ភ្នំពេញ៖ គណៈបញ្ជាការឯកភាពរាជធានីភ្នំពេញ បានបង្ហាញពីការប្តេជ្ញាយ៉ាងម៉ឺងម៉ាត់បំផុត ក្នុងការទប់ស្កាត់ និងបង្ក្រាបក្រុមឧទ្ទាមក្រៅច្បាប់ ដែលបានប្រកាសប្រឆាំង នឹងរាជរដ្ឋាភិបាលស្របច្បាប់ រួមទាំងធ្វើអ្វីៗដើម្បីចាប់ខ្លួនមេខ្លោងឧទ្ទាមក្រៅច្បាប់ ដែលបានបញ្ជាពីក្រៅប្រទេស ឲ្យបក្ខពួកខ្លួនធ្វើសកម្មភាពប្រមូលផ្តុំទទួលមេរបស់ខ្លួន និងប្រឆាំងរាជរដ្ឋាភិបាលស្របច្បាប់។
ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នាព្រឹកថ្ងៃទី១៨ ខែកញ្ញា ឆ្នាំ២០១៩នេះ លោកឃួង ស្រេង អភិបាល នៃគណៈអភិបាលរាជធានីភ្នំពេញ បានលើកឡើងថា៖ “សម រង្សី បានប្រកាសប្រឆាំងនឹងរាជរដ្ឋាភិបាលស្របច្បាប់តែម្តង។ ចំពោះការឃុបឃិតជាមួយនឹងក្រុមឧទ្ទាមក្រៅច្បាប់ គឺជាអំពើក្បត់ជាតិត្រូវតែបង្ក្រាប។ គោលបំណងនៃការផ្តួលរំលំរាជរដ្ឋាភិបាល គឺគេធ្វើឡើងជាប្រព័ន្ធដែលយើងមិន អាចបន្ធូដៃបានទេ”។
លោកអភិបាលរាជធានីភ្នំពេញ បានថ្លែងថា ជាមួយគ្នានេះ អ្នកប្រកបរបរអាជីវកម្មអ៊ីនធឺណិតកាហ្វេ Online ដោយមានបង្កប់ល្បែងស៊ីសង គឺមានទោសទាំងអ្នកលេង និងម្ចាស់ទីតាំង ដែលអាជ្ញាធរមានសមត្ថកិច្ច ក៏ដូចអាជ្ញាធរដែនដីត្រូវត្រួតពិនិត្យ ឲ្យបានហ្មត់ចត់បំផុត៕ដោយ៖កូឡាប
