ភ្នំពេញ៖ បើតាមផេកហ្វេសប៊ុកផ្លូវការ កាលពីថ្ងៃទី២ ខែតុលា ឆ្នាំ២០១៩ លោកហ៊ុន ម៉ាណែត កូនសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសរសេរថា ការបំភ្លឺរបស់អ្នកស្រី Emily V. Zeerberg អ្នកនាំពាក្យស្ថានទូតអាមេរិក ទាក់ទងនឹងលក្ខខណ្ឌ នៃការផ្តល់សញ្ញាបត្រឲ្យនិស្សិតទាំងអស់ ដែលបញ្ចប់ការសិក្សា នៅគ្រឹះស្ថានឧត្តមសិក្សារបស់សហរដ្ឋអាមេរិក ដែលមិនប្រកាន់ប្រទេសកំណើត ពោលគឺគ្មានការរើសអើង រវាងនិស្សិតអាមេរិក និងនិស្សិតបរទេសទេ។
លោកហ៊ុន ម៉ាណែត បានថ្លែងថា “ខ្ញុំសង្ឃឹមថា លោកនឹងឲ្យតម្លៃដល់ការបំភ្លឺ របស់អ្នកនាំពាក្យរបស់ស្ថានទូតអាមេរិក ដែលចេញការពារតម្លៃ នៃប្រព័ន្ធអប់រំសហរដ្ឋអាមេរិក ជាពិសេសគ្រឹះស្ថានថ្នាក់ឧត្តមសិក្សាល្បីៗ របស់អាមេរិក ហើយសង្ឃឹមថា លោក សម រង្ស៊ី នឹងមិនចាត់ទុកការបកស្រាយ របស់អ្នកនាំពាក្យស្ថានទូតអាមេរិក ជាការបកស្រាយក្លែងក្លាយ ឬជាការបកស្រាយការទូត នោះទេ “។
អ្នកស្រី Emily V. Zeeberg អ្នកនាំពាក្យស្ថានទូតអាមេរិក បានថ្លែងប្រាប់កាសែតក្នុងស្រុកថា អ្នកបញ្ចប់ការសិក្សានៅមហាវិទ្យាល័យ សាកលវិទ្យាល័យ ឬវិទ្យាស្ថានថ្នាក់ឧត្តមសិក្សា នឹងទទួលបានសញ្ញាបត្រ ឬវិញ្ញាបនបត្រ ប្រសិនបើពួកគេបំពេញតាមលក្ខខណ្ឌ នៃគ្រឹះស្ថានសិក្សាទាំងនោះបាន។ ប្រទេសកំណើតរបស់និស្សិត គឺមិនមែនជាបញ្ហាឡើយ។
លោកស្រី បញ្ជាក់បន្ថែថា៖ គ្រឹះស្ថានថ្នាក់ឧត្តមសិក្សារបស់អាមេរិក មានឈ្មោះល្បីរន្ទឺដោយសារតែគុណភាពគ្មានគូប្រៀប ហើយអាចផ្តល់ជំនាញភាសាអង់គ្លេសយ៉ាងល្អឥតខ្ចោះ ដើម្បីត្រៀមសម្រាប់អាជីព នាពេលអនាគត។
លោកហ៊ុន ម៉ាណែត បានបន្តថា ពាក្យថា មិនចាំបាច់ភ្នាល់ គឺមានន័យស្មើនិង មិនហ៊ានភ្នាល់ ។ កាលពីម្សិលមិញ ខ្ញុំបានចោទសួរទៅលោក សម រង្ស៊ី ថាតើលោកហ៊ាន ឬមិនហ៊ានភ្នាល់ជាមួយខ្ញុំ ដើម្បីការពារពាក្យសម្តីដែលលោកបាននិយាយជាសាធារណៈទាក់ទងរឿងសញ្ញាបត្រ West Point របស់ខ្ញុំ។
សូមអរគុណលោក សម រង្ស៊ី ដែលបានផ្តល់ចម្លើយដែលបញ្ជាក់ពី កម្រឹតនៃភាពក្លាហានរបស់លោកក្នុងការការពារពាក្យសម្តីរបស់លោក។
លោក សម រង្សី បានឆ្លើយថា មិនចាំបាច់ភ្នាល់ទេ គឺមានន័យស្មើនឹងលោក សម រង្ស៊ី មិនហ៊ានភ្នាល់ !!! ពោលគឺមិនហ៊ានចេញមុខការពារនូវអ្វីដែលខ្លួនលោកបាននិយាយនោះទេ។
ការនិយាយថា មិនចាំបាច់ភ្នាល់ ឬការព្យាយាមបង្វែរប្រធានបទពីការការពារអំណះអំណាង របស់លោកចេញពីប្រធានបទសញ្ញាបត្រនៅសាលា West Point ទៅជាប្រធានបទផ្សេង អ្នកណាក៏អាចយល់បានថា ជាវិធីសាស្ត្រដកថយដែលសូម្បីតែក្មេងក៏អាចយល់បានដោយងាយដែរ។
ខ្ញុំសុំមិននិយាយទៀតទេ ដោយខ្ញុំមានកិច្ចការច្រើនទៀតដែលត្រូវធ្វើ ដូច្នេះមិនមានពេលកំដរលោក សម រង្ស៊ី ឆ្លើយឆ្លងរឿងអ្វីដែលលោកនិយាយហើយមិនហ៊ានការពារនោះទៀតទេ។ សូមទុកជូនមហាជនលោកវិនិច្ឆ័យចុះ ៕ ដោយ៖បញ្ញាស័ក្តិ
