ខេត្តព្រះសីហនុ៖ មន្ត្រីអង្គការក្រៅរដ្ឋាភិបាល និងប្រជាពលរដ្ឋមួយចំនួន រស់នៅខេត្តព្រះសីហនុ បានសំណូមពរដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ឲ្យកោះអញ្ជើញ លោក ឡឹង សុភាព ប្រធានការិយាល័យគយ និងរដ្ឋាករទំនប់រលក ទៅសាកសួរជុំវិញករណីបទចោទប្រកាន់មានជាប់សង្ស័យឃុបឃិតបើកដៃឲ្យឈ្មួញ លួចនាំចូលទំនិញគេចពន្ធ តាមច្រកកំពង់ផែទំនប់រលក ឬផែ លោក សូ ជុងហ៊ួរ ជាថ្នូរទទួលបានសំណូកពុករលួយ។
បទសង្ស័យនេះ ទាំងមន្ត្រីសង្គមស៊ីវិល មន្ត្រីរាជការ និងប្រជាពលរដ្ឋមួយចំនួនរស់នៅខេត្តព្រះសីហនុ បានស្នើដល់ លោក ឱម យ៉ិនទៀង ឲ្យបញ្ជូនមន្ត្រីជំនាញចុះស៊ើបអង្កេតទៅលើសកម្មភាពការងារ ដែលលោក ឡឹង សុភាព ប្រធានការិយាល័យគយ និងរដ្ឋាករច្រកកំពង់ផែទំនប់រលក បានអនុវត្ត ជាពិសេសទាក់ទិនបទសង្ស័យថា បានឃិបឃិតបើកដៃឲ្យឈ្មួញ នាំចូលទំនិញគេចពន្ធខុសច្បាប់ជាបន្តបន្ទាប់មកនេះ។
មន្ត្រីរាជការថ្នាក់ទាប និងកម្មករមួយចំនួនធ្វើការនៅកំពង់ផែទំនប់រលក មានទីតាំងក្នុងសង្កាត់១ ក្រុង-ខេត្តព្រះសីហនុ បានប្រាប់អ្នកយកព័ត៌មាន CEN.COM.KH ប្រចាំខេត្តព្រះសីហនុ ដោយចោទថា កំពង់ផែឯកជនទំនប់រលក ឬកំពង់ផែ លោក សូ ជុងហ៊ួរ គឺជាកំពង់ផែដ៏ពេញនិយមមួយ សម្រាប់នាំចូលទំនិញគេចពន្ធ រួមមាន៖ សម្ភារៈប្រើប្រាស់ក្នុងការិយាល័យ ឬសាលារៀន ម៉ូតូសេរីទំនើបៗ សំភារៈសំណង់ ភេសជ្ជៈកំប៉ុង ដប ស្រាបៀ គ្រឿងសំអាង គ្រឿងអេឡិចត្រូនិច ទូរស័ព្ទដៃសេរីទំនើបៗ និងកុំព្យួទ័រយួរដៃជាដើម ត្រូវសង្ស័យថា បានបន្តនាំចូលគេចពន្ធ ដោយបាននាំចូលរដ្ឋតាមច្រកកំពង់ផែទំនប់រលក ឬ ផែ លោក សូ ជុងហ៊ួរ។
ប្រភពស្នើមិនបញ្ចេញឈ្មោះ បានអះអាងថា លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ឬ ផែ លោក សូ ជុងហ៊ួរ ទំនងជាអាចមានជាប់ពាក់ព័ន្ធអំពើពុករលួយ ពីការអនុញ្ញាតិឲ្យឈ្មួញ នាំចូលទំនិញគេចពន្ធនាំចូលតាមច្រកកំពង់ផែនេះ។ កំពង់ផែនេះកន្លងមក ឃើញមានរថយន្តដឹកទំនិញភាគច្រើន ចេញពីកំពង់ផែនេះ មិនត្រូវបានមន្ត្រីប្រចាំការនៅផែទំនប់រលក មានការត្រួតពិនិត្យឲ្យបានត្រឹមត្រូវទេ។
សកម្មភាពនាំចូលទំនិញគេចពន្ធ តាមច្រកកំពង់ផែទំនប់រលក ខេត្តព្រះសីហនុនេះ ប្រភពមួយចំនួន បានអះអាងថា ក៏មានជាប់ពាក់ព័ន្ធមន្ត្រីមានតួនាទីខ្ពស់ក្នុងស្ថាប័ន ឬអង្គភាពកងកម្លាំងប្រដាប់អាវុធខ្លះ នាខេត្តព្រះសីហនុ ជាអ្នកកាងការពារឲ្យឈ្មួញនាំចូលទំនិញគេចពន្ធ ដោយត្រូវដងត្រូវផ្លែគ្នាជាមួយ លោក ឡឹង សុភាព ប្រធានការិយាល័យគយ និងរដ្ឋាករទំនប់រលក ជាថ្នូរចែកផលប្រយោជន៍ឲ្យគ្នាទៅវិញទៅមក។
សមត្ថកិច្ចកងរាជអាវុធហត្ថខេត្តព្រះសីហនុ ស្នើមិនបញ្ចេញឈ្មោះ បានឲ្យដឹងថា កន្លងមកផែទំនប់រលកនេះ មន្ត្រីគយចល័ត បានសហការជាមួយសមត្ថកិច្ចស្ថាប័នកងរាជអាវុធហត្ថខេត្តនេះ បានឆ្មក់ចាប់បានទំនិញនាំចូលគេចពន្ធជាច្រើនប្រភេទ រួមមាន៖ គ្រឿងអេឡិចត្រូនិច មានទូរស័ព្ទៃដៃសេរីទំនើបៗ អាយផេត និងសម្ភារៈប្រើប្រាស់ច្រើនប្រភេទទៀត ត្រូវឈ្មួញលួចនាំចូលតាមច្រកកំពង់ផែទំនប់រលកនេះ។
ផ្តើមពីបញ្ហានេះ ទាំងមន្ត្រីឃ្លាំមើលសង្គម និងប្រជាពលរដ្ឋខេត្តព្រះសីហនុ បានសង្ស័យថា ទំនិញគេចពន្ធទំនងជានៅតែបន្ត លួចនាំចូលតាមច្រកកំពង់ផែទំនបប់រលក ឬផែ សូ ជុងហ៊ួរ បន្តកើតមានជាបន្តបន្ទាប់ ដែលអាចនាំឲ្យបាត់បង់ចំណូលថវិកាជាតិធ្ងន់ធ្ងរ បើស្ថាប័នជំនាញថ្នាក់ជាតិមិនមានវិធានការទប់ស្កាត់ ឬចុះអង្កេតឲ្យបានត្រឹមត្រូវទេ។
បញ្ហានេះ សាធារណៈជនចោទថា បទល្មើសនេះ មន្ត្រីការិយាល័យគយ និងរដ្ឋាករទំនប់រលក ព្រមទាំងសមត្ថកិច្ចស្ថាប័នពាក់ព័ន្ធ ដែលប្រចាំការកំពង់ផែនេះ មិនបានត្រួតពិនិត្យទំនិញនាំចូលទាំងនោះ ឲ្យបានត្រឹមត្រូវទេ ដោយឃើញពេលខ្លះ មានទំនិញដឹកតាមរថយន្តសណ្តោងធំៗ ឬរថយន្តកុងទឺន័រខ្លះ ដឹកចេញពីកំបង់ផែនេះ មិនមានសមត្ថកិច្ចត្រួតពិនិត្យតែម្តង។
ប្រភពកម្មករ និងពលរដ្ឋ មានផ្ទះនៅជិតផែទំនប់រលក បានអះអាងថា ស្ទើជារៀងរាល់ថ្ងៃ ឃើញមានទំនិញ ដឹកតាមរថយន្តសណ្តោងធំៗ បិទបាំងជិត មិនត្រូវបានមន្ត្រីការិយាល័យគយទំនប់រលក និងសមត្ថកិច្ចប្រចាំការ នៅច្រកកំពង់ផែនេះ ត្រួតពិនិត្យទេ។
ករណីនេះ ទំនងជាទាំងឈ្មួញនាំចូលទំនិញ និង លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ត្រូវដងត្រូវផ្លែ ហើយចែកផលប្រយោជន៍ឲ្យគ្នាទៅវិញទៅមក ទើបរថយន្តសណ្តោងដឹកទំនិញមួយចំនួន ដែលដឹកនាំទំនិញចេញតាមច្រកផែទំនប់រលកគ្មានការត្រួតពិនិត្យឲ្យបានត្រឹមត្រូវនាកន្លងមក។
បញ្ហានេះ ទាំងមន្ត្រីអង្គការសង្គមស៊ីវិល និងប្រជាពលរដ្ឋ បានទទូចដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ត្រូវកោះអញ្ជើញ លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ដែលសង្ស័យថា បានឃុបឃិតជាមួយឈ្មួញ លួចនាំចូលទំនិញគេចពន្ធ តាមច្រកកំពង់ផែទំនប់រលក ឲ្យបានឆាប់ ដើម្បីទប់ស្កាត់អំពើពុករលួយ ដែលនាំឲ្យខាតបង់ចំណូលថវិកាជាតិនាថ្ងៃអនាគត។
អំពើពុករលួយនេះ ក្រុមអង្គការសង្គមស៊ីវិលមួយចំនួន នាខេត្តព្រះសីហនុ រួមមាន៖ សមាគមអាដហុក និងអង្គការលីកាដូជាដើម ក៏ស្នើដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ និង លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ឲ្យជួយបញ្ជូនមន្ត្រីចុះស៊ើបអង្កេត សកម្មភាពការងារ របស់ លោក ឡឹង សុភាព ប្រធានការិយាល័យគយ និងរដ្ឋាករទំនប់រលក ដែលសាធារណៈជនសង្ស័យថា បានឃុបឃិតជាមួយឈ្មួញ លួចនាំចូលទំនិញគេចពន្ធ តាមច្រកកំពង់ផែទំនប់រលក ដើម្បីបានដឹងការពិតឲ្យបានឆាប់។
ត្រង់ចំណុចនេះ លោកស្រី ជៀប សុធារី អ្នកសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ បានផ្តល់សម្ភាសឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុថា លោកស្រីធ្លាប់បានទទួលព័ត៌មាន ជុំវិញសកម្មភាព នៃការនាំចូលទំនិញគេចពន្ធមួយចំនួន ត្រូវឈ្មួញឃុបឃិតជាមួយមន្ត្រីការិយាល័យគយ និងរដ្ឋាករទំនប់រលក ព្រមទាំងមន្ត្រីស្ថាប័នខ្លះទៀត ដែលប្រចាំការនៅច្រកកំពង់ផែទំនប់រលក ឬផែសូ ជុងហ៊ួរ និងកំពង់ផែឯកជនមួយចំនួនទៀតនៅស្រុកស្ទឹងហាវជាដើម។
ករណីសង្ស័យពីការឃុបឃិតនាំចូលទំនិញគេចពន្ធ តាមច្រកកំពង់ផែទំនប់រលក នាខេត្តព្រះសីហនុ ដែលត្រូវបានសាធារណៈជន បានចោទប្រកាន់ជាបន្តបន្ទាប់មកនេះ លោកស្រី សុធារី បានសំណូមពរដល់ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ត្រូវកោះអញ្ជើញ លោក ឡឹង សុភាព ប្រធានការិយាល័យគយ និងរដ្ឋាករទំនប់រលក ព្រមទាំងមន្ត្រីស្ថាប័នពាក់ព័ន្ធមួយចំនួនទៀត ដែលប្រចាំការនៅច្រកកំពង់ទំនប់រលក ទៅសាកសួរនៅអង្គភាពប្រឆាំងអំពើពុករលួយ ឲ្យបានឆាប់ តាមដែលអាចអនុវត្តទៅបាន។
អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋមួយចំនួននាខេត្តព្រះសីហនុ ថ្លែងថា ពួកគេកំពុងរង់ចាំមើលចំណាត់ការ របស់ថ្នាក់ដឹកនាំអង្គភាពប្រឆាំងអំពើពុករលួយ មានចំណាត់ការទៅលើករណីបទសង្ស័យ ដែល លោក ឡឹង សុភាព ប្រធានការិយាល័យគយ និងរដ្ឋាករខេត្តព្រះសីហនុ មានប្រសិទ្ធភាពត្រឹមកំរិតណា ដើម្បីផ្តល់យុត្តិធ៌មជូនភាគីពាក់ព័ន្ធ ដែលត្រូវសាធារណៈជនចោទប្រកាន់នាពេលកន្លងទៅ។
ជាងនេះ ប្រសិនបើ អង្គភាពប្រឆាំងអំពើពុករលួយ បានរកឃើញកំហុសឆ្គង ថាពិតជាមានមន្ត្រីគយ និងសមត្ថកិច្ចពាក់ព័ន្ធស្ថាប័នខ្លះ ពិតជាបានឃុបឃិតជាមួយឈ្មួញអនុញ្ញាត ឲ្យនាំចូលទំនិញគេចពន្ធខុសច្បាប់ តាមច្រកកំពង់ផែទំនប់រលក ជាថ្នូរទទួលបានសំណូកពុករលួយដូចការចោទប្រកាន់មែន។ ទាំងមន្ត្រីអង្គការក្រៅរដ្ឋាភិបាល និងពលរដ្ឋខេត្តព្រះសីហនុ សំណូមពរដល់អង្គភាពប្រឆាំងអំពើពុករលួយ ត្រូវកសាងសំណុំរឿង បញ្ជូនបុគ្គល ដែលជាប់ពាក់ព័ន្ធបទល្មើសឃុបឃិត នាំចូលទំនិញគេចពន្ធតាមច្រកកំពង់ផែទំបន់រលក បញ្ជូនទៅកាន់តុលាការផ្តន្ទាទោសឲ្យបានធ្ងន់ធ្ងរ ដើម្បីជាការព្រមាន។
ទោះជាបែបនេះក្តី លោកស្រី ជៀប សុធារី មន្ត្រីសមាគមអាដហុក ប្រចាំខេត្តព្រះសីហនុ បានទទួលស្គាល់ថា កន្លងទៅនេះ បានឃើញសកម្មភាពការងារ របស់មន្ត្រីសាខាគយ និងរដ្ឋាករខេត្តព្រះសីហនុ បានសហការជាមួយកម្លាំងនគរបាល និងកងរាជអាវុធហត្ថខេត្តនេះ ចុះបង្ក្រាប និងត្រួតពិនិត្យទំនិញនាំចូលដោយមិនបង់ពន្ធជូនរដ្ឋបានជាច្រើនករណី។ ក្នុងនោះក៏ធ្លាប់បាន រកឃើញម៉ូតូសេរីទំនើបៗ និងសម្ភារៈប្រើប្រាស់មួយចំនួន ត្រូវឈ្មួញបាននាំចូល និងដាក់លក់នៅតាមហាងមួយចំនួន នាខេត្តព្រះសីហនុ ដោយមិនបានបង់ពន្ធនាំចូល ហើយត្រូវមន្ត្រីគយចល័ត ចាប់ផាកពិន័យឲ្យបង់ពន្ធជូនរដ្ឋ បានជាច្រើនករណី។
អ្នកយកព័ត៌មាន CEN.COM.KH ប្រចាំខេត្តព្រះសីហនុ មិនទាន់អាចទាក់ទង លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ឬហៅថា ផែសូ ជុងហ៊ួរ ដើម្បីបំភ្លឺលើករណីបទចោទ ថាបានឃុបឃិតជាមួយឈ្មួញ លួចនាំចូលទំនិញគេចពន្ធអនាធិបតេយ្យ តាមច្រកកំពង់ផែទំនប់រលក បាននៅឡើយទេ។
យ៉ាងណាក៏ដោយចុះ អ្នកឃ្លាំមើលផែនការអភិវឌ្ឍសង្គម និងសាធារណៈជន បានសំណូមពរដល់ លោក ឱ យ៉ិនទៀង ប្រធានអង្គភាពប្រឆាំងអំពើពុករលួយ ត្រូវកោះហៅ លោក ឡឹង សុភាព ប្រធានការិយាល័យគយ និងរដ្ឋាករទំនប់រលក ខេត្តព្រះសីហនុ ដែលជាប់សង្ស័យថា បានឃុបឃិតបើកដៃឲ្យឈ្មួញនាំចូលទំនិញគេចពន្ធ តាមច្រកកំពង់ផែទំនប់រលក ជាថ្នូរទទួលបានសំណូកពុករលួយ ឲ្យបានឆាប់ ដើម្បីរកឲ្យឃើញការពិត ឈានទៅទប់ស្កាត់បទល្មើសនាំចូលទំនិញគេចពន្ធ នាំឲ្យបាត់បង់ចំណូលថិវកាជាតិនាថ្ងៃអនាគត៕ ដែន សីមា