ភ្នំពេញ៖ សម្តេចនាយករដ្ឋមន្រ្តីកម្ពុជា និងសម្តេចកិត្តិព្រឹទ្ធបណ្ឌិត បានជួបយុវជន ហុង ភារិន និងបងប្រុសរបស់គាត់ នៅគេហដ្ឋានរបស់សម្តេចតេជោ ក្នុងគោលបំណងគឺចង់ស្វែងយល់នូវបំណង និងគោលដៅដែល ហុង ភារិន ចង់ទៅនិងចង់បាន។
តាមរយៈផេកហ្វេសប៊ុកផ្លូវការ នៅថ្ងៃទី៦ ខែកញ្ញា ឆ្នាំ២០១៩នេះ សម្តេចតេជោ បានថ្លែងថា ខ្ញុំ និងភរិយា ទើបបានជួបយុវជន ហុង ភារិន និងបងប្រុសរបស់គាត់ឈ្មោះហុង ភារុន នៅមុននេះបន្តិច នៅគេហដ្ឋានរបស់ខ្ញុំ”។
សម្តេចបានមានប្រសាសន៍ថា “គោលបំណង នៃការជួបរបស់ខ្ញុំ គឺចង់ស្វែងយល់នូវបំណង និងគោលដៅដែល ហុង ភារិន ចង់ទៅ ដើម្បីងាយស្រួលដល់ការជួយរបស់យើង ឱ្យស្របជាមួយបំណងដែល ភារិន ចង់ទៅ និងចង់បាន។ ខ្ញុំក៏បានជួយដល់ ហុង ភារុន ដែលរៀនចប់បរិញ្ញាបត្រ និងកំពុងធ្វើការនៅក្រសួងសេដ្ឋកិច្ច និងហិរញ្ញវត្ថុ ផ្នែកពន្ធដារ ឱ្យបន្តរៀនយកបរិញ្ញាបត្រ
ជាន់ខ្ពស់តទៅទៀត។ ជូនពរកូនប្រុសទាំងពីរ ជួបតែសេចក្តីសុខ និងសម្រេចនូវបំណងប្រាថ្នាដែលកូនចង់បាន”។
ជាការឆ្លើយតប ហុង ភារិន បានថ្លែងអំណរគុណយ៉ាងជ្រាលជ្រៅ ចំពោះសម្តេចនាយករដ្ឋមន្ត្រី ដែលតែងតែជួយគាំទ្រ និងលើកទឹកចិត្ត ដល់និស្សិតឆ្នើមរបស់កម្ពុជា នាពេលកន្លងមក រួមទាំងខ្លួនលោកផ្ទាល់ផងដែរ។ លោកប្តេជ្ញាថា នឹងខិតខំប្រឹងរៀនសូត្របន្ថែមទៀត តាមអនុសាសន៍ណែនាំ ដើម្បីចែករំលែកចំណេះដឹងរបស់លោកដល់សិស្សនិស្សិតកម្ពុជា ក៏ដូចជាសម្រេចក្តីសុបិន្តរបស់លោក ក្នុងការរួមចំណែកកសាងប្រទេសកម្ពុជា ឲ្យកាន់តែរីកចម្រើនថែមទៀត។ ភារិន បន្ថែមទៀតថា លោកមានបំណងចូលរួមប្រកួតសមត្ថភាព នៃការចងចាំលំដាប់ថ្នាក់ពិភពលោក ដែលនឹងប្រពឹត្តទៅនៅខែធ្នូខាងមុខនេះ នៅប្រទេសចិន ក្នុងគោលបំណងបង្ហាញពីសមត្ថភាពកូនខ្មែរ និងទង់ជាតិខ្មែរ នៅក្នុងការប្រកួតប្រជែងលំដាប់ថ្នាក់ពិភពលោកនេះ។
នាពេលថ្មីៗនេះ និសិ្សតឆ្នើម ហុង ភារិន បានបង្ហាញអំពីសមត្ថភាព និងទេពកោសល្យនៃការចងចាំ របស់ខ្លួន នៅក្នុងកម្មវិធីបញ្ចេញសមត្ថភាពរបស់ទូរទស្សន៍ថៃ ” Super 100″ ដោយទទួលបានការកោតសរសើរ និងគាំទ្រយ៉ាងខ្លាំងពីគណៈកម្មការ ក៏ដូចជា មហាជនជាច្រើន ទាំងក្នុងប្រទេស និងក្រៅប្រទេស ហើយត្រូវបានមហាជនទូទៅប្រសិទ្ធនាម និស្សិត ហុង ភារិន ជាអច្ឆរិយកម្ពុជា ភារិន ទៀតផង។
ជាកូនទី២ ក្នុងចំណោមបងប្អូនប្រុស២នាក់ និស្សិតឆ្នើម ហុង ភារិន មានអាយុ២៣ឆ្នាំ មានទីកន្លែងកំណើតនៅភូមិថ្នល់បែកលិច ឃុំស្វាយទាប ស្រុកចំការលើ ខេត្តកំពង់ចាម។ ដោយស្ថិតនៅក្នុងគ្រួសារកសិករ ដែលមានជីវភាពលំបាក ដោយសារឱពុក ម្តាយបាន លែងលះគ្នា ភារិន បានខិតខំតស៊ូប្រឹងប្រែងរៀនសូត្រ រហូតទទួលបានអាហារូបករណ៍ព្រះរាជទានថ្នាក់បរិញ្ញាបត្រ ប្រចាំសាកលវិទ្យាល័យរ៉ាឆាផាត់ឆៃយ៉ាភូមិ ឯកទេសអភិវឌ្ឍន៍ជនបទ។ ក្តីសុបិន្តរបស់និស្សិតឆ្នើមថ្នាក់បរិញ្ញាបត្រឆ្នាំទី៤រូបនេះ គឺចង់យកចំណេះដឹងដែលខ្លួនបានខិតខំរៀនសូត្រមកអភិវឌ្ឍប្រទេសជាតិ៕ ដោយ៖កូឡាប
