(ទីក្រុងប៉ារីស)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ឌី វិជ្ជា អគ្គស្នងការរង នៃអគ្គស្នងការដ្ឋាននគរបាលជាតិ និងជាកូនប្រុសនៃសពលោក ហុក ឡងឌី បានដាក់ពាក្យប្តឹងលោក សម រង្ស៉ី អតីតមេដឹកនាំបក្សប្រឆាំងនៅកម្ពុជាពីបទ បរិហារកេរ្តិ៍ជាសាធារណៈចំពោះបុគ្គល ទៅកាន់តុលាការ ទីក្រុងប៉ារីស ប្រទេសបារាំង នៅថ្ងៃទី២០ ខែសីហា ឆ្នាំ២០១៩។
បើយោងតាមសេចក្តីប្រកាសព័ត៌មានរបស់មេធាវីជនជាតិបារាំង ការពារក្តីឲ្យសម្តេចតេជោ ហ៊ុន សែន និងលោក ឌី វិជ្ជា នៅថ្ងៃទី២០សីហានេះ។
ការដាក់ពាក្យប្តឹងចំនួន២ ដាច់ដោយឡែកពីគ្នាទៅកាន់តុលាការបារាំង សម្តេចតេជោ ហ៊ុន សែ ន នាយករដ្ឋមន្ត្រីនៃកម្ពុជា និងលោក ឌី វិជ្ជា បានពឹងពាក់ប្រើប្រាស់មេធាវី ជនជាតិបារាំង ចំនួន៣រូបដែលសុទ្ធសឹងតែជាមេធាវីល្បីៗប្រចាំនៅប្រទេសបារាំង ទី១៖ លោកមេធាវី Brosselet, ទី២៖ លោកមេធាវី Doyez និងទី៣៖ លោកមេធាវី Leick។
ការសម្រេចដាក់ពាក្យបណ្តឹងពីសំណាក់សម្តេចតេជោនាយករដ្ឋមន្ត្រីនៃកម្ពុជា ទៅកាន់តុលាការប្រទេសបារាំង ធ្វើឡើងបន្ទាប់ពីលោក សម រង្ស៉ី បានអះអាងដោយ មួលបង្កាច់ថា៖ (១) សម្តេចតេជោ បានសម្លាប់ ឬជាមេក្លោងឲ្យគេសម្លាប់ឯកឧត្តម ហុក ឡងឌី (២) សម្តេចតេជោ បានបញ្ជាឲ្យសម្លាប់លោក ជា វិជ្ជា និងចុងក្រោយ (៣) សម្តេចតេជោ បានភូតកុហកអំពីមូលហេតុនៃការស្លាប់របស់លោក ហុក ឡងឌី ដោយកុហកថា ឧទ្ធម្ភាគចក្រដែលក្នុងនោះលោកហុក ឡងឌី បានទទួលមរណភាព គឺត្រូវរន្ទៈបាញ់ ខណៈដែលបុគ្គល សម រង្ស៉ី អះអាងថា ឧទ្ធម្ភាគចក្រនេះត្រូវបានផ្ទុះដោយគ្រាប់បែកដែលបានដាក់បង្កប់នៅក្នុងនោះ នៅក្នុងសេចក្តីប្រកាសព័ត៌មានរបស់មេធាវីបារាំង ដែលការពារក្តីជូនសម្តេចតេជោ ហ៊ុន សែន បានរៀបរាប់បញ្ជាក់ថា សម្តេចតេជោ ហ៊ុន សែន បានដាក់ពាក្យប្តឹងបុគ្គល សម រង្ស៉ី ចំពោះសារដែលបុគ្គលនេះបានដាក់ផ្សាយនៅក្នុង ទំព័រហ្វេសប៊ុករបស់ខ្លួន និងសំដីដែលបុគ្គលនេះបាន និយាយ នៅក្នុងកិច្ចសម្ភាសន៍ជាមួយវិទ្យុសម្លេងសហរដ្ឋអាមេរិកភាសាខ្មែរ (VOA) ដែលនៅក្នុងនោះបុគ្គល សម រង្ស៉ី បានធ្វើការចោទប្រកាន់យ៉ាងឆ្កួតលីលា និងធ្ងន់ធ្ងរចំពោះសម្តេចតេជោ ហ៊ុន សែន។ បុគ្គល សម រង្ស៉ី បានអះអាងដោយមួលបង្កាច់ថា៖ (១) សម្តេចតេជោ បានសម្លាប់ ឬជាមេក្លោងឲ្យគេសម្លាប់ឯកឧត្តម ហុក ឡងឌី (២) សម្តេចតេជោ បានបញ្ជាឲ្យសម្លាប់លោក ជា វិជ្ជា និងចុងក្រោយ (៣) សម្តេចតេជោ បានភូតកុហកអំពីមូលហេតុនៃការស្លាប់របស់ឯកឧត្តម ហុក ឡងឌី ដោយកុហកថា ឧទ្ធម្ភាគចក្រដែលក្នុងនោះលោកហុក ឡងឌី បានទទួលមរណភាព គឺត្រូវរន្ទៈបាញ់ ខណៈដែលបុគ្គល សម រង្ស៉ី អះអាងថា ឧទ្ធម្ភាគចក្រនេះត្រូវបានផ្ទុះដោយគ្រាប់បែកដែលបានដាក់បង្កប់នៅក្នុងនោះ។ ទាំងនេះជាការចោទប្រកាន់ បែបបរិហារកេរ្តិ៍ ដែលត្រូវបានផ្សព្វផ្សាយនៅក្នុងទំព័រ ហ្វេសប៊ុករបស់បុគ្គល សម រង្ស៉ី។
ចំណែកការដាក់ពាក្យបណ្តឹងរបស់លោក ឌី វិជ្ជា កូនប្រុសនៃសពលោក ហុក ឡងឌី និងជាកូនប្រសាររបស់សម្តេចតេជោ ហ៊ុន សែន ទៅកាន់តុលាការ ប្រទេសបារាំង ធ្វើឡើងបន្ទាប់ពីលោក សម រង្ស៉ី បានអះអាងចោទប្រកាន់លោក ឌី វិជ្ជា ដោយបំពាន និងខុសស្រឡះថា លោក ឌី វិជ្ជា បានជឿជាក់ថា ឪពុករបស់គាត់ត្រូវបាន សម្តេចតេជោ ហ៊ុន សែន សម្លាប់ ហើយបុគ្គល សម រង្ស៉ី អះអាងមួលបង្កាច់លោក ឌី វិជ្ជា មានចេតនា សងសឹក ចំពោះការសម្លាប់ឪពុករបស់ខ្លួន ហើយអះអាងទៀតថា លោក ឌី វិជ្ជា នឹងរៀបចំផែនការសងសឹក ដោយរួមដៃជាមួយមន្ត្រីក្រសួងមហាផ្ទៃដែលកំពុងកាន់តំណែង។
សេចក្តីប្រកាសព័ត៌មានរបស់មេធាវីបារាំងការពារក្តីជូនលោក ឌី វិជ្ជា បានរៀបរាប់បញ្ជាក់ថា លោកឌី វិជ្ជា បានប្តឹងបុគ្គល សម រង្សី ចំពោះសារមួយដែលបុគ្គលនេះបានដាក់ផ្សាយនៅក្នុងទំព័រហ្វេសប៊ុករបស់ខ្លួន។ បុគ្គល សម រង្ស៊ី បានចោទប្រកាន់ លោក ឌី វិជ្ជា ដោយបំពាននិងដោយខុសស្រឡះថា លោកឌី វិជ្ជា បានជឿជាក់ថាឪពុករបស់គាត់ត្រូវបានសម្តេចតេជោ ហ៊ុន សែន សម្លាប់។ លោកសម រង្សី បានអះអាងដោយមួលបង្កាច់ថា លោកឌី វិជ្ជា មានចេតនា សងសឹក ចំពោះការសម្លាប់ឪពុករបស់ខ្លួនហើយ ដើម្បីសម្រេចកិច្ចការនេះ លោកឌី វិជ្ជា ត្រូវរៀបចំផែនការសងសឹកនេះ ដោយរួមដៃជាមួយរដ្ឋមន្ត្រីក្រសួងមហាផ្ទៃដែលកំពុងកាន់តំណែង។ លោកឌី វិជ្ជា មិនអាចទទួលយកការទម្លាក់កំហុស បែបបរិហារកេរ្តិ៍នេះបានទេ។ បើតាមការពិនិត្យទៅលើពាក្យពេជន៍ដែលបុគ្គលសម រង្ស៊ី បានប្រើ ពាក្យ សងសឹក និង ផែនការ គឺជាការចោទប្រកាន់ថា
លោកពិតជាមានបំណងធ្វើសកម្មភាពដោយខុសច្បាប់ ដើម្បីសងសឹកចំពោះឧក្រិដ្ឋកម្មលើឪពុករបស់ខ្លួន។ ការនិយាយចោទប្រកាន់ដោយបុគ្គលសមរង្ស៊ីនេះ បានប៉ះពាល់យ៉ាងធ្ងន់ធ្ងរបំផុតចំពោះកិត្តិយសនិង កិត្តិស័ព្ទរបស់លោក ឌី វិជ្ជា តម្រូវឲ្យឯកឧត្តម ដាក់ពាក្យបណ្តឹងទៅតុលាការ។
ពាក់ព័ន្ធនឹងទណ្ឌិត សម រង្ស៊ី បង្ហោះសារលាបពណ៌ បំភ្លៃការពិត អំពីរឿងមរណភាពរបស់ លោក ហុក ឡង់ឌី នេះដែរ, កាលពីថ្ងៃទី០២ ខែកក្កដា ឆ្នាំ២០១៩ ក្រុមមេធាវីសម្តេចក្រឡាហោម ស ខេង ចំនួន៣រូប បានដាក់ពាក្យបណ្តឹងមួយទៅកាន់សាលាដំបូងរាជធានីភ្នំពេញ ដើម្បីប្តឹងទណ្ឌិត សម រង្ស៊ី មេក្រុមប្រឆាំងជ្រុលនិយមនៅក្រៅប្រទេស អំពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍។
ក្នុងពាក្យបណ្តឹងនេះ សម្តេចក្រឡាហោម ស ខេង បានទាមទារឱ្យតុលាការ ចាត់ការលោកសម រង្ស៊ី ទៅតាមផ្លូវច្បាប់ឱ្យបានធ្ងន់ធ្ងរបំផុត និងទាមទារសំណងជំងឺ ចិត្តចំនួន៤ពាន់លានរៀល ចំពោះការញុះញង់របស់ លោក សម រង្ស៊ី។
កាលពីថ្ងៃទី០៨ ខែកក្កដា ឆ្នាំ២០១៩កន្លងទៅ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថា ការដាក់ពាក្យប្តឹង លោក សម រង្ស៊ី ទៅតុលាការនាថ្មីៗនេះ ៕ ដោយ៖កូឡាប
