ភ្នំពេញ ៖ សម្តេចពិជ័យសេនា ទៀ បាញ់ បានធ្វើការអំពាវនាវដល់កងទ័ពទាំងអស់ត្រូវតែរួម គ្នាថែរក្សាសុខសន្តិភាព និងការអភិវឌ្ឍ ដែលកំពុងមានសព្វថ្ងៃនេះ ហើយត្រូវទប់ស្កាត់ឲ្យបានរាល់បច្ចាមិត្តទាំងខាងក្នុង និង ខាងក្រៅ ។
ប្រមុខការពារជាតិ អំពាវនាវដល់កងទ័ពទាំងអស់ ត្រូវទប់ស្កាត់ឲ្យបានចំពោះបច្ចាមិត្តទាំងខាងក្នុងនិងខាងក្រៅជាថ្មីម្តងទៀត។ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានធ្វើការអំពាវនាវដល់កងទ័ពទាំងអស់ត្រូវតែរួម គ្នាថែរក្សាសុខសន្តិភាព និងការអភិវឌ្ឍ ដែលកំពុងមានសព្វថ្ងៃនេះ ហើយត្រូវទប់ស្កាត់ឲ្យបានរាល់បច្ចាមិត្តទាំងខាងក្នុង និង ខាងក្រៅ ដែលមានចេតនាញុះញង់ឲ្យប្រទេសជាតិ មានភាមានភាពវឹកវរដោយកត្តាណាមួយ។
ជាអធិបតីសម្ពោធបន្ទាយថ្មីរបស់កងឯកភាព កងកិត្តិយស ត្រែទ័ពដែលស្ថិតនៅសង្កាត់ឃ្មួញ ខណ្ឌសែនសុខរាជធានីភ្នំពេញ នាថ្ងៃទី៣ ខែកញ្ញា ឆ្នាំ២០១៩នេះ សម្តេចពិជ័យសេនា ទៀ បាញ់ បានថ្លែងថា សន្តិភាព និងការអភិវឌ្ឍវាមិនងាយរក បានដោយស្រួលនោះទេ ដូច្នេះក្នុងនាមយើងជាកងទ័ពត្រូវតែថែរក្សាឲ្យបាននូវសុខសន្តិភាព ដែលកំពុងមានសព្វថ្ងៃនេះ ហើយមិនត្រូវបណ្តែតបណ្តោយឲ្យជនអគតិ ឬក្រុមប្រឆាំងធ្វើអ្វី ស្រេចតែចិត្តក្នុងគោលបំណងញុះញង់ឲ្យប្រទេសជាតិ មានភាពវឹកវរនោះឡើយ ហើយដាច់ខាតត្រូវតែកម្ចាត់ចោលភ្លាមប្រសិនបើមានតម្រុយណាមួយ ដដែលចដែលចង់ប្រមូលផ្តុំគ្នាបង្កភាពវឹកវរ និងធ្វើឲ្យសង្គមជាតិទាំងមូលបែកបាក់សាមគ្គីគ្នានោះ។
សម្តេចពិជ័យសេនា ទៀ បាញ់ បានមានប្រសាសន៍ថា«យើងជាកងទ័ពត្រូវតែការពារជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ដែលកើតចេញ ពីការបោះឆ្នោតរបស់ប្រជាពលរដ្ឋ និងប្រឆាំងដាច់ខាតនូវបដិវត្តន៍ពណ៌ ហើយមិនត្រូវស្តាប់តាមការញុះញង់របស់ក្រុមប្រឆាំងដែលបានឃោសនាឲ្យកងទ័ពប្រឆាំង នឹងរាជរដ្ឋាភិបាលស្របច្បាប់នោះឡើយ»។
សម្តេចពិជ័យសេនា ទៀ បាញ់ ក៏បានថ្លែងកោតសរសើរចំពោះវីរភាពរបស់កងទ័ពទាំងអស់ដែលបានខិតខំ និងបូជាសាច់ស្រស់ឈាមស្រស់ដើម្បីបុព្វហេតុជាតិ នាពេលកន្លងមកផងដែរ។ ប្រសិនបើគ្មានការបូជាសាច់ស្រស់ឈាមស្រស់របស់កងកម្លាំងទាហាន នាពេលកន្លងមកទេ ក៏វាមិនមានសន្តិភាពនិងការអភិវឌ្ឍរហូតដល់សព្វថ្ងៃនេះដែរ៕ ដោយ ៖ បញ្ញាស័ក្តិ