Wednesday, July 24, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

ការស្តារ និងស្ថាបនាហេដ្ឋារច​​នា​​ស​​ម្ព័​​​ន្ធ​ផ្លូវជាតិ និងផ្លូវខេត្ត ប្រវែងចំនួ​​​ន ១៦.២៩២ គីឡូម៉ែត្រ

spot_img

ភ្នំពេញ៖ ក្រសួងសាធារណការ បានឲ្យដឹងថា គិតមកដល់ខែសី​ហា ឆ្នាំ២០១៩នេះ ការងារស្តារ និងស្ថាបនាហេដ្ឋារច​​នា​​ស​ម្ព័​​ន្ធ​ផ្លូវជាតិ និងផ្លូវខេត្ត បានប្រវែងចំនួ​​​ន ១៦.២៩២ គីឡូម៉ែត្រ បានក្រាលកៅស៊ូ និងបេតុង ប្រវែង ៨.៦២០គីឡូម៉ែត្រ ផ្លូវជាតិដែលត្រូវពង្រី​ក​ជា៤គ​ន្លង បានបញ្ចប់មានប្រវែង​១៥៧គីឡូម៉ែត្រ កំពុងសាងស​ង់​ពង្រី​ក បន្ថែមមា​នប្រវែ​ង​សរុប ៤៣១ គីឡូម៉ែត្រ ស្ពានធំៗ ដែលបានសាងស​ង់រួច​​មា​នចំនួ​ន ១៧ ស្ពាន ប្រវែងសរុប ១៦.០៦៧ ម៉ែត្រ និងស្ពានកំពុងសាងសង់​ ចំ​នួន១ ប្រវែង ១.១៣១ ម៉ែត្រ។

នៅព្រឹកថ្ងៃទី១៤ ខែសីហា ឆ្នាំ២០១៩ ក្នុងពិធីសម្ពោធដាក់ ឱ្យប្រើប្រាស់ជាផ្លូវការស្ពានក្នុងភូមិសាស្ត្រទឹកដីខេត្តបាត់ដំបង លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា សមិទ្ធផលនានា ដែលប្រសូត្រចេញការដឹកនាំប្រកបដោ​យ​គតិប​ណ្ឌិតរ​បស់ សម្តេចអគ្គមហាសេនាបតីតេ​ជោ​​ ហ៊ុន​ សែន​ នាយករដ្ឋ​ម​ន្ដ្រី​​ នៃព្រះរាជាណាចក្រកម្ពុជា ពិសេ​សការអ​នុវ​ត្តដោយ​ជោគជ័​យនូវ​នយោបា​យ ឈ្នះ​-ឈ្នះ គិតត្រឹមឆ្នាំ២០១៨ កន្លង​ទៅនេះ​ រួមមាន៖ ការងារស្តារ និងស្ថាបនាហេដ្ឋារច​នា​សម្ព័ន្ធ​ផ្លូវជាតិ និងផ្លូវខេត្ត បានប្រវែងចំនួ​ន ១៦.២៩២ គីឡូម៉ែត្រ បានក្រាលកៅស៊ូ និងបេតុង ប្រវែង ៨.៦២០គីឡូម៉ែត្រ ស្មើនឹង ៥៣% ក្នុងនោះផ្លូវជាតិកម្រិត១​លេ​ខ ក្រាលកៅស៊ូ​ និងបេតុងបាន​ ​១០០% ផ្លូវជាតិកម្រិត២​លេ​ខ បា​ន៧​២,៣០% និងផ្លូវខេត្តបាន ៣០,៤០%។

លោករដ្ឋមន្រ្តី បានបន្ថែមថា ដោយឡែក ផ្លូវជាតិដែលត្រូវពង្រី​ក​ជា៤គ​ន្លង បានបញ្ចប់មានប្រវែង​១៥៧គីឡូម៉ែត្រ កំពុងសាងស​ង់​ពង្រី​ក បន្ថែមមានប្រវែ​ង​សរុប ៤៣១ គីឡូម៉ែត្រ ស្ពានធំៗ ដែលបានសាងសង់រួច​មា​នចំនួ​ន ១៧ ស្ពាន ប្រវែងសរុប ១៦.០៦៧ ម៉ែត្រ និងស្ពានកំពុងសាងសង់​ ចំ​នួន១ ប្រវែង ១.១៣១ ម៉ែត្រ។

ជាមួយគ្នានេះផងដែរ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានសា​ទរចំ​ពោះលទ្ធ​ផលសម្រេ​ចបាន​ល្អៗ នៅក្នុងវិស័យ សាធារណការ និ​ងដឹកជញ្ជូន និងបានថ្លែងអំណរគុណចំ​ពោះ​កិច្ច​ខិត​ខំប្រឹ​ងប្រែងរបស់មន្ត្រីរាជ​កា​រ និង ថ្នាក់ដឹក​នាំ​ក្រសួង​ កងវិស្វកម្ម និងអាជ្ញាធរពាក់ព័​ន្ធ​ ដែលបានចូលរួមចំណែកយ៉ាងសកម្មក្នុ​ង​ការសា​ងសង់ស្ពាន​ទាំង​នេះ ឱ្យសម្រេចបានជោគជ័​យ​ និងបា​នបន្ថែ​មថា៖ សមិទ្ធផល​នេះជាកា​ដូពិសេ​សសម្រា​ប់ សម្រាលការលំបាកក្នុងកា​រ​ធ្វើដំណើ​ររបស់បងប្អូនប្រជាពលរដ្ឋក្នុងខេ​ត្ត​បាត់ដំ​បង។

លោកទេសរដ្ឋ​​មន្ត្រី បាន​សម្តែងនូវការថ្លែងអំណរគុណ​យ៉ា​ងជ្រាល​ជ្រៅដ​ល់ក្រសួ​ង សា្ថប័នពាក់ព័ន្ធ និងអាជ្ញាធរដែន ដីគ្រប់លំដាប់​ថ្នាក់​ ដែលបានជួយជ្រោមជ្រែងសហការឱ្យដំ​ណើ​រការ​សាង​សង់ស្ពា​នទាំង​នេះប្រ​ព្រឹត្តទៅ ដោយរលូន និងបានបញ្ចប់តាមពេ​ល​វេលាកំ​ណត់។

លើសពីនេះទៅទៀត លោកទេសរដ្ឋមន្ត្រីបានផ្ដាំផ្ញើឱ្យបងប្អូនប្រជាព​ល​រដ្ឋចូ​លរួម​ថែរក្សា​ស្ពានទាំងនេះ ដោយស្មារតីជាម្ចាស់ ​និងគោរពច្បាប់ចរាចរណ៍ឱ្យបានម៉ឺងម៉ា​ត់​បំផុត​ ដើម្បីជៀ​សឱ្យ​ផុតពី​គ្រោះថ្នា​ក់ចរាចរ និងត្រូវចងចាំជានិច្ចប្រសា​ស​ន៍​ដ៏ខ្ពង់​ខ្ពស់​របស់សម្ដេចតេជោនា​យ​ករដ្ឋមន្ត្រី “ថ្ងៃនេះ ថ្ងៃស្អែក សូមកុំឱ្យមានគ្រោះថ្នាក់ច​រា​ចរ”។

សូមបញ្ជាក់ថា នៅព្រឹកថ្ងៃពុធ ១៤កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៤ ខែសីហា ឆ្នាំ២០១៩ ពិធីសម្ពោធដាក់ ឱ្យប្រើប្រាស់ជាផ្លូវការស្ពានច្រាំងចោ​ត​ ដែលស្ថិតនៅភូមិរូង ​ឃុំចែ​ងមាន​ជ័យ ស្រុកបាណន់ និងស្ពានចំនួ​ន​៤ទៀត នៅស្រុកសំឡូត ស្រុកបវិល ស្រុ​កឯកភ្នំ និងស្រុកកំរៀង ដែលឆ្លងកាត់ស្ទឹ​ង​សង្កែ និងស្ទឹងផ្សេៗទៀត ក្នុងភូមិសាស្ត្រទឹកដី​ខេ​ត្តបាត់​ដំបង។

ពិធីនេះលោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញ អមដំណើរ​ស​ម្ដេចក្រ​ឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហា​ផ្ទៃ ដោយមានការចូលរួមពីថ្នាក់ដឹកនាំក្រសួង ​ស្ថាប័នពាក់ព័ន្ធ លោកប្រធាន​ក្រុមប្រឹក្សាខេត្ត អភិបាលនៃគណៈអភិបាលខេត្ត ថ្នាក់ដឹកនាំនៃមន្ទីរជុំវិញខេត្ត លោកគ្រូ អ្នកគ្រូ សិស្សានុសិស្ស និងប្រជាពលរដ្ឋជាច្រើននាក់។

ស្ពានច្រំាងចោត មានប្រវែងសរុប ១៦២ម៉ែត្រ ទទឹង០៨ម៉ែត្រ ស្ថិតនៅភូមិរូង ឃុំចែងមានជ័យ ស្រុក បាណន់ ត្រូវបានអនុវត្តការសាងស​ង់​ដោយប​ញ្ជាកា​រដ្ឋាន​វិស្វកម្ម អគ្គបញ្ជាការដ្ឋាន​នៃ​ក្រសួ​ងការពា​រជាតិ និងត្រូវបានត្រួតពិនិត្យកា​រ​សាងស​ង់ដោ​យនាយ​កដ្ឋាន ហេដ្ឋារចនាសម្ព័ន្ធសា​ធា​រណៈ នៃក្រសួងសាធារ​ណកា​រ និងដឹកជញ្ជូន ដោយចំណាយពេ​ល​សាង​សង់​ចំនួន២ឆ្នាំ ចាប់ពីថ្ងៃទី២២ ខែកុម្ភៈ ឆ្នាំ ២០១៧ និងបញ្ចប់ជាស្ថាពរនៅ​ថ្ងៃ​ទី៣០ ខែកក្កដា ឆ្នាំ២០១៩ និងចំណាយថវិកា រាជរដ្ឋាភិបា​ល​សរុប ប្រមាណជា ៤៩៧១ លានរៀល។

ចំណែកស្ពានចំនួន៤ផ្សេងទៀតរួមមាន៖ ស្ពានប្រវែង ៤៥ ម៉ែត្រ ទទឹង០៨ម៉ែត្រ ស្ថិតនៅភូមិ​ម៉ា​ក់ឃ្លឿ​ ឃុំព្រៃខ្ពស់ ស្រុកបវិល ស្ពានប្រវែង៧២ម៉ែត្រ ទទឹ​ង១០ម៉ែត្រ ស្ថិតនៅភូមិព្រែកក​ញ្ច្រែ​ង ឃុំព្រែកនរិន្ទ ស្រុកឯកភ្នំ ស្ពានប្រវែង៥៤​ម៉ែ​ត្រ ទទឹង៨ម៉ែត្រ ស្ថិតនៅភូមិបឹងអូរ​ជា​ង ឃុំកំរៀង ស្រុកកំរៀង និងស្ពាន ប្រវែង១០២ ម៉ែត្រ ទទឹង៨ម៉ែត្រ ស្ថិតនៅភូមិ​អូ​ររំ​ចេ​កក្រោ​ម ឃុំអូរសំរិល ស្រុកសំឡូត ក៏ត្រូវបានអ​នុ​វត្តន៍ ការសា​ងស​ង់ដោយ​បញ្ជា​ការ​ដ្ឋានវិ​ស្វកម្ម អគ្គបញ្ជាកា​រ​ដ្ឋាន នៃក្រសួងការ​ពា​រជា​តិ និងត្រួតពិនិត្យការសាងសង់ដោ​យនា​យកដ្ឋា​នហេ​ដ្ឋារ​ចនាសម្ព័ន្ធ សាធារណៈនៃក្រសួងសាធា​រ​ណកា​រ និងដឹកជញ្ជូន ក្រោម គម្រោងថវិការា​ជរដ្ឋា​ភិបាលផ​ងដែរ៕ ដោយ៖កូឡាប

spot_img
×