ភ្នំពេញ ៖ សម្តេចតេជោ នាយករដ្ឋមន្រ្តី សូមអំពាវនាវដល់ស្ថាប័នជាតិ អន្តរជាតិ សហគមន៍ និងពលរដ្ឋគ្រប់រូប សូមយកចិត្តទុកដាក់ខ្ពស់ជាបន្តទៀតដល់ការងារអក្ខរកម្ម ចំនួន៨ចំណុច ក៏ដូចជា ការងារអប់រំទាំងនៅក្នុងប្រព័ន្ធនិងក្រៅប្រព័ន្ធ។ ក្នុងស្មារតីនេះ ដើម្បីបន្តចូលរួមលើកកម្ពស់ការងារអក្ខរកម្មនៅកម្ពុជា ឱ្យកាន់តែមានប្រសិទ្ធភាពថែមទៀតដូចជា
ក្រសួងស្ថាប័នពាក់ព័ន្ធត្រូវរៀបចំគោលនយោបាយ ក្របខ័ណ្ឌច្បាប់ លិខិតបទដ្ឋាន និងយន្តការចាំបាច់ ដើម្បីដឹកនាំ គ្រប់គ្រង និងអនុវត្តន៍ឱ្យមានប្រសិទ្ធភាពនិងគុណភាព ដោយធានាបាននូវលទ្ធផល
ទទួលយកបានក្នុងការផ្តល់ការសិក្សាពេញមួយជីវិត សម្រាប់ប្រជាពលរដ្ឋគ្រប់រូប និងស្របទៅនឹង
បរិការណ៍ថ្មីនៃគោលដៅអភិវឌ្ឍប្រកបដោយចីរភាព។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារលិខិតផ្ញើជូនបងប្អូនជនរួមជាតិ ក្នុងឱកាសទិវាអក្ខរកម្មជាតិ ៨ កញ្ញា ២០១៩។ សម្តេចតេជោ ហ៊ុន សែន សម្តែងនូវក្តីសោមនស្សរីករាយយ៉ាងក្រៃលែង និងសូមចូលរួមប្រកបដោយភាពស្និទ្ធស្នាល ជាមួយបងប្អូនជនរួមជាតិ ស្របពេលប្រជាជនកម្ពុជា នៅទូទាំងប្រទេសកំពុងរស់ នៅក្នុងបរិយាកាសនៃសុខសន្តិភាព និងការអភិវឌ្ឍ បន្ទាប់ពីរាជរដ្ឋាភិបាលនីតិកាលទី៦ នៃរដ្ឋសភា ទទួលបាននូវការទុកចិត្តនិងគាំទ្រ ពីប្រជាពលរដ្ឋឱ្យបន្តបេសកកម្មដ៏ឧត្តុង្គឧត្តម ជាប្រវត្តិសាស្រ្តរបស់ខ្លួន ជាមួយនឹងការប្តេជ្ញាចិត្តយ៉ាងមុតមាំឥតរាថយ និងកាន់តែស្វាហាប់ជាងពេលណាៗទាំងអស់ ក្នុងការបម្រើប្រជាពលរដ្ឋ ក៏ដូចជាការពន្លឿនកិច្ចអភិវឌ្ឍ និងជំរុញអនុវត្តន៍កំណែទម្រង់កាន់តែស៊ីជម្រៅ និងទូលំទូលាយលើគ្រប់វិស័យ ឆ្ពោះទៅរកការកសាងអនាគតដ៏រុងរឿងមួយ ស្របតាមឆន្ទៈនិងបំណងប្រាថ្នាដ៏ពិសិដ្ឋរបស់ប្រជាជននៅ ទូទាំងព្រះរាជាណាចក្រកម្ពុជា។
សារលិខិតរបស់សម្តេចតេជោ ហ៊ុន សែន ទាំងស្រុង៖ ជូនជនរួមជាតិ សម្តេច ឯកឧត្តម លោកជំទាវ លោក លោកស្រី លោកគ្រូ អ្នកគ្រូ បុគ្គលិកអប់រំព្រមទាំងក្មួយៗសិស្សានុសិស្សជាទីស្រឡាញ់ អំពីបុព្វហេតុដែលកម្ពុជាត្រូវយកចិត្តទុកដាក់លើការអភិវឌ្ឍធនធានមនុស្ស ដោយសាររាជរដ្ឋាភិបាលកម្ពុជារប្តេជ្ញាជំរុញការលើកកម្ពស់ និងការកែលម្អជីវភាពរស់នៅរបស់ប្រជាពលរដ្ឋតាមរយៈការផ្តល់ជូន ដល់ស្រទាប់យុវជន នូវការបណ្តុះបណ្តាលជំនាញវិជ្ជាជីវៈ ប្រកបដោយគុណភាព
ព្រមជាមួយនឹងឱកាសទទួលបានការងារធ្វើ ការជួយកសិករក្នុងការអភិវឌ្ឍផលិតកម្មនិងការរកទីផ្សារលក់កសិផល។
កន្លងមកក៏ដូចជាក្នុងពេលបច្ចុប្បន្ន ក្រសួងអប់រំ យុវជន និងកីឡា បាននិងកំពុងបន្តសហការជាមួយ
ក្រសួងស្ថាប័នពាក់ព័ន្ធនិងដៃគូអភិវឌ្ឍ ដោយផ្តោតការយកចិត្តទុកដាក់ជាសំខាន់លើការអនុវត្តយុទ្ធសាស្ត្រ
កំណែទម្រង់វិស័យអប់រំ យុវជន និងកីឡា ដើម្បីចូលរួមអនុវត្តន៍យុទ្ធសាស្ត្រចតុកោណដំណាក់កាលទី៤របស់
រាជរដ្ឋាភិបាលកម្ពុជានីតិកាលទី៦ នៃរដ្ឋសភា។ ជាក់ស្តែង ក្រសួងអប់រំ យុវជន និងកីឡា បានសហការជាមួយ
ក្រសួងមហាផ្ទៃបើកថ្នាក់អក្ខរកម្មនៅតាមមណ្ឌលអប់រំកែប្រែ និងពន្ធនាគារនៅតាមរាជធានី ខេត្ត បានចំនួន
២៥ថ្នាក់ ដែលមានអ្នកជាប់ឃុំឃាំងទទួលបានការរៀនសូត្រសរុប៥៩២នាក់ ក្នុងគោលបំណងផ្តល់ឱ្យពួកគាត់
នូវចំណេះដឹង ជំនាញ មុខរបរ ការចេះអាន ចេះសរសេរ ចេះគិតលេខ និងចេះដោះស្រាយបញ្ហាដែលពាក់ព័ន្ធ
ទៅនឹងជីវភាពរស់នៅប្រចាំថ្ងៃ។ ពួកគាត់នឹងមានឱកាសរៀនសូត្របន្តលើជំនាញមុខរបរ ដើម្បីរកប្រាក់ចំណូល
បន្ទាប់ពីទទួលបានសិទ្ធិសេរីភាព និងការធ្វើសមាហរណកម្ម ទៅក្នុងសង្គមជាតិឡើងវិញ។
ក្រៅពីនេះ ក្រសួងអប់រំ យុវជន និងកីឡា បានសហការជាមួយវិស័យឯកជន នៅតាមរោងចក្រចំនួន១១
ដោយបានផ្តល់ឱកាសឱ្យកម្មករ កម្មការិនីរបស់យើង មានលទ្ធភាពចូលសិក្សាក្នុងកម្មវិធីអក្ខរកម្ម ដែលនឹងជួយ
ឱ្យពួកគេអាចបំពេញការងារកាន់តែប្រសើរឡើងថែមទៀត និងជាមូលដ្ឋានគ្រឹះសម្រាប់ស្វែងរកអាជីពការងារ
ដែលមានប្រាក់ចំណូលខ្ពស់ជាងមុន។ ម្យ៉ាងវិញទៀត ការចូលសិក្សាក្នុងកម្មវិធីអក្ខរកម្មនេះ ក៏បានផ្តល់ជា
ប្រយោជន៍ដល់ម្ចាស់រោងចក្រផងដែរ។
ថ្មីៗនេះ រាជរដ្ឋាភិបាលកម្ពុជា ទើបអនុម័តជាផ្លូវការនូវគោលនយោបាយជាតិ ស្តីពីការសិក្សាពេញមួយជីវិត
ដែលមានគោលបំណង ”ផ្តល់ឱកាសនិងគាំទ្រឱ្យប្រជាជនគ្រប់រូបទទួលបានការសិក្សាគ្រប់រូបភាព និងប្រើប្រាស់
ចំណេះដឹងតាមជំនាញដែលទទួលបាន ដើម្បីបង្កើនប្រសិទ្ធភាព គុណភាព ផលិតភាពការងារ និងប្រាក់ចំណូល
ស្របតាមយុគសម័យបច្ចេកវិទ្យាគមនាគមន៍និងព័ត៌មាន និងសង្គមពុទ្ធិ”។ ដើម្បីអនុវត្តគោលនយោបាយនេះ
ឱ្យមានប្រសិទ្ធភាព ក្រសួងអប់រំ យុវជន និងកីឡាត្រូវមានផែនការប្រែក្លាយមជ្ឈមណ្ឌលសិក្សាមួយចំនួនដូចជា
មជ្ឈមណ្ឌលសិក្សានៅតាមរោងចក្រនិងមជ្ឈមណ្ឌលអភិវឌ្ឍយុវជន ឱ្យក្លាយទៅជាមជ្ឈមណ្ឌលសិក្សាពេញមួយ
ជីវិត។ ក្រសួងអប់រំ យុវជន និងកីឡាក៏ត្រូវសហការជាមួយក្រសួងការងារនិងបណ្តុះបណ្តាលវិជ្ជាជីវៈដាក់ឱ្យ
ដំណើរការ “កម្មវិធីសមមូលកម្រិតអប់រំមូលដ្ឋានតាមប្រព័ន្ធបច្ចេកវិទ្យា” ដើម្បីផ្តល់ឱកាសសិក្សាដល់កម្មករ
ទាំងនៅក្នុងនិងក្រៅប្រទេសឱ្យមានលទ្ធភាពបន្តការសិក្សាតាមបែបអនឡាញឬតាមបែបឌីជីថល។
សមិទ្ធផលនៃការអនុវត្តកម្មវិធីអក្ខរកម្មទាំងនេះ បានបង្ហាញឱ្យឃើញពីការយកចិត្តទុកដាក់ខ្ពស់របស់
រាជរដ្ឋាភិបាលកម្ពុជា ព្រមទាំងការចូលរួមគាំទ្រដោយចិត្តស្មោះសពីអ្នកពាក់ព័ន្ធនិងដៃគូអភិវឌ្ឍនានា ជាពិសេស
កិច្ចខិតខំប្រឹងប្រែងអស់ពីកម្លាំងកាយចិត្តរបស់មន្ត្រីអប់រំគ្រប់លំដាប់ថ្នាក់ មន្ត្រីរាជការ ព្រះសង្ឃ បញ្ញវន្ត
ម្ចាស់រោងចក្រ សហគ្រាស សិស្ស និងនិស្សិតទូទាំងប្រទេស។
នៅឆ្នាំ២០១៩ នេះ ទិវាអក្ខរកម្មជាតិ ៨ កញ្ញា ត្រូវបានប្រារព្ធឡើងក្រោមប្រធានបទ “អក្ខរកម្មផ្សារភ្ជាប់
និងជំនាញមុខរបរ” ដែលមានចក្ខុវិស័យអភិវឌ្ឍប្រជាពលរដ្ឋកម្ពុជាគ្រប់រូប ឱ្យទទួលបានឱកាសសិក្សាពេញមួយ
ជីវិត គ្រប់ពេលវេលា គ្រប់ទីកន្លែង និងគ្រប់មធ្យោបាយ ប្រកបដោយវិជ្ជាសម្បទា) បំណិនសម្បទា ចរិយាសម្បទា
និងគុណសម្បទា ដើម្បីរួមចំណែកបង្កើនសេដ្ឋកិច្ចជាតិនិងសុខដុមជីវិតបុគ្គលនិងសង្គម។ ទស្សនាទាននៃប្រធានបទនៅឆ្នាំនេះ មិនសំដៅត្រឹមតែការរៀនអក្សរ និងលេខនព្វន្តប៉ុណ្ណោះទេ ប៉ុន្តែបានគិតគូរដល់ឱកាសសម្រាប់យុវជនយើងទទួលបានចំណេះដឹង ចំណេះធ្វើ សហគ្រិនភាព ជំនាញមុខរបរ និងនវានុវត្តន៍ គ្រប់ផ្នែកគ្រប់វិស័យ ជាពិសេស អក្ខរកម្មបច្ចេកវិទ្យា ដែលសព្វថ្ងៃកំពុងមានការរីកចម្រើនយ៉ាងឆាប់រហ័ស។
ក្នុងបរិការណ៍នៃគោលដៅអភិវឌ្ឍប្រកបដោយចីរភាពឆ្នាំ២០៣០ និងដើម្បីផ្សារភ្ជាប់ការងារអក្ខរកម្ម
ទៅនឹងជំនាញមុខរបរ ជាពិសេស ឈានទៅសម្រេចបាននូវគោលដៅ ប្រែក្លាយពលករដែលប្រើកម្លាំងសុទ្ធសាធ
ទៅជាពលករដែលមានជំនាញស្របតាម “យុទ្ធសាស្ត្រកំណើនថ្មី” របស់កម្ពុជា ។
សម្តេចតេជោ នាយករដ្ឋមន្រ្តី សូមអំពាវនាវដល់ស្ថាប័នជាតិ អន្តរជាតិ សហគមន៍ និងពលរដ្ឋគ្រប់រូប សូមយកចិត្តទុកដាក់ខ្ពស់ជាបន្តទៀត ដល់ការងារអក្ខរកម្ម ក៏ដូចជាការងារអប់រំទាំងនៅក្នុងប្រព័ន្ធនិងក្រៅប្រព័ន្ធ។ ក្នុងស្មារតីនេះ ដើម្បីបន្តចូលរួមលើកកម្ពស់ការងារអក្ខរកម្ម នៅកម្ពុជាឱ្យកាន់តែមានប្រសិទ្ធភាពថែមទៀតដូចតទៅ៖
ទី១- ក្រសួងស្ថាប័នពាក់ព័ន្ធត្រូវរៀបចំគោលនយោបាយ ក្របខ័ណ្ឌច្បាប់ លិខិតបទដ្ឋាន និងយន្តការចាំបាច់ ដើម្បីដឹកនាំ គ្រប់គ្រង និងអនុវត្តឱ្យមានប្រសិទ្ធភាពនិងគុណភាព ដោយធានាបាននូវលទ្ធផលទទួលយកបានក្នុងការផ្តល់ការសិក្សា ពេញមួយជីវិត សម្រាប់ប្រជាពលរដ្ឋគ្រប់រូប និងស្របទៅនឹង
បរិការណ៍ថ្មី នៃគោលដៅអភិវឌ្ឍប្រកបដោយចីរភាព។
ទី២- ក្រសួង ស្ថាប័ន គ្រឹះស្ថានសិក្សា មណ្ឌលសិក្សា និងទីវត្តអារាមទាំងអស់ត្រូវបង្កើតកម្មវិធីអប់រំ
កម្មវិធីសិក្សាពេញមួយជីវិតទាំងផ្នែកអក្ខរកម្ម ទាំងវិជ្ជាជីវៈឱ្យកាន់តែសម្បូរបែប និងមានភាពបត់បែន
ឆ្លើយតបនឹងតម្រូវការអ្នកសិក្សា ដើម្បីផ្តល់សេវាអប់រំពេញមួយជីវិត ទាំងសេវាអប់រំក្នុងប្រព័ន្ធ ទាំងសេវា
អប់រំក្រៅប្រព័ន្ធ និងទាំងសេវាអប់រំមិនផ្លូវការដល់ប្រជាពលរដ្ឋគ្រប់រូប។
ទី៣- អាជ្ញាធរដែនដីគ្រប់លំដាប់ថ្នាក់ត្រូវយកចិត្តទុកដាក់ចូលរួមគាំទ្រឱ្យបានខ្លាំងក្លាថែមទៀតក្នុង
ការអភិវឌ្ឍហេដ្ឋារចនាសម្ព័ន្ធមជ្ឈមណ្ឌលសិក្សា និងជំរុញលើកទឹកចិត្តដល់ប្រជាពលរដ្ឋដែលមិនបាន
រៀនសូត្រឬបោះបង់ការសិក្សា ឱ្យមានឱកាសទទួលបានការរៀនសូត្រជាថ្មីតាមថ្នាក់រៀនអប់រំក្រៅប្រព័ន្ធ
តាមគ្រប់រូបភាព ជាពិសេស ត្រូវខិតខំបង្កលក្ខណៈងាយស្រួលដល់ប្រជាពលរដ្ឋដែលជាជនមាន
ពិការភាពឱ្យទទួលបានលទ្ធភាពក្នុងការសិក្សារៀនសូត្រ។
ទី៤- ប្រព័ន្ធផ្សព្វផ្សាយទាំងអស់រួមមានបណ្តាញទំនាក់ទំនងសង្គមវិទ្យុ ទូរទស្សន៍ សារព័ត៌មាន ទស្សនាវដ្ដី
និងព្រឹត្តិបត្រព័ត៌មានរបស់រដ្ឋនិងឯកជន សូមជួយផ្សព្វផ្សាយឱ្យបានទូលំទូលាយអំពីអានុភាពនៃការងារ
អក្ខរកម្មដល់ប្រជាពលរដ្ឋ ដើម្បីឱ្យមានការយល់ដឹងកាន់តែទូលំទូលាយពោលគឺ “អក្ខរកម្មផ្សារភ្ជាប់នឹងជំនាញមុខរបរ”។
ទី៥- ក្មួយៗជាសិស្ស និស្សិតតាមគ្រឹះស្ថានសិក្សាសាធារណៈនិងឯកជន ក្រុមយុវជននៃសហភាពសហព័ន្ធយុវជនកម្ពុជា ក្រុមយុវជនកាយរឹទ្ធិ និងក្រុមយុវជនកាកបាទក្រហមកម្ពុជា ត្រូវចុះជួយបង្រៀនដោយស្ម័គ្រចិត្តដល់អ្នកមិនចេះអក្សរ នៅតាមថ្នាក់អក្ខរកម្ម និងមជ្ឈមណ្ឌលសិក្សាសហគមន៍ដែល
ស្ថិតក្នុងមូលដ្ឋានរបស់ខ្លួនកំពុងរស់នៅ។ ដោយឡែក បងប្អូនជនរួមជាតិដែលជាមាតាបិតាឬអ្នកអាណាព្យាបាល ក៏សូមជួយបន្តជំរុញបងប្អូន កូនចៅឱ្យបានចូលរៀនតាមសាលារៀនចំណេះទូទៅគ្រប់ៗគ្នា។ ក្មួយៗនិងបងប្អូនដែលពុំទាន់ចេះអក្សរ ភ្លេចអក្សរ ឬបោះបង់ការសិក្សា សូមខិតខំប្រឹងប្រែងស្វែងរកការរៀនសូត្រនៅតាមថ្នាក់អក្ខរកម្ម ថ្នាក់សមមូល ថ្នាក់ចូលរៀនឡើងវិញ និងការបណ្តុះបណ្តាលជំនាញនៅតាមមជ្ឈមណ្ឌលសិក្សាសហគមន៍ ដែលនៅជិតភូមិឋានរបស់ខ្លួន។
ទី៦- វត្តអារាមនិងវិហារសាសនា ត្រូវជំរុញចលនាព្រះសង្ឃ បព្វជិតសាសនា តាជី ដូនជី ចូលរួមកម្មវិធីអក្ខរកម្មផ្សារភ្ជាប់នឹងមុខរបរ ឱ្យកាន់តែខ្លាំងក្លាថែមទៀត តាមរយៈការទេសនាអប់រំអំពីសារប្រយោជន៍នៃការរៀនសូត្រ អំពីសីលធម៌និងការលើកកម្ពស់វប្បធម៌ រស់នៅក្នុងភាពជាពលរដ្ឋសកល។
ទី៧- ដៃគូអភិវឌ្ឍនិងអង្គការមិនមែនរដ្ឋាភិបាល ត្រូវបង្កើនកិច្ចសហការនិងពង្រឹងភាពជាដៃគូដោយ
ជួយឧបត្ថម្ភគាំទ្រដល់កម្មវិធីអប់រំក្រៅប្រព័ន្ធ ជាពិសេស កម្មវិធីអក្ខរកម្មផ្សារភ្ជាប់នឹងការអប់រំវិជ្ជាជីវៈ
ឱ្យមានដំណើរការល្អជាប់ជាប្រចាំ។
ទី៨- ប្រធានរោងចក្រ សហគ្រាស និងក្រុមហ៊ុនឯកជន សូមជួយជំរុញការបើកថ្នាក់អក្ខរកម្មគួបផ្សំនឹងថ្នាក់បំប៉នមុខជំនាញវិជ្ជាជីវៈផ្សេងៗ ដល់បងប្អូនកម្មករ កម្មការិនី ដើម្បីជាប្រយោជន៍របស់ពួកគេផងនិងជាប្រយោជន៍ដល់ម្ចាស់រោងចក្រ សហគ្រាសផង ដោយយើងទាំងអស់គ្នាត្រូវចងចាំថា “មានអក្ខរកម្មមានការគិតគូរ និងការសម្រេចចិត្តបានត្រឹមត្រូវ” “មានអក្ខរកម្មនាំឱ្យការអភិវឌ្ឍសហគមន៍កាន់តែរីកចម្រើន។ មានអក្ខរកម្មមានសុខដុមជីវិតបុគ្គល គ្រួសារ និងសង្គម ៕ដោយ៖កូឡាប
