ខេត្តស្វាយរៀង៖ នៅសាលប្រជុំគណបក្សប្រជាជនស្រុករមាសហែក នាព្រឹកថ្ងៃទី១៤ ខែកញ្ញា ឆ្នាំ២០១៩នេះ លោក ម៉ែន វិបុល ប្រធានគណៈកម្មាធិការគណបក្សប្រជាជនកម្ពុជាខេត្តស្វាយរៀង បានអញ្ជើញជាអធិបតីក្នុងពិធីប្រកាសទទួលស្គាល់លោក ស៊ូ ម៉ុល ជាប្រធានគណៈកម្មាធិការគណបក្សប្រជាជនកម្ពុជាស្រុករមាសហែក និងមានការអញ្ជើញចូលរួមពីសំណាក់ អស់លោក លោកស្រី សមាជិក សមាជិការ គណបក្សប្រជាជនកម្ពុជាស្រុក និងក្រុមការងារគណបក្សចុះជួយស្រុក ឃុំ ជាច្រើនរូបទៀត។
មានប្រសាសន៍ក្នុងពិធីនេះលោកប្រធានគណបក្សប្រជាជនកម្ពុជាខេត្តស្វាយរៀង បានថ្លែងនូវការកោតសរសើរ និងអរគុណចំពោះលោក អុក ហាន អតីតជាប្រធានគណបក្សប្រជាជនកម្ពុជាស្រុករមាសហែក ក្នុងអំឡុងពេលបំពេញការងារកន្លងមក លោកបានខិតខំបំពេញតួនាទីភារកិច្ចយ៉ាងល្អ ធ្វើឲ្យស្រុករមាសហែកមានការរីកចម្រើន លើគ្រប់វិស័យ ទាំងកត្តាសន្តិសុខសណ្តាប់ធ្នាប់សាធារណៈ ក៏ល្អប្រសើរផងដែរ។
លោកបន្តទៀតថា ក្រោមគោលនយោបាយ នៃមាគ៌ាដឹកនាំដ៏ត្រឹមត្រូវប្រកបដោយគតិបណ្ឌិតរបស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា រួមនឹងថ្នាក់ដឹកនាំកំពូលៗរបស់គណបក្ស បានធ្វើឲ្យគណបក្សប្រជាជនកម្ពុជា ក្លាយជាគណបក្សមានប្រជាប្រិយភាពព្រមទាំង មានការគាំទ្រដ៏ច្រើនលើសលប់ ពីសំណាក់ប្រជាពលរដ្ឋទូទាំងប្រទេស។
លោកប្រធានគណបក្សប្រជាជនកម្ពុជាខេត្តស្វាយរៀង បានផ្តាំផ្ញើដល់លោក ស៊ូ ម៉ុល ប្រធានគណបក្សប្រជាជនកម្ពុជាស្រុករមាសហែក ដែលត្រូវបានប្រកាសទទួលស្គាល់នារសៀលនេះ នូវចំណុចសំខាន់ៗមួយចំនួនដូចជា៖
– ត្រូវតាមដាននិងយកចិត្តទុកដាក់ស្តាប់ប្រសាសន៍ និងសុន្ទរកថា របស់ថ្នាក់ដឹកនាំជាន់ខ្ពស់ ពិសេសសម្តេចតេជោនាយករដ្ឋមន្ត្រី ដើម្បីមានមូលដ្ឋានឆ្លើយបំភ្លឺជូនប្រជាពលរដ្ឋ និងវាយបកភ្លាមៗទៅ និងក្រុមប្រឆាំងទុច្ចរិតក្រៅច្បាប់។
– គណៈកម្មាធិការគណបក្សគ្រប់ថ្នាក់ត្រូវបន្តដឹកនាំគ្រប់គ្រង ការងារហិរញ្ញវត្ថុឱ្យមានប្រសិទ្ធភាព និងតម្លាភាព។
– ត្រូវចងចាំ និងប្រតិបត្តិឱ្យបានខ្ជាប់ខ្ជូននូវអភិក្រមទាំង៥ និងបាវចនា២ “កែទម្រង់ខាងក្នុង បង្កើតមិត្តខាងក្រៅ ដែលសម្តេចតេជោប្រធានគណបក្សបានណែនាំ។
– មន្ត្រីគណបក្សប្រជាជនកម្ពុជាគ្រប់មូលដ្ឋានគ្រប់លំដាប់ថ្នាក់ ត្រូវខិតខំធ្វើអំពើល្អ និងចេះកែលម្អនូវចំណុចខ្វះខាត និងភាពអសកម្មទាំងឡាយ ដោយទុកផលប្រយោជន៍ប្រជាពលរដ្ឋជាធំ និងខិតខំបម្រើសេវាសាធារណៈគ្រប់ប្រភេទ ជូនពួកគាត់ឲ្យបានល្អប្រសើរ។
– ត្រូវខិតខំប្រឹងប្រែងដឹកនាំកសាងស្រុកឲ្យមានការរីកចម្រើនថ្មីៗបន្ថែមទៀត។
– ត្រូវបង្កើនការពង្រឹងសាមគ្គីភាព ឯកភាពផ្ទៃក្នុងបក្សឲ្យបានកាន់តែរឹងមាំ ដោយឈលើមាគ៌ាមហាជនរបស់គណបក្សទាំងខាងនយោបាយ និងសតិអារម្មណ៍ និងការចាត់តាំងដោយឈរលើគោលការណ៍។
– ត្រូវបន្តការសហការ និងមានទំនាក់ទំនងល្អជាប់ជានិច្ចជាមួយសមាជិក សមាជិកា គណបក្សនៅគ្រប់មូលដ្ឋាន ដើម្បីចូលរួមដោះស្រាយនូវបញ្ហាផ្សេងៗរបស់ប្រជាពលរដ្ឋ ឲ្យបានទាន់ពេលវេលា និងចំគោលដៅ។
– ត្រូវចុះជួបប្រាស្រ័យទាក់ទងជាមួយប្រជាពលរដ្ឋនៅគ្រប់មូលដ្ឋាន ដោយក្តាប់ឲ្យបានច្បាស់លាស់នូវបញ្ហាប្រឈម និងការលំបាករបស់ប្រជាជនទូទៅ និងត្រូវរិះរកគ្រប់មធ្យោបាយ ដើម្បីដោះស្រាយសម្រួលឲ្យបានទាន់ពេលវេលា។
– ត្រូវបន្តការយកចិត្តទុកដាក់ក្នុងការតាមដានឆ្លើយតប ទៅនឹងអំពើទុច្ចរិតទាំងឡាយណា ដែលកើតចេញពីក្រុមប្រឆាំងក្រៅច្បាប់ ក្នុងបណ្តាញសង្គមហ្វេសប៊ុកមកលើថ្នាក់ដឹកនាំ។
– អាជ្ញាធរឃុំនិងកម្លាំងប្រដាប់អាវុធត្រូវបន្តការយកចិត្តទុកដាក់ អនុវត្តន៍គោលនយោបាយ ភូមិឃុំមានសុវត្ថិភាព ឲ្យទទួលបានលទ្ធផលជោគជ័យ និងការការពារសន្តិសុខសណ្តាប់ល្អប្រសើរជូនប្រជាពលរដ្ឋ។
– ត្រូវផ្សព្វផ្សាយដល់ប្រជាពលរដ្ឋឲ្យមានការប្រុងប្រយ័ត្ន ចំពោះគ្រោះថ្នាក់ធម្មជាតិផ្សេងៗ ដូចជា ខ្យល់កន្ត្រាក់ ផ្គររន្ទះជាដើម និងប្រុងប្រយ័ត្នចំពោះក្មេងតូចៗ ជៀសវាងការលង់ទឹកជាដើម៕ ដោយ៖វ៉ៃកូ
