ភ្នំពេញ៖ រាជរដ្ឋាភិបាល នៃព្រះរាជាណាចក្រកម្ពុជា និងរដ្ឋាភិបាល នៃសាធារណរដ្ឋប្រជាធិបតេយ្យប្រជាមានិតឡាវ នៅថ្ងៃទី១២ ខែកញ្ញា ឆ្នាំ២០១៩ បានសេចក្តីថ្លែងការណ៍រួមមួយ ដោយភាគីទាំងពីរបានបញ្ជាក់ជាថ្មីពីការទុកចិត្ត និងការជឿជាក់គ្នាទៅវិញទៅមក និងការគោរពគោលការណ៍មិនជ្រៀតជ្រែកកិច្ចការផ្ទៃក្នុងរបស់គ្នាទៅវិញទៅមក ការមិនប្រើប្រាស់កម្លាំង ឬការគំរាមប្រើកម្លាំង ការដោះស្រាយទំនាស់ដោយសន្តិវិធី ព្រមទាំងមិនអនុញ្ញាតឱ្យក្រុមអ្នកនយោបាយ ឬកម្លាំងប្រដាប់អាវុធបរទេសណាមួយប្រើប្រាស់ទឹកដីរបស់ខ្លួន ដើម្បីប្រឆាំងនឹងភាគីម្ខាងទៀតឡើយ។
សេចក្តីថ្លែងការណ៍មានខ្លឹមសារដូចខាងក្រោម៖
១. តបតាមការអញ្ជើញរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តម ថងលូន ស៊ីសូលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ បានអញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា នៅថ្ងៃទី១២ និងទី១៣ ខែកញ្ញា ឆ្នាំ២០១៩។ ឯកឧត្តម ថងលូន ស៊ីសូលីត ព្រមទាំងគណប្រតិភូអមដំណើរ ដែលរួមមាន
ឯកឧត្តម សាមសៃ គុំម៉ាស៊ីត រដ្ឋមន្ត្រីការបរទេសឡាវ និងមន្ត្រីជាន់ខ្ពស់ដទៃទៀត ត្រូវបានទទួលស្វាគមន៍យ៉ាងរាក់ទាក់កក់ក្តៅ ពីរាជរដ្ឋាភិបាល និងប្រជាជនកម្ពុជា។
២. ក្នុងឱកាសទស្សនកិច្ចនេះ ឯកឧត្តម ថងលូន ស៊ីសុលីត បានអញ្ជើញដាក់កម្រងផ្កានៅវិមានឯករាជ្យ ដើម្បីគោរពវិញ្ញាណក្ខន្ធដល់វីរបុរស និងវីរនារីកម្ពុជា ដែលបានពលីជីវិតនៅក្នុង សង្គ្រាម និង
បានអញ្ជើញគោរពវិញ្ញាណក្ខន្ធ នៅមណ្ឌបសម្តេចព្រះបាទនរោត្តមសីហនុ ព្រះបរមរតនៈកោដ្ឋ អតីត ព្រះមហាក្សត្រ នៃព្រះរាជាណាចក្រកម្ពុជា។ ឯកឧត្តមនាយករដ្ឋមន្ត្រីឡាវ បានអញ្ជើញចូលជួបសម្តែងការគួរសមជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងជាប្រមុខរដ្ឋស្តីទី និង សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា ដោយក្នុងឱកាសនោះ ឯកឧត្តមនាយករដ្ឋមន្រ្តីឡាវ បានធ្វើការផ្លាស់ប្តូរយោបល់យ៉ាងស្និទ្ធស្នាលជាមួយថ្នាក់ដឹកនាំកម្ពុជា ឆ្លុះបញ្ចាំងពី
ទំនាក់ទំនងមិត្តភាពជិតស្និទ្ធ និងយូរអង្វែងរវាងប្រទេសទាំងពីរ។
៣. សម្តេចតេជោនាយករដ្ឋមន្ត្រី ហ៊ុន សែន និង ឯកឧត្តមនាយករដ្ឋមន្ត្រី ថងលូន ស៊ីសុលឹត បានពិភាក្សាគ្នាដោយត្រង់ៗ ក្នុងបរិយាកាសកក់ក្តៅ និងយោគយល់គ្នា អំពីបញ្ហាជាច្រើន ដែលជាផលប្រយោជន៍រួមនៃប្រទេសទាំងពីរ។ នាយករដ្ឋមន្ត្រីទាំងពីរបានព្រមព្រៀងគ្នាដូចមាននៅក្នុងចំណុចជាបន្តបន្ទាប់ខាងក្រោម។
៤. ភាគីទាំងពីរបានឯកភាពគ្នាលើកកម្ពស់ទំនាក់ទំនង រវាងព្រះរាជាណាចក្រកម្ពុជា និងសាធារណរដ្ឋ
ប្រជាធិបតេយ្យប្រជាមានិតឡាវ ដល់កម្រិតជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង ក្នុងគោលបំណងពង្រឹង និងពង្រីកចំណងមិត្តភាព ស្មារតីសាមគ្គីភាពជាភាតរៈ និងកិច្ចសហប្រតិបត្តិការរវាងប្រទេសទាំងពីរ ក្នុងវិស័យនយោបាយ-សន្តិសុខ សេដ្ឋកិច្ច និងសង្គម-វប្បធម៌។ ភាគីទាំងពីរនឹងបន្តអភិវឌ្ឍន៍ទំនាក់ទំនងមិត្តភាព ដោយឈរលើមូលដ្ឋានច្បាប់អន្តរជាតិ ជាពិសេសគោលការណ៍ដែលមានចែងនៅក្នុងធម្មនុញ្ញ របស់អង្គការសហប្រជាជាតិ និងធម្មនុញ្ញអាស៊ាន។ ភាគីទាំងពីរបានបញ្ជាក់ជាថ្មី
ពីការទុកចិត្ត និងការជឿជាក់គ្នាទៅវិញទៅមក និងការគោរពគោលការណ៍មិនជ្រៀតជ្រែកកិច្ចការផ្ទៃក្នុង
របស់គ្នាទៅវិញទៅមក ការមិនប្រើប្រាស់កម្លាំង ឬការគំរាមប្រើកម្លាំង ការដោះស្រាយទំនាស់ដោយសន្តិវិធី ព្រមទាំងមិនអនុញ្ញាតឱ្យក្រុមអ្នកនយោបាយ ឬកម្លាំងប្រដាប់អាវុធបរទេសណាមួយប្រើប្រាស់ទឹកដីរបស់ខ្លួន ដើម្បីប្រឆាំងនឹងភាគីម្ខាងទៀតឡើយ។
៥. ភាគីទាំងពីរនឹងបន្តរក្សាការជួបប្រជុំកំរិតខ្ពស់ឱ្យបានទៀងទាត់ រវាងតំណាងរដ្ឋាភិបាល និងស្ថាប័នរដ្ឋផ្សេងទៀតរបស់ប្រទេសទាំងពីរ ដើម្បីពង្រឹង និងពង្រីកកិច្ចសម្របសម្រួល និងរួមគ្នាដោះស្រាយ
បញ្ហានានាឱ្យបានទាន់ពេលវេលា និងប្រកបដោយប្រសិទ្ធភាព សំដៅលើកកម្ពស់ការជឿទុកចិត្តគ្នារវាងប្រជាជាតិទាំងពីរ។
៦. ភាគីទាំងពីរបានឯកភាពគ្នា ប្រគល់ភារកិច្ចជូនគណៈកម្មការចម្រុះខណ្ឌសីមាព្រំដែននៃប្រទេសទាំងពីរ ដើម្បីរួមគ្នា
ឱ្យបានឆាប់បំផុតនូវ សន្ធិសញ្ញាស្តីពីការខណ្ឌសីមាព្រំដែនរវាងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ពាក់ព័ន្ធកំណាត់ព្រំដែនដែលភាគីទាំងពីរបានកំណត់ខណ្ឌសីមារួចរាល់ហើយ ចំនួន៨៦% នៃខ្សែព្រំដែនរវាងប្រទេសទាំងពីរ។ ចំពោះកំណាត់ព្រំដែន ដែលនៅសេសសល់មិនទាន់ខណ្ឌសីមា ភាគីទាំងពីរបានព្រមព្រៀងគ្នាថានឹងបន្ត
ពិភាក្សារិះរកផ្លូវដោះស្រាយបញ្ហា ដោយសន្តិវិធីឱ្យបានឆាប់បំផុត។ ភាគីទាំងពីរក៏បានឯកភាពប្រគល់ភារកិច្ចជូនគណៈកម្មការចម្រុះខណ្ឌសីមាព្រំដែន នៃប្រទេសទាំងពីរ ឱ្យពិភាក្សាគ្នាអំពីការដាំបង្គោលព្រំដែនបន្ថែមនៅលើកំណាត់ព្រំដែនចំនួន៨៦% និងផលិតផែនទីព្រំដែនដោយបង្ហាញពីខ្សែព្រំដែន ដែលភាគីទាំងពីរបានទទួលយកសម្រាប់ភ្ជាប់ជាឧបសម្ព័ន្ធ នៃសន្ធិសញ្ញាដូចពោលខាងលើ។
៧. លើសពីនេះទៀត ភាគីទាំងពីរបានឯកភាពគ្នាលើកទឹកចិត្ត ដល់អាជ្ញាធរពាក់ព័ន្ធនៃប្រទេសទាំងពីរ ទាំងថ្នាក់ជាតិ និងថ្នាក់តំបន់ ឱ្យអនុវត្តនូវតួនាទីប្រកបដោយស្មារតីទទួលខុសត្រូវខ្ពស់បំផុត ដើម្បីធានានូវសន្តិភាព និងស្ថិរភាពនៅតាមបណ្តោយព្រំដែន នៃប្រទេសទាំងពីរ និងដើម្បីធ្វើឱ្យព្រំដែនកម្ពុជា-ឡាវក្លាយជាព្រំដែនសន្តិភាព មិត្តភាព និងកិច្ចសហប្រតិបត្តិការជានិរន្តរ៍។
៨. ភាគីទាំងពីរបានព្រមព្រៀងគ្នា ធ្វើការសម្របសម្រួល និងសហការគ្នាយ៉ាងជិតស្និទ្ធក្នុងវិស័យការពារជាតិ និងសន្តិសុខសាធារណៈ ជាពិសេសតាមរយៈការពិគ្រោះយោបល់ជាទៀងទាត់ និងការផ្លាស់ប្តូរទស្សនកិច្ចគ្រប់ជាន់ថ្នាក់ កម្មវិធីផ្លាស់ប្តូរនិស្សិត កិច្ចសហប្រតិបត្តិការកុងស៊ុល និងច្បាប់ រួមទាំងក្នុងការងារផ្ទេរទណ្ឌិត និងកិច្ចសហប្រតិបត្តិការប្រយុទ្ធប្រឆាំងនឹងគ្រឿងញៀនខុសច្បាប់ ព្រមទាំងបទល្មើសឆ្លងដែនដទៃទៀត ដោះស្រាយបញ្ហាឆ្លងដែនដែលមានដូចជា ជំងឺឆ្លង និងគ្រោះមហន្តរាយផ្សេងៗ។
៩. ភាគីទាំងពីរបានបញ្ជាក់សារជាថ្មីអំពីសារសំខាន់ នៃការបង្កើនទំនាក់ទំនងសេដ្ឋកិច្ចទ្វេភាគីតាមរយៈកិច្ចប្រឹងប្រែងរួម ដើម្បីបង្កើនការផ្លាស់ប្តូរពាណិជ្ជកម្ម និងវិនិយោគរវាងប្រទេសទាំងពីរ ហើយ
ព្រមទាំងជំរុញកិច្ចសហប្រតិបត្តិការលើវិស័យផ្សេងៗទៀតដូចជា វិស័យកសិកម្ម រុក្ខាប្រមាញ់ និងនេសាទ ហិរញ្ញវត្ថុ ការដឹកជញ្ជូន ទូរគមនាគមន៍ ការងារ និងបណ្តុះបណ្តាលវិជ្ជាជីវៈ ជលូតវិទ្យា និងបរិស្ថាន។ ភាគីទាំងពីរយល់ស្របគ្នាថា ការពង្រឹងកិច្ចសហប្រតិបត្តិការផ្នែកសង្គម-វប្បធម៌ ដែលរួមមានសុខុមាលភាពសង្គម អប់រំ និងកីឡា ព័ត៌មាន វប្បធម៌ និងទេសចរណ៍ ការថែរក្សាសុខភាព និង
យុវជន មិនត្រឹមតែជួយគាំទ្រដល់ទំនាក់ទំនងវិស័យសេដ្ឋកិច្ចប៉ុណ្ណោះទេ ប៉ុន្តែថែមទាំងជួយលើកកម្ពស់
ស្មារតីមិត្តភាពរវាងប្រជាជាតិទាំងពីរផងដែរ។
១០.ភាគីទាំងពីរបានឯកភាពគ្នាជំរុញកិច្ចសហប្រតិបត្តិការលើវិស័យថាមពល ជាពិសេសតាមរយៈ
ការបង្កើនពាណិជ្ជកម្មទ្វេភាគីផ្នែកថាមពលអគ្គិសនី ផលិតពីប្រភពវារីអគ្គិសនីរោងចក្រដើរដោយធ្យូងថ្ម និងប្រភពថាមពលកកើតឡើងវិញផ្សេងៗទៀត រវាងប្រទេសទាំងពីរនៅក្នុងបណ្តាឆ្នាំខាងមុខផ្អែកតាមសមត្ថភាពផងខ្លួន។ ក្នុងន័យនេះ ភាគីទាំងពីរបានឯកភាពគ្នាជំរុញលើកទឹកចិត្តដល់ស្ថាប័ន ពាក់ព័ន្ធទាំងសងខាង ធានាថាការសាងសង់បណ្តាញបញ្ជូនអគ្គិសនីតង់ស្យុងខ្ពស់ រវាងកម្ពុជា និងឡាវ
នឹងត្រូវបានរួចរាល់តាមការព្រមព្រៀងគ្នា និងស្របតាមផែនការ។ ភាគីទាំងពីរបានបង្ហាញនូវបំណងរួម ក្នុងការជំរុញពាណិជ្ជកម្មថាមពលថ្នាក់តំបន់ ហើយយល់ស្របគ្នាថាពាណិជ្ជកម្មថាមពលរវាងកម្ពុជា ឡាវ និងវៀតណាម អាចនឹងជំរុញបានតាមរយៈការបង្កើតនូវបណ្តាញបញ្ជូនអគ្គិសនីរួមនៃប្រទេសទាំងបី។
១១. ភាគីទាំងពីរបានឯកភាពគ្នាជំរុញកិច្ចសហប្រតិបត្តិការទីក្រុងសម្ព័ន្ធមេត្រី រវាងរាជធានីភ្នំពេញ និងវៀងចន្ទន៍ និងរវាងខេត្តសៀមរាប និងខេត្តចំប៉ាសាក់ ។ លើសពីនេះទៀត ភាគីទាំងពីរបានឯកភាពជំរុញមន្ត្រីរៀងៗខ្លួន នៅតាមបណ្តាខេត្តជាប់ព្រំដែនឱ្យធ្វើការជួបប្រជុំ និងពិគ្រោះយោបល់គ្នាជាប្រចាំដើម្បីបង្កើនកិច្ចសហប្រតិបត្តិការ និងជួយគ្នាទៅវិញទៅមក លើគ្រប់វិស័យ ដែលបម្រើផលប្រយោជន៍
ទៅវិញទៅមក។
១២. ភាគីទាំងពីរបានឯកភាពបន្តបង្កើនកិច្ចសហប្រតិបត្តិការ នៅក្នុងក្របខ័ណ្ឌអនុតំបន់ និងយន្តការតំបន់ ដើម្បីការអភិវឌ្ឍសេដ្ឋកិច្ចតំបន់ ដែលមានលក្ខណៈគ្រប់ជ្រុងជ្រោយ និងប្រកបដោយចីរភាពតាមរយៈការអនុវត្តនូវកិច្ចព្រមព្រៀងដែលមានស្រាប់ ពិសេសនៅក្នុងក្របខ័ណ្ឌកិច្ចសហប្រតិបត្តិការតំបន់អភិវឌ្ឍត្រីកោណកម្ពុជា-ឡាវ-វៀតណាម៕ ដោយ៖កូឡាប
