កំពង់ចាម៖លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអញ្ជើញចុះក្ដាប់សភាពការណ៍ទូទៅ និងសកម្មភាពរបស់កងយោធពលខេមរភូមិន្ទ ក្នុងទិសយោធភូមិភាគទី២ នៅថ្ងៃទី១៣ ខែកញ្ញា ឆ្នាំ២០១៩។
ទន្ទឹមនឹងការថ្លែងសរសើរចំពោះការខិតខំលើគ្រប់វិស័យ ដែលថ្នាក់ដឹកនាំយោធភូមិភាគទី២ បានដឹកនាំបានល្អ ជាចំណែកមួយរបស់កងយោធពលខេមរភូមិន្ទ ក្នុងការចូលរួមពង្រឹងវិស័យការពារជាតិ លោក អគ្គមេបញ្ជាការ ក៏បានមានមតិផ្ដាំផ្ញើដល់ថ្នាក់ដឹកនាំយោធភូមិភាគ លើការងារគ្រប់គ្រងកម្លាំង និងការងារថែទាំមធ្យោបាយ សម្ភារៈ និងគ្រឿងបំពាក់ផ្សេងៗឱ្យបានល្អ។
នាឱកាសនោះដែរ លោក ក៏បានក្រើនរំលឹកដល់យោធិនទាំងអស់ គោរពឱ្យបាននូវបទវិន័យទូទៅ សម្រាប់កងយោធពលខេមរភូមិន្ទ និងយកចិត្តទុកដាក់ចូលរួមជួយសង្គ្រោះគ្រោះមហន្តរាយ ដែលប៉ះពាល់ដល់ជីវិត ក៏ដូចជាមធ្យោបាយ និងសម្ភាររបស់ប្រជាពលរដ្ឋ៕ ដោយ៖បញ្ញាស័ក្តិ
