ប្រទេសកូរ៉េខាងជើងបានព្រមទទួលយកការពិភាក្សាគ្នាកំរិតខ្ពស់ដែលស្នើឡើងដោយកូរ៉េខាងត្បូង ហើយការពិភាក្សានោះនឹងធ្វើឡើងនៅថ្ងៃទី ៩ខែមករានេះ ដើម្បីពិភាក្សាគ្នាក្នុងការរកវិធីដើម្បីអាចឲ្យកីឡាកររបស់កូរ៉េខាងជើងចូលរួមប្រកួតក្នុងកីឡាអូឡាំពិចរដូវរងានៅខែក្រោយបាន។ នេះបើតាមការបញ្ជាក់របស់មន្ត្រីកូរ៉េខាងត្បូង។
មេដឹកនាំកូរ៉េខាងជើង គីម ជុងអ៊ុនបានថ្លែងនៅសប្តាហ៏នេះថា ការបញ្ជូនគណៈប្រតិភូកីឡារបស់កូរ៉េខាងជើងទៅចូលរួមកីឡាអូឡាំពិចគឺជាឱកាសដ៏ល្អដើម្បីបង្ហាញពីការរួបរួមគ្នារបស់ប្រជាជន។
កិច្ចពិភាក្សាកំរិតខ្ពស់រវាងកូរ៉េទាំងពីរ នឹងត្រូវធ្វើឡើងនៅតំបន់ Panmunjom ដែលជាភូមិសន្តិភាព ដែលមានការយាមកាមតឹងតែងបំផុត ហើយក៏ជាកន្លែងដែលប្រទេសទាំងពីរបានជួបចរចារជាប្រវត្តិសាស្ត្រជាច្រើនផងដែរ។
ប្រធានាធិបតីកូរ៉េខាងត្បូង ម៉ូន ជេអ៊ីន បាននិយាយកាលពីខាងដើមថា គាត់បានមើលឃើញថា កីឡាអូឡាំពិចរដូវរវាគឺជាឱកាសថ្មីដំបូងក្នុងការបង្កើនទំនាក់ទំនងជាមួយនឹងប្រទេសទាំងពីរ។
ទំនាក់ទំនងរវាងប្រទេសបងប្អូនទាំងពីរ បង្ហាញពីចំនុចល្អបន្តិចបន្តួចដែរក្នុងសប្តាហ៏នេះ ខណៈដែលប្រទេសកូរ៉េខាងជើង បានបើកឲ្យមានតំណើរការវិញនូវប្រព័ន្ធទូរស័ព្ទសំរាប់ទំនាក់ទំនងគ្នា ដែលកូរ៉េខាងជើងបានកាត់ផ្តាចតាំងពីឆ្នាំ ២០១៦មក៕ សុភ័ក្ត្រ
