(ភ្នំពេញ)៖ ដើរដល់ផ្លូវទាល់ រាជបុត្រ សូរ្យកាយ្យ ដែលមានឈ្មោះពិតថា លោក ទឹម សុជា បានវាយប្រហារមេរបស់ខ្លួនឯង គឺលោក សម រង្ស៉ី មេចលនាឧទ្ទាមយ៉ាងចាស់ដៃថា ជាអ្នកនយោបាយសន្យាហើយមិនដែលធ្វើ ហើយកំពុងបំផ្លាញទឹកចិត្តអ្នកគាំទ្រ ក្រោយពេលដែលមេដឹកនាំរូបនេះ មិនបានត្រឡប់មកប្រទេសកម្ពុជា តាមការសន្យា ហើយពន្យារពេលដោយមិនកំណត់។ គួរកត់សម្គាល់ថា រាជបុត្រ សូរ្យកាយ្យ ត្រូវសម រង្ស៊ី ដេញចេញពីបក្សប្រឆាំង ដោយសារតែប្រើពាក្យសម្តីអសុរោះជេរប្រមាថប្រមុខរាជរដ្ឋាភិបាលកម្ពុជា ក៏ដូចជាថ្នាក់ដឹកនាំជាន់ខ្ពស់ ផងដែរ។ ប៉ុន្តែទោះយ៉ាងណា រាជបុត្រ សូរ្យកាយ្យ អះអាងថា ខ្លួនជេរតាម លោក សម រង្ស៊ី តែប៉ុណ្ណោះ។
រាជបុត្រ សូរ្យកាយ្យ បានផ្តល់បទសម្ភាសន៍ដល់កាសែត The Cambodia Daily ១ថ្ងៃក្រោយការមិនវិលត្រឡប់របស់ លោក សម រង្ស៉ី ដោយសម្តែងការឆ្អែតចិត្ត ទៅនឹងការសម្តែងឆាកល្ខោនរបស់ លោក សម រង្ស៉ី និងបក្ខពួក អំពីការត្រឡប់មកកម្ពុជា។
លោកអះអាងថា ពេលឮដំណឹងនេះតែងតែគិតថា ដំណឹងនេះជាការពិត ព្រោះដំណឹងនេះមិនមែនចេញពីកូនក្មេងអាយុ៣ឆ្នាំ ក៏មិនមែនឮចេញពីអ្នកគ្មានសញ្ញាបត្របាក់ឌុបដែរ គឺឮចេញពីអ្នកមានសញ្ញាបត្រត្រឹមត្រូវ និងចេញពីមនុស្សចាស់ម្នាក់ដែលជាគម្រូនៃបុគ្គលរាប់លាននាក់ អញ្ចឹងសម្តីនេះ ខ្ញុំមិនអាចចាត់ទុកថាជាសម្តីកូនក្មេង ក៏មិនដែលគិតថា ជាសម្តីរបស់មនុស្សធម្មតា ខ្ញុំទុកថាជាសម្តីវីរៈបុរសក្នុងដួងចិត្តខ្ញុំ ហើយខ្ញុំជឿថា សម្តីនេះកូនខ្មែរទាំងអស់នឹងគិតដូចខ្ញុំ ក៏ប៉ុន្តែឥឡូវគម្រោងនេះត្រូវបានពន្យារពេលដោយសារតែហេតុផលមួយចំនួន ដែលបានលើកឡើងយន្តហោះគាត់ត្រូវបានគេពន្យារ លោក ហ៊ុន សែន បិទមិនឱ្យចូលស្រុកខ្មែរ អញ្ចឹងក្តីសង្ឃឹមនៅតែជាក្តីសង្ឃឹម មិនដែលថ្ងៃណាក្តីសង្ឃឹមនេះបានសម្រេច។
រាជបុត្រ សូរ្យកាយ្យ បានបន្តទៀតថា គាត់នៅមានអ្នកគាំទ្រមួយចំនួនដែលផ្កាប់មុខ បើសិនជាយើងរិះគន់គាត់ គឺអ្នកគាំទ្រគាត់មកជេរយើងហើយថាយើងក្បត់ជាតិថាយើងលក់ក្បាលឱ្យ លោក ហ៊ុន សែន ប៉ុន្តែក្នុងនាមខ្ញុំជាពលរដ្ឋម្នាក់ ជាអ្នកគាំទ្រ(អតីត) គណបក្សសង្គ្រោះជាតិ៦ឆ្នាំហើយ ខ្ញុំមិនចង់បានក្តីសង្ឃឹមក្លែងក្លាយទេ ខ្ញុំចង់បានក្តីសង្ឃឹមពិតប្រាកដ។ ប្រសិនបើខ្ញុំជាលោក សម រង្ស៉ី អ្វីដែលខ្ញុំនិយាយ ខ្ញុំធ្វើប៉ុន្តែបើខ្ញុំចូលស្រុកខ្មែរមិនបាន គឺខ្ញុំមិនសន្យាជាមួយអ្នកគាំទ្រខ្លួនឯងទេ ពីព្រោះអ្នកគាំទ្រមួយចំនួនក៏ដូចជាសកម្មជនគណបក្សសង្គ្រោះជាតិមួយចំនួន កំពុងតែជាប់គុកដោយសារតែសារនយោបាយ២-៣ម៉ាត់របស់គាត់នេះ អញ្ចឹងខ្ញុំចង់ឱ្យ លោក សម រង្ស៉ី ធ្វើអ្វីទៅតាមសម្តីនយោបាយរបស់គាត់ ពីព្រោះគាត់គឺជាគម្រូ វីរៈបុរសរបស់ប្រជាពលរដ្ឋខ្មែររាប់លាននាក់ ប្រសិនបើគាត់និយាយដដែលៗហើយ គាត់មិនអាចធ្វើបានទេ គឺមានន័យថា គាត់កំពុងតែបំផ្លាញទឹកចិត្តដល់អ្នកគាំទ្រខ្លួនឯងបន្តិចម្តងៗ៕ ដោយ៖បញ្ហាស័ក្តិ
