ភ្នំពេញ ៖ ចៅក្រមស៊ើបសួរសាលាដំបូងខេត្តកណ្ដាលបានបិទការស៊ើបសួរ លើសំណុំរឿងសង្វៀនជល់មាន់នៅឃុំអរិយក្សត្រ ខេត្តកណ្ដាល រួចបញ្ជូនទៅជំនុំជម្រះឆាប់ៗនេះ។ តុលាការខេត្តកណ្តាល បានសាលដីកាសម្រេចធ្វើឃាតមាន់ជល់ចំនួន៩២ក្បាល ធ្វើឲ្យមានការរិះគន់យ៉ាងខ្លាំងផងដែរ។
លោក ហុក វ៉ាន់ធីណា ប្រធានសាលាដំបូងខេត្តកណ្តាល ដែលជាចៅក្រមស៊ើបសួរនៅក្នុងសំណុំរឿងសង្វៀន
ជល់មាន់នៅក្នុងឃុំអរិយក្សត្រ បានសម្រេចបិទការស៊ើបសួរនិងបញ្ជូនសំណុំរឿងរបស់ឈ្មោះ ថៃ ផានី ហៅម៉ាប់អូស្ត្រាលី កូនប្រសាលោក ហ៊ុន សាន មកចៅក្រមជំនុំជម្រះដើម្បីចាត់ការបន្ត ។
ជនត្រូវចោទឈ្មោះ ថៃ ផានី ហៅម៉ាប់អូស្ត្រាលី ត្រូវបានចោទប្រកាន់ និងឃុំខ្លួនក្នុងពន្ធនាគារខេត្តកណ្ដាលកាលពីថ្ងៃទី៥ ខែធ្នូ ឆ្នាំ២០១៧ ក្រោមការចោទប្រកាន់ពីបទ បើកលេងល្បែងស៊ីសងខុសច្បាប់ តាមមាត្រា៥ ច្បាប់ស្តីពីការបង្ក្រាបល្បែងស៊ីសង ។
បទចោទប្រកាន់នេះបានកំណត់អោយផ្ដន្ទាទោសដាក់ពន្ធនាគារពី១ឆ្នាំទៅ៥ឆ្នាំ និងពិនិយជាប្រាក់ពី៥លានរៀល ទៅ២០លានរៀល៕ ដោយ៖បញ្ញាស័ក្តិ
