ភ្នំពេញ៖ ព្រះរាជអាជ្ញានៃអយ្យការសាលាដំបូងរាជធានីភ្នំពេញ លោក កែវ សុធា សម្រេចចោទប្រកាន់ដាក់ឲ្យស៊ើបអង្កេត លោកឧកញ៉ា ស្រី សុធា អាយុ៦១ឆ្នាំ ជាប្រធានក្រុមប្រឹក្សាភិបាលក្រុមហ៊ុន 7NG និង ឧកញ៉ា ស្រី ចន្ធូ អាយុ៣៨ឆ្នាំ ជាកូនប្រុស ជានាយកក្រុមហ៊ុន 7NG ពីបទឆបោក ពាក់ព័ន្ធការលក់ដីខ្យល់ទំហំ១ហិកតា ស្ថិតនៅភូមិព្រែកចាស់ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល តាមមាត្រា៣៩១ និង មាត្រា៣៩២ នៃក្រមព្រហ្មទណ្ឌ ប្រព្រឹត្តកាលពីកំឡុងឆ្នាំ២០០៨ ដល់ឆ្នាំ២០១៩ គឺរយៈពេល១១ឆ្នាំមកហើយ ។
យោងតាមដីកាសន្និដ្ឋានបញ្ជូនរឿងឲ្យស៊ើបសួរ កាលពីថ្ងៃទី១៦ ខែសីហា ឆ្នាំ២០១៩ កន្លងទៅ ដែលទើបទទួលបាននៅថ្ងៃទី១៩ ខែសីហា នេះលោក កែវ សុធា ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ។ បានឃើញ សំណុំរឿងព្រហ្មទណ្ឌលេខ ៣២១០ ចុះថ្ងៃទី ២៩ ខែ ឧសភា ឆ្នាំ ២០១៩ របស់អយ្យការអមសាលាដំបូងរាជធានីភ្នំពេញ ។ បានឃើញ ពាក្យបណ្ដឹង ចុះថ្ងៃទី ១៦ ខែ ឧសភា ឆ្នាំ ២០១៩ បស់ឈ្មោះ ឃុន ណាវី ។ ក្រោយពីបានពិនិត្យឯកសារខាងលើយល់ឃើញថា មានតម្រុយសន្មតបានថាៈ ឈ្មោះ ស្រី សុធា ភេទប្រុស អាយុ ៦១ឆ្នាំ ជនជាតិខ្មែរ មុខរបរ ប្រធានក្រុមប្រឹក្សាភិបាលក្រុមហ៊ុន 7NG មានទីលំនៅបច្ចុប្បន្ននៅអាគារលេខ១២៤ ផ្លូវសម្តេចសុធារស ភូមិ១៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ជានីតិជន និងឈ្មោះ ស្រី ចន្ទ ភេទប្រុស អាយុ ៣៨ឆ្នាំ ជនជាតិខ្មែរ មុខរបរ នាយកក្រុមហ៊ុន 7NG កាន់អត្តសញ្ញាណប័ណ្ណសញ្ជាតិខ្មែរលេខ០២០២៥៦១៨២ មានទីលំនៅបច្ចុប្បន្ននៅអាគារលេខ១២៤ ផ្លូវសម្តេចសុធារស ភូមិ១៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ជានីតិជន។ បានប្រព្រឹត្តដូចតទៅ ៖ កាលពីថ្ងៃទី ១៨ ខែមីនា ឆ្នាំ២០០៨ ឈ្មោះ ឈុន ណាវី ភេទស្រី អាយុ ៣៨ឆ្នាំ បានទិញដីទំហំ ១ ហិកតា (១០.០០០ម៉ែត្រការ៉េ) បណ្តោយ ២០០ ម៉ែត្រ គុណទទឹង ៥០ ម៉ែត្រ ដែលមានទីតាំងស្ថិតនៅភូមិព្រៃចាស់ ឃុំវិហារសួគ៌ ខាងជើងទល់ផ្លូវ៣០ ម៉ែត្រ ខាងកើត ខាងត្បូង និងខាងលិចទល់នឹងដីរបស់ឈ្មោះ ស្រី ចាន់ថា ដែលជាដីរបស់ក្រុមហ៊ុន 7NG ពីឈ្មោះ ស្រី ចន្ធូ ដោយមានការទុកចិត្ត ឈ្មោះ ឃុន ណាវី ពុំបានទាមទារប័ណ្ណកម្មសិទ្ធិពីឈ្មោះ ស្រី សុធា ដែលជាប្រធានក្រុមប្រឹក្សាភិបាលក្រុមហ៊ុន 7NG នោះទេ គឺមានឯកសារត្រឹមតែលិខិតផ្ទេរសិទ្ធិកាន់កាប់ដីតែប៉ុណ្ណោះ។ នៅដើមឆ្នាំ២០១៩ នេះ ឈ្មោះ ឃុន ណាវី មានបំណងធ្វើ
របងថ្ម រឹងមាំ ជុំវិញដីរបស់ខ្លួន ស្រាប់តែឈ្មោះ ស្រី សុធា និងឈ្មោះ ស្រី ចន្ធូ ពុំមានដីដូចក្នុងទីតាំងខាងលើឲ្យឈ្មោះ
ឈុន ណាវី ឡើយ។
លោកព្រះរាជអាជ្ញា បានបន្ថែមថា អំពើខាងលើជាបទល្មើសៈ ឆបោក ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០០៨-២០១៩ បទល្មើសដែលមានបញ្ញតិឲ្យផ្តន្ទាទោសតាមបញ្ញតិមាត្រា ៣៩១ និងមាត្រា ៣៩២ នៃក្រមព្រហ្មទណ្ឌព្រះរាជណាចក្រកម្ពុជា។
បានឃើញ មាត្រា ៤៤ និងមាត្រា ១២៨ នៃក្រមនីតិវិធីព្រហ្មទណ្ឌឆ្នាំ ២០០៧ ។
លោកព្រះរាជអាជ្ញា កែវ សុធា សម្រេច បើកការស៊ើបសួរលើអង្គហេតុខាងលើ និងស្នើសុំ៖ ធិក ដាក់ឲ្យស្ថិតក្រោមការពិនិត្យលើ ១-ឈ្មោះ ស្រី សុធា ភេទប្រុស អាយុ ៦១ឆ្នាំ ជនជាតិខ្មែរ (ក្រៅឃុំ ) ២-ឈ្មោះ ស្រី ចន្ធូ ភេទប្រុស អាយុ ៣៨ឆ្នាំ ជនជាតិខ្មែរ (ក្រៅឃុំ) ពីបទៈ ឆបោក ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០០៨-២០១៩ តាមបញ្ញត្តិមាត្រា៣៧៧ និងមាត្រា
៣៧៨ នៃក្រមព្រហ្មទណ្ឌ។
លោកព្រះរាជ្ញា ក៏បានធិក ដាក់ឲ្យស្ថិតនៅក្រោមការឃុំខ្លួនបណ្តោះអាសន្ន លើឈ្មោះខាងលើដើម្បីបង្ការ ឬបញ្ចប់បទល្មើស
កុំឲ្យកើតឡើងជាថ្មី និងធានារក្សាជនត្រូវចោទទុកជូនតុលាការចាត់ការតាមនីតិវិធី។
សូមបញ្ជាក់ថា កាលពីពេលកន្លងទៅ ក៏មានការផ្ទុះការតវ៉ាដល់ទីស្នាក់ការក្រុមហ៊ុន 7NG ផងដែរ ប៉ុន្តែឧកញ៉ា ស្រី សុធា បានចេញមុខសម្របសម្រួលដោយសន្យាថា នឹងប្រគល់ដីជូនអតិថិជនចាប់ពីថ្ងៃទី២៩ ខែមេសា ឆ្នាំ២០១៩ រហូតដល់ថ្ងៃទី៣០ ខែធ្នូ ឆ្នាំ២០១៩ ជាកំហិត ។
ប្រជាពលរដ្ឋ សាទរចំពោះការធានាអះអាងរបស់ឧកញ៉ា ស្រី សុធា តែកុំបានតែសន្យាខ្យល់ដូចរាល់ដងទៀត ។
ក្នុងលិខិតធានាអះអាង ចុះថ្ងៃទី២៩ ខែមេសា ឆ្នាំ២០១៩ នេះ ឧកញ៉ា ស្រី សុធា បានសន្យាចំនួន៨ចំណុចដល់អតិថិជន ដោយនៅចំណុចទី១ សរសេរថា”ក្រុមហ៊ុននឹងធ្វើការប្រគល់ដី ឬសំណងជូនអតិថិជន ឱ្យអស់រួចរាល់ចាប់ពីថ្ងៃជូនដំណឹងនេះ តទៅ រហូតដល់ថ្ងៃទី៣០ ខែធ្នូ ឆ្នាំ២០១៩ ជាកំហិត”។
ឧកញ៉ា ស្រី សុធា បន្តថា ក្នុងករណីដល់ថ្ងៃកំណត់ខាងលើ បើសិនជាក្រុមហ៊ុនមិនមានដីជូនអតិថិជននោះទេ ក្រុមហ៊ុននឹងធ្វើការទូទាត់ប្រាក់ថ្លៃទិញលក់ដីទៅតាមទីផ្សារដែលកំណត់ដោយក្រុមហ៊ុនវាយតម្លៃអចលនទ្រព្យ ។
ជាមួយគ្នានេះ នៅមានមួយសំណុំរឿងទៀត ដែល លោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ កំពុងចាត់ការបណ្តឹងព្រហ្មទណ្ឌមួយ ដែលប្តឹងឧកញ៉ា ស្រី សុធា និង ឧកញ៉ា ស្រី ចន្ធូ ពាក់ព័ន្ធបទល្មើសឆបោក ដោយទាមទារសំណងជំងឺចិត្តចំនួន១០ម៉ឺនដុល្លារ ពាក់ព័ន្ធដីនៅភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ។
បណ្តឹងព្រហ្មទណ្ឌនេះ បានប្តឹងចូលអយ្យការអមសាលាដំបូងរាជធានីភ្នំពេញ កាលពីថ្ងៃទី១១ ខែមេសា ឆ្នាំ២០១៨ ដែលរហូតមកទល់ពេលនេះ តុលាការពុំទាន់សម្រេចយ៉ាងណានៅឡើយទេ៕ដោយ៖បញ្ញាស័ក្តិ
