ភ្នំពេញ៖ ស្នងការដ្ឋាននគរបាលទូទាំងរាជធានី ខេត្ត បានប្រកាសព័ត៌មានស្វែងរកចាប់ខ្លួនក្រុមឧក្រិដ្ឋជន ១៨នាក់ ជាមេខ្លោងជាប់ពាក់ព័ន្ធក្នុងការរៀបចំផែនការធ្វើរដ្ឋប្រហារ ផ្ដួលរំលំរាជរដ្ឋាភិបាលស្របច្បាប់នៅកម្ពុជា។
ស្នងការដ្ឋាននគរបាលខេត្តកំពង់ស្ពឺ សូមប្រកាសព័ត៌មានទាក់ទងនឹងការចាប់ខ្លួន/ស្វែងរកចាប់ខ្លួនក្រុមឧក្រិដ្ឋជន ១៨នាក់ ជាមេខ្លោងជាប់ពាក់ព័ន្ធក្នុងផែនការធ្វើរដ្ឋប្រហារផ្ដួលរំលំរាជរដ្ឋាភិបាលស្របច្បាប់នៅកម្ពុជា ដែលដឹកនាំដោយឧក្រិដ្ឋជន សម រង្ស៊ី ដែលកំពុងតែជាប់ក្នុងសំណុំរឿងជាច្រើននៅតុលាការ និងមានសាលក្រមចូលស្ថារព ដែលត្រូវផ្ដន្ទាទោសដាក់ពន្ធនាគារ ប៉ុន្ដែទណ្ឌិតរូបនេះបានគេចខ្លួនរហូត និងបានកំពុងដឹកនាំរៀបចំផែនការធ្វើរដ្ឋប្រហារផ្ដួលរំលំរាជរដ្ឋាភិបាលស្របច្បាប់នៅកម្ពុជា រួមជាមួយ គូកនដែលកំពុងតែរស់នៅជ្រកកោនគេចខ្លួន នៅប្រទេសជិតខាងកម្ពុជា និងបណ្ដាប្រទេសមួយចំនួនទៀត។ ក្រៅពីស្នងការដ្ឋាននគរបាលខេត្តកំពង់ស្ពឺ ក៏មានស្នងការដ្ឋាននគរបាលទូទាំងរាជធានី ខេត្ត នៃព្រះរាជាណាចក្រកម្ពុជា ក៏ប្រកាសចាប់ខ្លួនក្រុមឧក្រិដ្ឋជនទាំង១៨នាក់នោះ ដែលកំពុងរត់គេចខ្លួននៅក្រៅប្រទេស។
ស្នងការដ្ឋាននគរបាលខេត្តកំពង់ស្ពឺ ស្នើសុំឲ្យពលរដ្ឋ ជួយផ្តល់ព័ត៌មានមកកម្លាំងនគរបាលមានសមត្ថកិច្ចដែលនៅជិត ឬមកកាន់ស្នងការដ្ឋាននគរបាលខេត្តកំពង់ស្ពឺ តាមរយៈលេខទូរស័ព្ទ រក្សាការសម្ងាត់បំផុត 071 5111115 / 012 720 777 និងមានការលើកទឹកចិត្ត ចំពោះការផ្តល់ព័ត៌មាន អំពីក្រុមឧក្រិដ្ឋជនចំណោមជនទាំង ១៨នាក់ អំពីទីតាំងឈានដល់ការចាប់ខ្លួន ៕ដោយ៖កូឡាប