ភ្នំពេញ ៖ ក្នុងឱកាសដែលសម្ដេចតេជោ ហ៊ុន សែន ជួបពិភាក្សាការងារជាមួយ រដ្ឋមន្ត្រីការបរទេសនៃប្រទេសវៀតណាម សម្ដេច បានស្នើឱ្យថ្នាក់ដឹកនាំវៀតណាម រៀបចំវេទិកាធុរកិច្ចកម្ពុជា-វៀតណាម នៅពេលដែល ដំណើរទស្សនកិច្ចរបស់សម្ដេច ទៅកាន់ប្រទេសវៀតណាម ដើម្បីជាឱកាសនៃការកៀរគរអ្នកវិនិយោគវៀតណាម មកវិនិយោគនៅក្នុងប្រទេសកម្ពុជា។
នៅវិមានសន្តិភាព នារសៀលថ្ងៃទី២០ ខែសីហា ឆ្នាំ២០១៩នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយ លោក Binh Minh ឧបនាយករដ្ឋមន្ត្រី និងជារដ្ឋមន្ត្រី ក្រសួងការបរទេស នៃប្រទេសវៀតណាម។
នៅក្នុងជំនួបនោះ លោក Binh Minh បានថ្លែងពីដំណើរអញ្ជើញរបស់លោក មកកាន់ប្រទេសកម្ពុជានាពេលនេះ គឺដើម្បីចូលរួមក្នុងកិច្ចប្រជុំគណៈកម្មការចម្រុះរវាងកម្ពុជា និងវៀតណាមលើកទី១៧ ដែលរៀបចំឡើងដោយក្រសួងការបរទេស និងសហប្រតិបត្តិការអន្តរជាតិ ដែលនឹងប្រព្រឹត្តទៅនៅថ្ងៃទី២១ សីហាខាងមុខនេះ ហើយកិច្ចប្រជុំនេះ នឹងដឹកនាំរួមគ្នារវាងឧបនាយករដ្ឋមន្ត្រីរដ្ឋមន្ត្រីក្រសួងការបទេសនៃប្រទេសទាំងពីរ គឺលោក ប្រាក់ សុខុន និងឯកឧត្តម Binh Minh។
ក្នុងជំនួបរសៀលមួយនេះ គឺមានការផ្លាស់ប្ដូរមតិមួយចំនួន ជាពិសេសសម្ដេចតេជោ ហ៊ុន សែន បានផ្ដល់អនុសាសន៍មួយចំនួន ដើម្បីធ្វើយ៉ាងណា ឲ្យកិច្ចប្រជុំគណៈកម្មការចម្រុះនៅថ្ងៃទី២១សីហានេះ ប្រព្រឹត្តទៅដោយជោគជ័យ និងមានខ្លឹមសារ។ ដោយឈរលើគោលការណ៍ នៃកិច្ចសហប្រតិបត្តិការរវាងប្រទេសយើងទាំងពីរផង និងការរីកចម្រើននៃកិច្ចសហប្រតិបត្តិការវាងប្រទេសយើងទាំងពីរដែលមានពីមុនកន្លងមកនេះផង។
ក្នុងជំនួបនេះ អ្វីដែលសំខាន់ ៖ ទី១)ផ្តោតទៅលើការត្រៀមរៀបចំ នូវទស្សនកិច្ចផ្លូវការរបស់ សម្ដេចតេជោនាយករដ្ឋមន្ត្រីទៅកាន់ប្រទេសវៀតណាម អំឡុងខែកញ្ញាឆ្នាំ២០១៩ខាងមុខនេះ ។ ទី២)ធ្វើយ៉ាងណាគណៈកម្មការចម្រុះនេះ នឹងពិភាក្សាការងារជម្រុញ នូវកិច្ចសហប្រតិបត្តិការ និងពង្រឹងទំនាក់ទំនងទ្វេភាគី គ្រប់វិស័យជាពិសេសការត្រៀម នៃការចុះហត្ថលេខាទៅលើ កិច្ចព្រមព្រៀងលើការងារព្រំដែន រវាងប្រទេសទាំងពីរ ដោយសារបច្ចុប្បន្ននេះ កិច្ចការងារព្រំដែននេះ គឺបានបញ្ចប់ប្រមាណជា៨៤%ហើយ សល់ប្រមាណជា១៦% ភាគរយទៀតទេ ដែលគណៈកម្មការព្រំដែន នៃប្រទេសទាំងពីរនឹង បន្តធ្វើកិច្ចការងារនេះជាបន្តទៀត។
ថ្នាក់ដឹកនាំនៃប្រទេសទាំងពីរ នឹងបន្តជំរុញការងារនេះ ជាពិសេសលើកិច្ចសហប្រតិបត្តិការ លើវិស័យសេដ្ឋកិច្ច ពាណិជ្ជកម្ម និងវិនិយោគផងដែរ។
សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានស្នើឱ្យថ្នាក់ដឹកនាំវៀតណាម រៀបចំវេទិកាធុរកិច្ចកម្ពុជា-វៀតណាម នៅពេលដែលដំណើរទស្សនកិច្ចរបស់សម្ដេច ទៅកាន់ប្រទេសវៀតណាមអំឡុង ខែកញ្ញាខាងមុខនេះ ដើម្បីជាឱកាសនៃការកៀរគរ អ្នកវិនិយោគវៀតណាម មកវិនិយោគនៅក្នុងប្រទេសកម្ពុជា។ សម្ដេចតេជោនាយករដ្ឋមន្ត្រី ក៏បានមានប្រសាសន៍អំពីការជំរុញទំហំពាណិជ្ជកម្មនៃប្រទេសទាំងពីរឲ្យមានការកើនឡើងថែមទៀតផងដែរ។
ក្នុងជំនួបនោះ លោកឧបនាយករដ្ឋមន្ត្រី រដ្ឋមន្ត្រីការបរទេស នៃប្រទេសវៀតណាម ក៏បានមើលឃើញសមិទ្ធផល ក៏ដូចជាការរីកចម្រើនរបស់ប្រទេសកម្ពុជា ក្រោមការដឹកនាំរបស់សម្ដេចតេជោ ជានាយករដ្ឋមន្ត្រី ជាពិសេសវិស័យសេដ្ឋកិច្ច និងការរីកដុះដាលនៃវិស័យសំណង់ ដែលមានការរីកលូតលាស់យ៉ាងឆាប់រហ័សនេះ។ លើសពីនេះទៅទៀត លោកក៏បានជូនពរឱ្យដំណើរទស្សនកិច្ច របស់សម្ដេចតេជោ ទៅកាន់ប្រទេសវៀតណាមខាងមុខ ទទួលបាននូវភាពជោគជ័យ ហើយលោក នឹងធ្វើការងារនោះផ្ទាល់ ជាមួយនឹងលោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា ដើម្បីធ្វើយ៉ាងណា ឲ្យដំណើរទស្សនកិច្ចការងាររបស់ សម្ដេចតេជោ ទទួលបាននូវភាពជោគជ័យផងដែរ៕ ដោយ៖កូឡាប
