ភ្នំពេញ ៖ នៅថ្ងៃទី ២៦ សីហា ឆ្នាំ ២០១៩ នេះ ឧត្តមក្រុមប្រឹក្សាពិគ្រោះ និងផ្ដល់យោបល់បានបើកកិច្ចប្រជុំផ្ដល់យោបល់លើកម្មវិធីវិនិយោគសាធារណៈ ៣ ឆ្នាំរំកិល ២០២០ -២០២២ ជាមួយប្រតិភូក្រសួងផែនការ ដែលដឹកនាំដោយ លោក ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ។
សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ ពីគណបក្សខ្មែរក្រោកបានវាយតម្លៃ និងកោតសរសើរ ចំពោះកិច្ចខិតខំ នៃការរៀបចំកម្មវិធីនេះ ហើយបានផ្ដល់អនុសាសន៍ដើម្បីជៀសវាងភាពខ្វះចន្លោះ នៃការរៀបចំផែនការ ជាពិសេសក្រសួងត្រូវប្រើសមត្ថកិច្ចរបស់ខ្លួន ឲ្យអស់ពីសមត្ថភាព ក្នុងការតាមដានត្រួតពិនិត្យ ការអនុវត្តផែនការ កម្មវិធីជាតិ និងបណ្តាគម្រោងពីគ្រប់ផ្នែកទាំងអស់ ហើយវាយតម្លៃលទ្ធផលនៃការអនុវត្ត និងលើកឡើងពីវិធានការកែតម្រូវផែនការកម្មវិធីជាតិទាំងនោះ ដើម្បីដឹងថាតើផែនការដែលបានដាក់ចេញ និងទទួលបានពង្រាងផែនការ ពីបណ្ដារក្រសួងសាមី តើលទ្ធផលដែលសម្រេចបាន ស្របតាមផែនការប៉ុន្មានភាគរយ ។
លោកវីល្លាម បានថ្លែងថា “យើងខ្ញុំក៏បានផ្ដល់ជាធាតុចូល ក្នុងការចែករំលែកទស្សនទាន កែលម្អ វិធីសាស្ត្ររៀបចំផែនការ ដើម្បីឲ្យផែនការនោះ មានលក្ខណៈច្បាស់លាស់ ព្រោះការទទួលបានទិន្នន័យ ពីបណ្ដាក្រសួងសាមី ម្ចាស់គម្រោងសាមី ដែលជាទិន្នន័យមិនច្បាស់លាស់ វាជាហេតុនាំឲ្យការរៀបចំផែនការថ្នាក់ជាតិ មានភាពល្អៀងច្រើន”។
សមាជិកឧត្តមក្រុមប្រឹក្សាប្រតិភូគណបក្សខ្មែរក្រោក វាយតម្លៃខ្ពស់ចំពោះការបង្កើតកម្មវិធីប្រមូលទិន្នន័យផែនការ តាមអនឡាញ របស់ក្រសួងផែនការ ដែលនឹងដាក់ចេញនាពេលឆាប់ៗខាងមុខ ។
ខុទ្ទកាល័យក្រសួងផែនការ បានប្រកាសថា នៅថ្ងៃទី២៦ ខែសីហា ឆ្នាំ២០១៩ លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានអញ្ជើញដឹកនាំថ្នាក់ដឹកនាំ មន្ត្រីជាន់ខ្ពស់ក្រសួងផែនការ ចូលរួមកិច្ចប្រជុំពិគ្រោះពិភាក្សា ដើម្បីផ្តល់ធាតុចូលលើសេចក្តីព្រាងកម្មវិធីវិនិយោគសាធារណៈ(កវស) ៣ ឆ្នាំរំកិល ២០២០-២០២២ ជាមួយឧត្តមក្រុមប្រឹក្សាពិគ្រោះ និងផ្តល់យោបល់ ដឹកនាំដោយលោក គង់ មុនីកា ប្រធានប្តូរវេន ៕ ដោយ៖កូឡាប