ខេត្តកោះកុង ៖ នៅព្រឹ ថ្ងៃចន្ទ ទី ១៩ ខែសីហា ឆ្នាំ ២០១៩ នេះ លោកស្រី មិថុនា ភូថងង អភិបាលខេត្តកោះកុង រួមដំណើរ ដោយ លោក ឈេង សុវណ្ណដា អភិបាលក្រុង, លោក ឈិន ចិន អភិបាលស្តីទីក្រុងខេមរភូមិន្ទ និង ប្រធានមន្ទីរ អប់រំ យុវជន និង កីឡា ខេត្តកោះកុង បានអញ្ជើញ បើក វិញ្ញាសាប្រឡងសញ្ញាបត្រមធ្យមសិក្សាទុតិយភូមិ ឆ្នាំ ២០១៨-២០១៩ នៅវិទ្យាល័យ កោះកុង ក្រុងខេមរភូមិន្ទ។
នាឱកាសនោះ លោកស្រី មិថុនា ភូថង អភិបាលខេត្តកោះកុង មានប្រសាសន៍ថា រាជរដ្ឋាភិបាល កម្ពុជា និង ក្រសួងអប់រំ យុវជន និងកីឡា បានយកចិត្តទុកដាក់ អនុវត្តន៍នូវគោលនយោបាយ ផែនការយុទ្ធសាស្ត្រ ក្នុងការកំណែទម្រង់លើវិស័យអប់រំ ឲ្យ ប្រកបដោយគុណភាព និង តម្លាភាព ចំពោះសិស្សានុសិស្ស កំពុងខិតខំសិក្សារៀនសូត្រ ក្រេប យកចំណេះ ជំនាញ ដើម្បីក្លាយ ខ្លួន ជាធនធាននិង អ្នកបន្តវេន ដឹកនាំ ប្រទេសជាតិ ឲ្យមានការរីក ចម្រើននាថ្ងៃអនាគត។
លោកស្រីអភិបាលខេត្តបន្តថា ពេលកន្លងមកនេះ រដ្ឋបាលខេត្ត កោះកុង បានជំរុញឲ្យមន្ទីរអប់រំ យុវជន និង កីឡា ត្រូវយកចិត្តដាក់ អនុវត្តន៍រាល់កម្មវិធីបើកវគ្គបណ្តុះបណ្តាល មុនពេលប្រឡង ប្រឡងមធ្យមសិក្សាទុតិយភូមិ ជូន ដល់សិស្សានុសិស្ស ដើម្បីបង្កើន សមត្ថភាព ពីចំណុចខ្សោយ ឈានរកចំណុចខ្លាំង ក្នុងការត្រៀម ប្រឡងយកសញ្ញាបត្រមធ្យមសិក្សាទុតិយភូមិ ដើម្បីបន្តទៅសិក្សា ថ្នាក់ មហាវិទ្យាល័យ តាមបំណងប្រាថ្នា រៀងៗខ្លួន។
លោកស្រី មិថុនា ភូថង ឲ្យដឹងដូច្នេះ រួចបន្តមានប្រសាសន៍ក្នុងថ្ងៃបើកវិញ្ញាសាប្រឡងនេះ ដោយបានណែនាំដល់ក្មួយៗ សិស្សានុសិស្សទាំងអស់ ជា បេក្ខជនបេក្ខនារី មកប្រឡង នៅ ពេលនេះ ត្រូវចងចាំថា អ្នកចេះគឺជាប់។ ដូច្នេះក្មួយៗត្រូវខិតខំ ធ្វើយ៉ាងណាឲ្យកិច្ចការ របស់ខ្លួនបានល្អ ប្រកបដោយសមត្ថភាព កុំ មើលកុំចម្លងគ្នា កុំពឹងលើសំណៅ ឯកសារ ត្រូវធ្វើកិច្ចការ ដោយ ផ្ចិតផ្ចង់ ចៀសវាងការសរសេខុស កោសលុប និងរហែកក្រដាស ជា ហេតុនាំ ឲ្យបាត់បង់ឱកាសការ ប្រឡង។
ឆ្លៀតឱកាសនោះដែរ លោកស្រីអភិបាលខេត្តកោះកុង ក៏បានផ្តាំផ្ញើ ដល់អនុរក្សប្រចាំការតាមបន្ទប់ នីមួយៗ ត្រូវមើលសិស្សានុសិស្ស ជា បេក្ខជនប្រឡងឲ្យល្អហ្មត់ចត់ ហាម ស៊ីសំណូកសូកប៉ាន់ បើមានហេតុ ការអ្វីមិនស្រួល ត្រូវមានវិធានការ ឬ ចំណាត់ការណាមួយជាបន្ទាន់។
នៅចុងបញ្ចប់ លោកស្រី មិថុនា ភូថង ក៏បានជូនពរដល់ បេក្ខជន ប្រឡងទាំងអស់ សូមឲ្យធ្វើកិច្ចការ បានគ្រប់សំណួរទាំងអស់គ្នា និង ប្រឡងជាប់ឲ្យបានគ្រប់ៗគ្នា។
ទាក់ទិនការប្រឡងនេះដែរ លោក ង៉ែត ឡឹង ប្រធានមន្ទីរអប់រំ យុវជន និង កីឡាខេត្តកោះកុង បានឲ្យដឹង ថា ខេត្តនេះមានមណ្ឌលប្រឡង សញ្ញាបត្រមធ្យមសិក្សាទុតិយភូមិ សរុប ៣មណ្ឌល គឺ មណ្ឌល វិទ្យាល័យកោះកុង , មណ្ឌល វិទ្យាល័យ ជាស៊ីម និងមណ្ឌល បឋមសិក្សាទីរួមខេត្ត ដែលមាន បេក្ខជនសរុប ចំនួន ៩៧៩នាក់ ស្រី ៤៧៤នាក់ និងមានបន្ទប់ សរុបចំនួន ៤០បន្ទប់៕ ដោយៈដែន សីមា
