាំងដើរតួនាទីយ៉ាងសំខាន់ក្នុងការចូលរួមថែរក្សាអភិរក្សបរិស្ថាន ឆ្លើយតបនឹងបំរែបំរួលអាកាសធាតុប្រកបដោយប្រសិទ្ធភាព។
លោកបន្តថា ជាក់ស្តែង នៅឆ្នាំ២០១៨កន្លងទៅ កម្ពុជាទទួលបានទេសចរអន្តរជាតិប្រមាណ ៦,២លាននាក់ ក្នុងអត្រាកំណើន ១០.៧% ដោយបាននាំមកនូវប្រាក់ចំណូលជូនជាតិប្រមាណជាង ៤,៣៥៦ លានដុល្លារអាមេរិក រួមចំណែក១២.៧% ក្នុងផលិតផលក្នុងស្រុកសរុប (GDP) និងបង្កើតការងារដោយផ្ទាល់ប្រមាណ ៦២ម៉ឺននាក់។ ដោយឡែកក្នុងរយៈពេល ០៦ខែ ដើមឆ្នាំ២០១៩ ទេសចរអន្តរជាតិមកទស្សនាកម្ពុជាមានចំនួន ៣,៣លាននាក់ កើនឡើង ១១.២% ធៀបនឹងរយៈពេលដូចគ្នាឆ្នាំ២០១៨។
ដោយឡែក ឆ្នាំ២០១៨ រាជធានីភ្នំពេញទទួលបានទេសចរអន្តរជាតិ ៣,៦លាននាក់ កើនឡើង ១៤.៨% (ស្មើនឹង ៥០.៥% នៃចំនួនទេសចរសរុប) ក្នុងនោះទេសចរមកលេង ច្រើនជាងគេរួមមាន ចិន ម៉ាឡេស៊ី ចិនតៃវ៉ាន អាមេរិក ជប៉ុន ថៃ កូរ៉េ បារាំង អូស្ត្រាលី និងសឹង្ហបុរី។ ក្នុងរយៈពេល ០៦ខែ ដើមឆ្នាំ២០១៩ រាជធានីភ្នំពេញទទួលបានទេសចរអន្តរជាតិ ២លាននាក់ កើនឡើង ២៧.៣% (ស្មើនឹង ៥២.៦% នៃចំនួនទេសចរសរុប)។
តាមការព្យាករណ៍ នៅឆ្នាំ២០១៩ កម្ពុជារំពឹងថា នឹងទទួលទេសចរអន្តរជាតិ ៦,៧លាននាក់ ឆ្នាំ២០២០ ប្រមាណជាង ៧លាននាក់ ឆ្នាំ២០២៥ ប្រមាណ ១១លាននាក់ និងឆ្នាំ២០៣០ ប្រមាណ ១៥លាននាក់។
លោកថោង ខុន បានមានប្រសាសន៍បន្ថែមទៀតថា ដើម្បីធ្វើឲ្យកម្ពុជាក្លាយជាគោលដៅទេសចរណ៍ស្អាត បៃតង និងសេវាប្រកបដោយគុណភាព ក្រសួងទេសចរណ៍បានដាក់ចេញនូវយុទ្ធសាស្ត្រ ០៤ចំនុច៖
១- បង្កើតផលិតផលទេសចរណ៍ថ្មីប្រកបដោយការឆ្នៃប្រឌិត និងនវានុវត្តន៍
២- ពង្រឹងគុណភាពផលិតផល និងសេវាកម្មទេសចរណ៍ តាមទស្សនទាន សេវា មួយ ស្តង់ដារមួយ និងអភិវឌ្ឍធនធានមនុស្ស តាមទស្សនទាន បុគ្គលិកម្នាក់ ជំនាញមួយ
៣- ពង្រឹងការឃោសនាផ្សព្វផ្សាយទេសចរណ៍ទាំងក្នុង និងក្រៅប្រទេស
៤- ពង្រឹងការគ្រប់គ្រងឧស្សាហកម្មទេសចរណ៍តាមប្រព័ន្ធ Online ( Smart Tourism)
ដើម្បីធ្វើការគ្រប់គ្រង និងអភិវឌ្ឍវិស័យទេសចរណ៍ប្រកបដោយគុណភាព ប្រសិទ្ធភាព និងនិរន្តរភាព ក្រសួងទេសចរណ៍បានកសាងនូវឯកសារគតិយុត្ត គោលនយោបាយ យុទ្ធសាស្ត្រសំខាន់ៗដូចជា៖ ច្បាប់ស្តីពីទេសចរណ៍ ផែនការយុទ្ធសាស្ត្រ អភិវឌ្ឍន៍ទេសចរណ៍ ២០១២-២០២០ គោលនយោបាយជាតិទេសចរណ៍ ផែនការយុទ្ធសាស្ត្រទីផ្សារទេសចរណ៍កម្ពុជា និងយុទ្ធសាស្ត្រទីផ្សារចិន សៀវភៅសស្តីពី China Ready គោលនយោបាយជាតិអេកូទេសចរណ៍ និងអនុក្រឹត្យស្តិពីការគ្រប់គ្រងតំបន់ទេសចរណ៍ពិសិដ្ឋ (ដែលរាជរដ្ឋាភិបាលទើបអនុម័តថ្មីៗនេះ)។
ស្របជាមួយនឹងស្តង់ដាគុណភាពទេសចរណ៍ថ្នាក់តំបន់អាស៊ាន កម្ពុជាក៏បានរៀបចំបង្កើត និងដាក់ចេញនូវស្តង់ដាថ្នាក់ជាតិផងដែររួមមាន៖ ស្តង់ដាសណ្ឋាគារបៃតងកម្ពុជា ស្តង់ដាផ្ទះស្នាក់កម្ពុជា ស្តង់ដាបន្ទប់ប្រជុំកម្ពុជា ស្តង់ដាបង្គន់សាធារណៈកម្ពុជា ស្តង់ដាទេសចរណ៍សហគមន៍កម្ពុជា ស្តង់ដាទីក្រុងស្អាតកម្ពុជា ស្តង់ដាភោជនីយដ្ឋានស្អាតកម្ពុជា ស្តង់ដាមណ្ឌលព័ត៌មានទេសចរណ៍កម្ពុជា ស្តង់ដាមណ្ឌលកម្សាន្តមនុស្សពេញវ័យ។
ថ្មីៗនេះ រាជរដ្ឋាភិបាលក៏ទើបបានប្រកាសដាក់ឲ្យអនុវត្ត ស្តង់ដារវិថីម្ហូបអាហារ (Food Street) និងប្រព័ន្ធចំណាត់ថ្នាក់សេវាកម្មតូបលក់ម្ហូបអាហារ (Street Food)។
នៅថ្ងៃទី ២១ ខែសីហា ឆ្នាំ២០១៩ ខាងមុខ ក្រសួងទេសចរណ៍សហការជាមួយ អង្គការទេសចរណ៍ពិភពលោក (UNWTO) នឹងរៀបចំសន្និសីទអន្តរជាតិលើកទី១ ស្តីពីទេសចរណ៍ម្ហូបអាហារ (First International Conference on Gastronomy and Food Tourism) នៅរាជធានីភ្នំពេញ ដែលគ្រោងនឹងមានប្រតិភូ វាគ្មិន អ្នកជំនាញការ
អន្តរជាតិមកពីស្ថាប័នរដ្ឋ និងផ្នែកឯកជន ចូលរួមប្រមាណ ៦០០នាក់ ក្នុងគោលបំណងជម្រុញផ្សព្វផ្សាយម្ហូបអាហារខ្មែរឲ្យក្លាយជាផលិតផលទេសចរណ៍ប្រកបដោយភាពទាក់ទាញ ហើយក៏នឹងបង្ហាញនូវ នំបញ្ចុកខ្មែរ ផងដែរ។
ទីក្រុង និងទេសចរណ៍ មានចំណងទំនាក់ទំនងគ្នាទៅវិញទៅមកយ៉ាងស្អិតរមួត ព្រោះថា ទីក្រុងជាបណ្តុំដ៏សំខាន់ ទាំងសម្រាប់ការរស់នៅ ការសម្រាកលំហែ សកម្មភាពទេសចរណ៍ សកម្មភាពពាណិជ្ជកម្ម សេដ្ឋកិច្ច នយោបាយ និងវប្បធម៌ជាដើម ។ល។ ជោគជ័យនៃវិស័យទេសចរណ៍ នឹងចូលរួមដល់ការអភិវឌ្ឍទីក្រុង តាមរយៈការនាំមកនូវ កាល្លានុវត្តភាពសេដ្ឋកិច្ច ពាណិជកម្ម វិនិយោគគំរូថ្មីនៃការអភិវឌ្ឍនគរូបនីយកម្ម ការអភិរក្សបេតិកភណ្ឌទីក្រុង ការគិតគូរនិរន្តរភាពបរិស្ថាន ភាពស្អាត ភាពបៃតង និងការកសាងហេដ្ឋារចនាសម្ព័ន្ធទ្រទ្រង់ចាំបាច់នានាបម្រើដល់សេចក្តីត្រូវការរបស់ភ្ញៀវទេសចរ។
សម្រាប់ទីក្រុងភ្នំពេញបច្ចុប្បន្ន គឺមានការប្រែមុខមាត់ និងរីកចម្រើនយ៉ាងឆាប់រហ័ស សក្តិសមជារាជធានី និងជាបេះដូងរបស់ប្រទេសជាតិ ព្រមទាំងក្លាយជា មជ្ឈមណ្ឌលសេដ្ឋកិច្ច ពាណិជកម្ម វិនិយោគ ទេសចរណ៍ វប្បធម៌ដ៏ធំចំបង។ យើងសង្កេតឃើញ អាគារពាណិជ្ជកម្មខ្ពស់ៗ ស្ពានអាកាស ផ្លូវថ្នល់ ផ្សារទំនើប សំណង់បូរី
ថ្មីៗ Apartment, Condo ក្រុមហ៊ុន ធនាគារ និងអាគារខ្ពស់ៗជាច្រើនទៀត បាននិងកំពុងរីកស្គុះស្គាយ និងលេចត្រដែតឡើងពាសពេញទីក្រុងភ្នំពេញ។
ជាក់ស្តែង កាលពីខែធ្នូ ឆ្នាំ២០១៧ កន្លងមកនេះ ក្រុមប្រឹក្សាទេសចរណ៍ និងពាណិជ្ជកម្មអឺរ៉ុប បានបោះឆ្នោតជ្រើសរើស រាជធានីភ្នំពេញ ជារាជធានីនៃវប្បធម៌ និងទេសចរណ៍ពិភពលោក ហើយពេលនោះ លោក ឃួង ស្រេង អភិបាលនៃគណៈអភិបាលរាជធានីភ្នំពេញ ដែលទើបឡើងតំណែងថ្មី ក៏បានឡើងទទួលជ័យលាភីនេះនៅចំពោះមុខ សម្តេចតេជោនាយករដ្ឋមន្ត្រី នៅវិមានសន្តិភាព ផងដែរ។
លោកបានថ្លែងថា ខ្ញុំក៏សូមឆ្លៀតឱកាសនេះ ចូលរួមអបអរសាទរដល់ ខណ្ឌទាំង១២ នៃរាជធានីភ្នំពេញ ដែលបានទទួលជ័យលាភី ក្នុងចលនាប្រលងប្រណាំងទីក្រុងស្អាតលើកទី២ (២០១៨-២០២១) ដែលរួមមាន ខណ្ឌដូនពេញ (ផ្ការំដួល ៣ទង) ខណ្ឌទួលគោក (ផ្ការំដួល ២ទង) ខណ្ឌចំការមន (ផ្ការំដួល ២ទង) ខណ្ឌ៧មករា (ផ្ការំដួល ២ទង) ខណ្ឌព្រែកព្នៅ (ផ្ការំដួល ១ទង) ខណ្ឌពោធិសែនជ័យ (ផ្ការំដួល ១ទង) ខណ្ឌមានជ័យ (ផ្ការំដួល ១
ទង) ខណ្ឌច្បារអំពៅ (ផ្ការំដួល ១ទង) ខណ្ឌដង្កោ (ផ្ការំដួល ១ទង) ខណ្ឌសែនសុខ (ផ្ការំដួល ១ទង) ខណ្ឌជ្រោយចង្វារ (ផ្ការំដួល ១ទង) និងខណ្ឌឬស្សីកែវ (ផ្ការំដួល ១ទង)។
ជាងនេះទៀត រាជធានីភ្នំពេញក៏ធ្លាប់បានធ្វើជាម្ចាស់ផ្ទះរៀបចំវេទិកាទេសចរណ៍ អាស៊ានឆ្នាំ២០១១ (ATF 2011) ហើយនៅឆ្នាំ ២០២១ ខាងមុខ ក្រសួងទេសចរណ៍នឹង រៀបចំវេទិកាទេសចរណ៍អាស៊ាន (ATF) ជាលើកទី២ នៅភ្នំពេញផងដែរ។ ដូច្នេះ ក្នុង រយៈពេល១០ឆ្នាំនេះ ភ្នំពេញត្រូវតែមានការប្រែប្រួលមុខមាត់ថ្មី មានផែទេសចរណ៍ថ្មី មានផលិតផល និងសេវាកម្មទេសចរណ៍ប្រកបដោយស្តង់ដារ និងគុណភាពខ្ពស់។
កាលពីថ្ងៃទី២៩ ខែកក្កដា ឆ្នាំ២០១៩ ថ្មីៗនេះ ក្នុងឱកាស សម្តេចតេជោនាយក រដ្ឋមន្ត្រី ចុះពិនិត្យការដ្ឋានសាងសង់ ពហុកីឡដ្ឋាន “មរតកតេជោ” សម្តេចតេជោ បានបញ្ជាក់ច្បាស់ថា រាជធានីភ្នំពេញនឹងត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ីអឺរ៉ុបនៅឆ្នាំ២០២០ កិច្ចប្រជុំកំពូលអាស៊ានឆ្នាំ២០២២ និងស៊ីហ្គេម (SEA Games) ឆ្នាំ២០២៣។
ទោះជាយ៉ាងណាក៏ដោយ រាជធានីភ្នំពេញបច្ចុប្បន្ននៅជួបប្រទះបញ្ហាប្រឈមសំខាន់ៗមួយចំនួន មានដូចជា៖ ការកកស្ទះចរាចរនៅស្ទើរគ្រប់ដងផ្លូវសំខាន់ៗ បញ្ហាសណ្តាប់ធ្នាប់ របៀបរៀបរយ អនាម័យនៅទីផ្សារ និងទីប្រជុំជន បញ្ហាការគ្រប់គ្រងសំរាម (សំណល់រឹង រាវ និងការប្រមូលសំរាម) កង្វះបង្គន់សាធារណៈនៅតាមទីកន្លែងសំខាន់ៗ បញ្ហាចំណតរថយន្ត (បេនឡាន Taxi, Bus, ចំណតរថយន្តឯកជន) កង្វះកន្លែងថ្មើជើង បញ្ហាសន្តិសុខ សុវត្ថិភាពទេសចរ (មានករណីចោរលូច ចោរឆក់) បញ្ហាគ្រឿងញៀននៅតាមក្លឹបកំសាន្ត ពុំទាន់មានផែទេសចរណ៍ (ឆ្នាំ២០២០ខាងមុខ យើងនឹងមានកំពង់ផែថ្មីមួយ)កាណូតដឹកជញ្ជូនទេសចរមួយចំនួនរកស៊ីអត់មានច្បាប់អនុញ្ញាតត្រឹមត្រូវ ពុំទាន់មានបង្កើតកន្លែងកម្សាន្តទេសចរណ៍ទាក់ទាញថ្មីៗអោយបានច្រើន ការគ្រប់គ្រងឧស្សាហកម្ម សេវាកម្មទេសចរណ៍នៅតាមខណ្ឌទាំង១៤ នៅមានកម្រិតនៅឡើយ (អាជីវកម្មមួយចំនួនរកស៊ីអត់ច្បាប់) បញ្ហាស្លាកយីហោអាជីវកម្ម (ភាសាចិន) មុខម្ហូប (ភាសាចិន) កង្វះមណ្ឌលពត៌មានទេសចរណ៍ មន្ត្រីប្រចាំការនៅការិយាល័យទេសចរណ៍ខណ្ឌទាំង១៤ នៅមានកម្រិត មូលដ្ឋានអាជីវកម្មទេសចរណ៍សរុបមាន ៣,០៩៦ កន្លែង ប៉ុន្តែមូលដ្ឋានអាជីវកម្មរកស៊ីអត់ច្បាប់ និងផុតសុភពភាពមាន ១,២៥៣ កន្លែង (ស្មើនឹង ៤០.៥% នៃចំនួនសរុប)។
ដូច្នេះ ដើម្បីធ្វើឲ្យរាជធានីភ្នំពេញ ជាទីក្រុងទេសចរណ៍ប្រកបដោយភាពស្អាត បៃតង មានសន្តិសុខ សុវត្ថិភាព សណ្តាប់ធ្នាប់ ចរាចរ អនាម័យ បរិស្ថានល្អ និងសក្តិសមជាម្ចាស់ផ្ទះរៀបចំកិច្ចប្រជុំកំពូលៗ និងព្រឹត្តិការណ៍អន្តរជាតិធំៗ យើងទាំងអស់គ្នាដែលមានវត្តមាននៅទីនេះ ត្រូវរួមគ្នាគិត រួមគ្នាធ្វើ និងរួមគ្នាទទួលខុសត្រូវ សំដៅពិនិត្យ និងដោះស្រាយនូវបញ្ហាប្រឈមទាំងនេះឲ្យមានប្រសិទ្ធភាព តម្លាភាព និងស្មារតីទទួលខុសត្រូវខ្ពស់។ ជាងនេះទៀត យើងទាំងអស់គ្នាត្រូវរួមគ្នា អនុវត្តតាមអនុសាសន៍ណែនាំ ០៥ចំណុច របស់សម្តេចតេជោនាយករដ្ឋមន្ត្រី ក្នុងឱកាសពិធីអបអរសាទរទិវាជាតិទីក្រុងស្អាតលើកទី៧ ឆ្នាំ២០១៩ កាលពីថ្ងៃទី ២៥ ខែកុម្ភៈ ឆ្នាំ២០១៩ ដែលមានខ្លឹមសារសំខាន់ៗដូចខាងក្រោម៖ ទី១. ត្រូវបង្កើនភាពទាក់ទាញ និងរស់រវើកនៅទីក្រុង តាមរយៈការប្រើប្រាស់បច្ចេក វិទ្យាក្នុងការបង្កើតទីក្រុងប្រកបដោយភាពវ័យឆ្លាត (Smart City) ដោយរៀបចំឲ្យមានក្របខណ្ឌគោលនយោបាយជាក់លាក់មួយស្តីពីការអភិវឌ្ឍទីក្រុងប្រកបដោយចីរភាពឆ្ពោះទៅឆ្នាំ២០៣០ និងឆ្នាំ២០៥០។ ទន្ទឹមនេះ ក្រសួងប្រៃសណីយ៍ និងទូរគមនាគមន៍ត្រូវបំពាក់ឲ្យមានវ៉ាយហ្វាយ (Free Wifi) នៅតាមគោលដៅទេសចរណ៍និមួយៗ ពិសេសនៅរាជធានីភ្នំពេញ ខេត្តសៀមរាប ខេត្តព្រះសីហនុ និងខេត្តបាត់ដំបង ឲ្យបានមុនឆ្នាំ២០២៣។ ទី២. ត្រូវបង្កើនភាពទាក់ទាញ និងរស់រវើកនៅទីក្រុង តាមរយៈការធានាឲ្យបាន
ភាពស្អាត និងបៃតង គឺកម្ពុជាស្អាត កម្ពុជាបៃតង ទម្លាប់នៃភាពស្អាត ទាំងលំនៅដ្ឋានស្អាត ភូមិស្អាត សង្កាត់ស្អាត ដែលផ្តើមចេញពីយើងទាំងអស់គ្នា។ ទី៣. ដើម្បីបង្កើនភាពទាក់ទាញ និងរស់រវើកនៅទីក្រុង យើងត្រូវគិតគូរអំពីសណ្តាប់ ធ្នាប់ និងសូមឲ្យក្រសួងមហាផ្ទៃ និងក្រសួងរៀបចំដែនដី នគរូបនីយកម្ម និងសំណង់ សិក្សារៀបចំ ច្បាប់ស្តីពីសណ្តាប់ធ្នាប់សាធារណៈ ដើម្បីកាត់បន្ថយការកកស្ទះចរាចរណ៍ក្នុងទីក្រុង។ ទន្ទឹមនេះ អាជ្ញាធរគ្រប់លំដាប់ថ្នាក់ រដ្ឋបាលថ្នាក់ក្រោមជាតិ ត្រូវធានាឲ្យទីក្រុងរបស់ខ្លួនមានសណ្តាប់ធ្នាប់ល្អ មានចំណតយានយន្តត្រឹមត្រូវ មានចិញ្ចើមផ្លូវ ដើម្បីសម្រួលដល់ការធ្វើដំណើររបស់ប្រជាជន និងភ្ញៀវទេសចរ។ ទី៤. ដើម្បីបង្កើនភាពទាក់ទាញ និងរស់រវើកនៅទីក្រុង យើងត្រូវចាំបាច់ធានាឲ្យបាន សន្តិសុខ និងសុវត្ថិភាពសង្គម គ្រប់ភាគីពាក់ព័ន្ធត្រូវជំរុញចលនាការពារសន្តិសុខ និងសុវត្ថិភាពនៅគ្រប់ពេល និងគ្រប់ច្រកល្ហកនៅទូទាំងព្រះរាជាណាចក្រកម្ពុជា។ ទន្ទឹមនេះ ត្រូវធ្វើយុទ្ធនាការ ទីក្រុងស្អាត ៖ ទីក្រុងដែលមានសុវត្ថិភាពចំណីអាហារ និងស្នើឲ្យគ្រប់ភាគីពាក់ព័ន្ធចូលរួមអនុវត្ត ក្រមប្រតិបត្តិភោជនីយដ្ឋានស្អាត ឲ្យបានទូលំទូលាយ និងសូមប្រកាសដាក់ឲ្យអនុវត្ត ស្តង់ដារវិថីម្ហូបអាហារ (Food Street) ដែលជាសូចនាករថ្មីមួយទៀត ក្នុងស្តង់ដារទីក្រុងស្អាត និងចលនាប្រលង ប្រណាំង ទីក្រុងស្អាតៈ ទីក្រុងមានវិថីម្ហូបអាហារស្អាត ជារៀងរាល់ឆ្នាំ។ ទី៥. ដើម្បីធានាបានចីរភាពការអភិវឌ្ឍទីក្រុង ត្រូវអនុវត្តនូវទស្សនទានបៃតង។ ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម និងគ្រប់អភិបាល រាជធានី-ខេត្ត ត្រូវបំផុតឲ្យមានផលិតកម្មក្នុងស្រុកនានាបម្រើឲ្យវិស័យទេសចរណ៍ តាមរយៈបាវចនា វិស័យទេសចរណ៍គឺជាការនាំចេញនឹងកន្លែង ហើយទីក្រុងទេសចរណ៍ធំៗទាំងអស់ត្រូវតែជាទីក្រុងដែលមានខ្សែក្រវ៉ាត់បៃតង (Green Belt)។
ជារួម យើងជឿជាក់ថា អនុសាសន៍ណែនាំ ០៥ចំនុច របស់ សម្តេចតេជោនាយករដ្ឋមន្ត្រី យើងពិតជាអាចធ្វើបាន ក្រោមការដឹកនាំ និងចង្អុលបង្ហាញដ៏ត្រឹមត្រូវឈ្លាសវៃរបស់លោកប្រធានក្រុមប្រឹក្សារាជធានី ឯកឧត្តមអភិបាលនៃគណៈអភិបាលរាជធានីភ្នំពេញ និងសហការីទាំងអស់ រួមទាំងផ្នែកឯកជនផងដែរ។
ការរីកចម្រើននៃវិស័យទេសចរណ៍នៅរាជធានីភ្នំពេញកន្លងមក គឺមិនអាចកាត់ផ្តាច់បានពីការខិតខំប្រឹងប្រែងបំពេញភារកិច្ចរបស់ លោកស្រី គឹម សុវណ្ណា អតីត ប្រធានមន្ទីរ និងមន្ត្រីក្រោមឱវាទទាំងអស់ រហូតដល់ លោកស្រី គឹម សុវណ្ណា ត្រូវបានឡើងកាន់តំណែងថ្មីជា សមាជិកសភា (តំណាងរាស្ត្រមណ្ឌលភ្នំពេញ) កាលពីថ្ងៃទី ០៩ ខែឧសភា ឆ្នាំ២០១៩។
ដូច្នេះ ការផ្លាស់ប្តូរមុខតំណែងប្រធានមន្ទីរទេសចរណ៍រាជធានីភ្នំពេញនាពេលនេះ គឺដើម្បីបង្កើនប្រសិទ្ធភាពការងារ និងបន្តដឹកនាំ គ្រប់គ្រង អភិវឌ្ឍវិស័យទេសចរណ៍រាជធានីភ្នំពេញឲ្យមានគុណភាព ប្រសិទ្ធភាព និងនិរន្តរភាព។ ការតែងតាំង លោក ម៉ម វាសនា ជាប្រធានមន្ទីរនេះ គឺបានឆ្លងកាត់ការពិនិត្យ និងវាយតម្លៃយ៉ាងល្អិតល្អន់ទៅលើសមត្ថភាព ចំណេះដឹង និងបទពិសោធន៍ពីថ្នាក់ដឹកនាំក្រសួងហើយក៏ទទួលបានការគាំទ្រ និងឯកភាពពីគណៈអភិបាលរាជធានីភ្នំពេញ និងក្រសួងមុខងារសាធារណៈផងដែរ។ លោក ម៉ម វាសនា ជាមន្ត្រីសកម្ម មានសមត្ថភាព ចំណេះដឹង បទពិសោធន៍ មានឆន្ទៈ និងការទទួលខុសត្រូវខ្ពស់។ ដូច្នេះ ខ្ញុំសង្ឃឹមថា ប្រធានមន្ទីរថ្មីនឹងប្រើប្រាស់ចំណេះដឹង និងបទពិសោធន៍ជំនាញ ដើម្បីដឹកនាំ និងគ្រប់គ្រងវិស័យទេសចរណ៍រាជធានីភ្នំពេញឲ្យកាន់តែរីកចម្រើនថែមទៀត។
ជាមួយគ្នានោះ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ដែរថា “ដើម្បីចូលរួមចំណែក ក្នុងការលើកស្ទួយវិស័យទេចរណ៍ រដ្ឋបាលរាជធានីភ្នំពេញ ទន្ទឹមគ្នានឹងការកែលម្អ គុណភាព សេវាកម្មទេសចរណ៍ យើងក៏បានខិតខំ ធ្វើការអភិវឌ្ឍ ហេដ្ឋារចនាសម្ព័ន្ធ រូបវន្តសំខាន់ៗ ធ្វើអោយទីក្រុង មានការប្រែមុខមាត់ថ្មី និងរីកចម្រើនយ៉ាងឆាប់រហ័ស លើគ្រប់វិស័យ ក្នុងនោះរួមមានការស្តា និងអភិវឌ្ឍហេដ្ឋារចនាសម្ព័ន្ធ ការកែលម្អប្រព័ន្ធផ្លូវថ្នល់ ប្រព័ន្ធប្រឡាយលូ បណ្តាញទឹកស្អាត បណ្តាញអគ្គិសនី ភ្លើងបំភ្លឺសាធារណៈ ការកែលម្អសួនច្បារ និងលំហរបៃតងជាដើម” ។
លោកអភិបាលបានបន្តថា “ជាងនេះទៅទៀត រដ្ឋបាលរាជធានីភ្នំពេញ បានខិតខំលើកកម្ពស់ សុខុមាលភាពសាធារណៈ តាមរយៈការពង្រឹងសេវាសុខាភិបាល ឲ្យមានគុណភាព ការកែលម្អអនាម័យបរិស្ថាន ក្នុងទីក្រុង ការលើកកម្ពស់សុខសុវត្ថិភាព ចំណីអាហារ ការចូលរួមទប់ស្កាត់ការផលិត ការជួញដូរ និងការប្រើប្រាស់គ្រឿងញៀនខុសច្បាប់ លុបបំបាត់ អំពើហិង្សាក្នុងគ្រួសារ ពង្រឹកការអភិវឌ្ឍ គោលនយោបាយ ភូមិសង្កាត់មានសុវត្ថិភាព និងការផ្តល់សេវាសាធារណៈ តាមរយៈយន្តការ ច្រកចេញចូលតែមួយ ។ ទាំងនេះគឺជាសក្ខីភាព ឆ្លុះបញ្ចាំងពីឆន្ទៈ និងជំហរមួសមុត របស់រដ្ឋបាលរាជធានីភ្នំពេញ ក្នុងការយកចិត្តទុកដាក់ គិតគូរដល់ប្រជាពលរដ្ឋ គ្រប់មជ្ឈដ្ឋាន សុខុមាលភាពទីក្រុង និងការទាក់ទាញភ្ញៀវទេសចរជាតិ និងអន្តរជាតិ អោយចូលរួមទស្សនាកម្សាន្ត កាន់តែច្រើនឡើងៗ និងស្នាក់នៅរយៈពេលវែង ប្រកបដោយភាពរីករាយ និងសុខដុមបនីយកម្ម” ។
ក្នុងនោះដែរ លោក ម៉ម វាសនា ប្រធានមន្ទីរទេសចរណ៍ រាជធានីភ្នំពេញថ្មី បានលើកឡើងថា ចំពោះមុខតំណែងថ្មីនេះ គឺជាទំនុកចិត្តថ្មីបន្ថែមទៀត របស់ថ្នាក់ដឹកនាំ គ្រប់ជាន់ថ្នាក់ និងជារបត់ការងារថ្មី ក្នុងអាជីពជាមន្ត្រីរាជការស៊ីវិល ដែលត្រូវចូលរួមចំណែក កាន់តែស៊ីជម្រៅ ប្រកបដោយការទទួលខុសត្រូវខ្ពស់ ក្នុងដំណើរការអភិវឌ្ឍ តាមបែបប្រជាធិបតេយ្យ នៅថ្នាក់ក្រោមជាតិ ស្របតាមកម្មវិធីនយោបាយ និងយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលកម្ពុជា នីតិកាលទី៦ នៃរដ្ឋសភា ជាពិសេសការបំពេញតួនាទី-ភារកិច្ចជូន ក្រសួងទេសចរណ៍ និងរដ្ឋបាលរាជធានីភ្នំពេញ លើការងារឧស្សាហកម្មទេសចរណ៍ ក្នុងក្របខណ្ឌរាជធានីភ្នំពេញ ឱ្យកាន់តែប្រសើរឡើង តាមរយៈការខិតខំបំពេញការងារទ្វេដង ដោយស្មារតីយកចិត្តទុកដាក់ និងការទទួលខុសត្រូវខ្ពស់ ដើម្បីបំពេញការងារជូន ក្រសួងទេសចរណ៍, រដ្ឋបាលរាជធានីភ្នំពេញ, ភ្ញៀវទេសចរណ៍ជាតិ-អន្តរជាតិ, ប្រតិបត្តិករទេសចរណ៍ និងបម្រើប្រជាជន ឱ្យកាន់តែសកម្មខ្លាំងក្លាថែមទៀត៕ ដោយ៖កូឡាប