តាកែវ ៖ ពិតមែនតែព្រះរូបកាយរបស់ព្រះអង្គ បានយាងសោយទិវង្គតទៅហើយ ប៉ុន្តែព្រះកិត្តិនាមរបស់ព្រះអង្គ ស្ថិតនៅក្នុងក្រអៅបេះដូង របស់កូនចៅ ចៅទួត ចៅលួតទាំងអស់គ្នា លោក អ៊ូច ភា អភិបាលខេត្តតាកែវ បានមានប្រសាសន៍ក្នុងពិធីគោរពព្រះវិញ្ញាណក្ខន្ធ ព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ គម្រប់ខួប៧ឆ្នាំថា
គណៈអភិបាលខេត្តរួមជាមួយមន្ត្រីរាជការ គ្រប់លំដាប់ថ្នាក់កងកម្លាំងប្រដាប់អាវុធ ព្រះសង្ឃ ប្រជាពលរដ្ឋ ទូទាំងខេត្តតាកែវ សូមសម្ដែងនូវកតញ្ញូតាធម៌ ចំពោះ ព្រះគុណូបការដ៏ថ្លៃថ្លា វិសេសវិសាលឧត្តុង្គឧត្តម ចំពោះជាតិមាតុភូមិ ដែលក្នុងមួយព្រះជន្មរបស់ព្រះអង្គ បានលះបង់ទាំងព្រះកាយពល និងព្រះបញ្ញាញ្ញាណ ដើម្បីបុព្វហេតុឯករាជ្យជាតិ បូរណភាពទឹកដី ការបង្រួបបង្រួមជាតិ និងការអភិវឌ្ឍសេដ្ឋកិច្ចសង្គម។ ជាពិសេសព្រះរាជវីរសកម្មភាព ដ៏លើសលប់របស់ព្រះអង្គដែលធ្វើឲ្យព្រះរាជាណាចក្រកម្ពុជា ទទួលបានឯករាជ្យបូរណភាពទឹកដី ឯកភាពជាតិ និងកិត្យានុភាពដ៏ល្បីល្បាញលើសកលលោក ។ពិតមែនតែព្រះរូបកាយរបស់ព្រះអង្គ បានយាងសោយទិវង្គតទៅហើយ ប៉ុន្តែព្រះកិត្តិនាមរបស់ព្រះអង្គ ស្ថិតនៅក្នុងក្រអៅបេះដូង របស់កូនចៅ ចៅទួត ចៅលួតទាំងអស់គ្នាជានិច្ច ។
ទទឹមនិងអាជ្ញាធរខេត្តតាកែវបានរៀបចំប្រារព្ធពិធី “គោរពព្រះ វិញ្ញាណក្ខន្ធនិង ថ្វាយព្រះរាជកុសលដ៏ថ្លៃថ្លា ដល់ព្រះករុណាព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាព ទឹកដី និងឯកភាពជាតិខ្មែរ “ព្រះបរមរតនកោដ្ឋ “គម្រប់៧ឆ្នាំ” នៅព្រឹកថ្ងៃ អង្គារ ទី ១៥ ខែ តុលា ឆ្នាំ ២០១៩នេះ នៅវត្តឈើទាលទងត្រា ស្ថិតនៅក្នុងក្រុងដូនកែវ។ ក្រៅពីបានបួងសួងសុំឲ្យព្រះវិញ្ញាណក្ខន្ធសម្ដេចឪ យាងទៅកាន់សុគតិភព និងរំលឹកពីស្នាព្រះហស្ថរបស់ព្រះអង្គ ដែលបានលះបង់ចំពោះប្រជាជននិងប្រទេសជាតិ អភិបាលខេត្តតាកែវ លោក អ៊ូច ភា ក៏បានធ្វើការប្រកាស់ថ្កោលទោសចំពោះជនអគតិទណ្ឌិត សម រង្ស៊ី ដែលបានធ្វើការវាយប្រហារ ចំពោះអង្គព្រះមហាក្សត្រ កាលពីពេលថ្មីៗនេះផងដែរ។
ថ្លែងនៅចំពោះមុខបងប្អូនប្រជាពលរដ្ឋ ដែលបានចូលរួមនៅក្នុងពិធីគោរពព្រះ វិញ្ញាណក្ខន្ធ និងថ្វាយព្រះរាជកុសលដ៏ថ្លៃថ្លា ដល់ព្រះករុណាព្រះបាទសម្ដេចព្រះ នរោត្តម សីហនុ គម្រប់៧ឆ្នាំ លោកអភិបាលខេត្តតាកែវបានថ្លែងថា ក្នុងនាមប្រជាពលរដ្ឋទូទាំងខេត្តតាកែវ មិនអាចទទួលយកបានជាដាច់ខាត នូវការប្រមាថរបស់ទណ្ឌិត សម រង្ស៊ី មកលើអង្គព្រះមហាក្សត្រ ជាទីគោរពសក្ការៈរបស់ប្រជាពលរដ្ឋទូទាំងប្រទេស ហើយដែលអង្គ ព្រះមហាក្សត្រត្រូវបានការពារ ដោយច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា។
លោកអភិបាលខេត្តតាកែវ បានមានប្រសាសន៍បន្តថា ការប្រមាថទៅលើអង្គព្រះមហាក្សត្រពីសំណាក់ទណ្ឌិត សម រង្ស៊ី កំពុងតែធ្វើឲ្យប្រជាពលរដ្ឋទូទាំងខេត្តតាកែវមានការខឹងសម្បា និងប្រកាសប្រឆាំងចំពោះបុគ្គលមានទោសនេះ ជាពិសេសស្នើឲ្យអាជ្ញាធមានសមត្ថកិច្ច ចាត់វិធានការតាមផ្លូវច្បាប់ចាប់យកបុគ្គលនេះ មកធ្វើការផ្ដន្ទាសទោសទៅតាមទង្វើ ដែលគេបានប្រព្រឹត្តប៉ះពាល់ធ្ងន់ធ្ងរ ទៅលើអង្គព្រះមហាក្សត្រ៕ ដោយ៖តាកែវ
