ភ្នំពេញ ៖ អ្នកនាំពាក្យសាលាដំបូងរាជធានីភ្នំពេញ បានបញ្ជាក់ថា នៅថ្ងៃទី២ខែតុលាឆ្នាំ២០១១៩ ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឲ្យចាប់ខ្លួន ជនត្រូវចោទចំនួន៩រូប រួមទាំងទណ្ឌិត សម រង្ស៊ី និងអតីតមន្ត្រីជាន់ខ្ពស់របស់គណបក្សសង្គ្រោះជាតិចំនួន ៨នាក់។
ក្នុងសេចក្តីប្រកាសព័ត៌មាន នៅរសៀលថ្ងៃទី៣ ខែតុលា ឆ្នាំ២០១៩ នេះបានបញ្ជាក់ថា ជនត្រូវចោទដែលត្រូវបង្គាប់ឲ្យចាប់ខ្លួនរួមមាន៖ ឈ្មោះ សម រង្ស៊ី, ឈ្មោះ អេង ឆៃអ៊ាង, ឈ្មោះ មួរ សុហួរ, ឈ្មោះ អ៊ូ ច័ន្ទឫទ្ធិ, ឈ្មោះ ហូរ វ៉ាន់, ឈ្មោះ ឡុង រី, ឈ្មោះ ម៉ែន សុថាវរិន្ទ្រ, ឈ្មោះ ជូឡុង សូមួរ៉ា (ប្រពន្ធរបស់ ទណ្ឌិត សម រង្ស៊ី) និងឈ្មោះ នុត រំដួល។
ចេញដីកាបង្គាប់ឲ្យចាប់ខ្លួនមនុស្សទាំង ៩នាក់ខាងលើនេះត្រូវបានតំណាងអយ្យការអមសាលាដំបូងរាជធានីភ្នំពេញ បើកការស៊ើបសួរ និងចោទប្រកាន់នៅក្នុងសំណុំរឿងព្រហ្មទណ្ឌលេខ ៦៥៣៦ ចុះថ្ងៃទី១៩ ខែកញ្ញា ឆ្នាំ២០១៩ ពីបទ ឧបឃាត ដោយយោងតាមមាត្រា ២៧ និងមាត្រា ៤៥១ នៃក្រមព្រហ្មទណ្ឌ ពាក់ព័ន្ធនឹងអង្គហេតុ នៃការប៉ុនប៉ងធ្វើរដ្ឋប្រហារ ផ្តួលរំលំរាជរដ្ឋាភិបាលកម្ពុជា ក្រោមឧបាយកលជា ផែនការនៃការវិលប្រឡប់មកកម្ពុជាវិញរបស់ឧក្រិដ្ឋជន សម រង្ស៊ី ដោយបានអំពាវនាវ ប្រើថវិកាប៉ុនប៉ងបង្កើតកងកម្លាំងឧទ្ទាមប្រដាប់អាវុធខុសច្បាប់ ដើម្បីចូលរួមអនុវត្តន៍ផែនការនេះ។
ដើមហេតុដែលនាំឲ្យមានការចោទប្រកាន់លើក្រុមឧក្រិដ្ឋជនទាំង ៩នាក់ខាងលើ បន្ទាប់ពីបពួកគេ បានរៀបចំគម្រោងធ្វើរដ្ឋប្រហារផ្តួលរំលំរដ្ឋាភិបាល ស្របច្បាប់របស់ព្រះរាជាណាចក្រកម្ពុជា នៅក្នុងថ្ងៃទី៩ ខែវិច្ឆកា ឆ្នាំ២០១៩ ដែលទណ្ឌិត សម រង្ស៊ី ប្រកាសវិលចូលកម្ពុជាវិញ៕ ដោយ ៖ កូឡាប
