ភ្នំពេញ៖ នៅថ្ងៃទី២៦ ខែវិច្ឆិកា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានធ្វើលិខិតឆ្លើយតបទៅប្រធានាធិបតី អាមេរិក ដូណាល់ ត្រាំ ដោយយល់ព្រមឲ្យក្រុមការងារកិច្ចការបរទេស នៃប្រទេសទាំងពីរ ធ្វើកិច្ចការជាមួយគ្នា ដើម្បីស្តារទំនុកចិត្ត និងភាពជឿជាក់ឡើងវិញ និងកសាងឡើងវិញ នូវចំណងមិត្តភាពរវាងប្រទេស និងប្រជាជនយើងទាំងពីរ។
កន្លងទៅថ្មីៗនេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បានផ្ញើលិខិតពីរច្បាប់ជូនសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដើម្បីបញ្ជាក់ជំហររបស់សហរដ្ឋអាមេរិក ដែលចង់បង្កើនទំនាក់ទំនងចំណងមិត្តភាពទ្វេភាគី កាន់តែល្អប្រសើរថែមទៀតជាមួយកម្ពុជា ហើយអ្វីដែលកាន់តែពិសេសទៀត គឺលោកប្រធានាធិបតី បានបញ្ជាក់ក្នុងលិខិតរបស់ខ្លួនថា អាមេរិកគោរពអធិបតេយ្យភាពរបស់កម្ពុជា ហើយមិនគាំទ្រចំពោះការការផ្លាស់ប្តូររបបម្តងណាឡើយ ព្រមទាំងស្នើសុំឲ្យក្រុមការងារកិច្ចការបរទេសនៃប្រទេសទាំងពីរ កម្ពុជា-អាមេរិក ធ្វើកិច្ចការជាមួយគ្នាដើម្បីស្តារចំណងមិត្តភាព រវាងប្រទេសទាំងពីរឡើងវិញ។
លិខិតរបស់លោកប្រធានាធិបតី ដូណាល់ ត្រាំ ត្រូវបានយកប្រគល់ជូនសម្តេចតេជោ ហ៊ុន សែន ដោយផ្ទាល់ដៃ ពីសំណាក់លោក Patrick Murphy អគ្គរដ្ឋទូតសហរដ្ឋអាមេរិកប្រចាំនៅកម្ពុជា នាល្ងាចថ្ងៃទី២១ ខែវិច្ឆិកា ឆ្នាំ២០១៩នេះនាវិមានសន្តិភាព។
បើតាមសារលិខិតរបស់សម្តេចតេជោ នាយករដ្ឋមន្រ្តី បានបញ្ជាក់ថា “ខ្ញុំមានក្តីសោមនស្សរីករាយ ដោយបានទទួលលិខិតចំនួនពីរច្បាប់ផ្សេងគ្នារបស់ឯកឧត្តម ដែលបាន
ផ្ញើមកថ្នាក់ដឹកនាំអាស៊ាន និងរូបខ្ញុំផ្ទាល់ ចុះថ្ងៃទី១ ខែវិច្ឆិកា ឆ្នាំ២០១៩។ ក្នុងនាមជាសមាជិក
សកម្មរបស់អាស៊ាន កម្ពុជាសូមកោតសរសើរចំពោះសារដ៏ច្បាស់លាស់របស់ឯកឧត្តមស្តីពីការប្តេជ្ញាចិត្ត
របស់សហរដ្ឋអាមេរិក ចំពោះភាពជាដៃគូយុទ្ធសាស្ត្រ អាស៊ាន – អាមេរិក និង តួនាទីស្នូលរបស់អាស៊ាន។
ដោយហេតុផលនេះ ខ្ញុំមានបំណងដ៏ជ្រាលជ្រៅក្នុងការជំរុញទំនាក់ទំនងនេះបន្ថែមទៀត និងសូម
ទទួលយកការអញ្ជើញរបស់ ឯកឧត្តម ដើម្បីចូលរួមកិច្ចប្រជុំកំពូលពិសេស អាស៊ាន – អាមេរិក ដែល
នឹងប្រព្រឹត្តទៅនៅត្រីមាសទីមួយ នៃឆ្នាំ២០២០ នៅសហរដ្ឋអាមេរិក។
សម្តេចតេជោ បានថ្លែងបន្តថា អំពីទំនាក់ទំនងរវាងប្រទេសយើងទាំងពីរ ខ្ញុំសូមឯកភាពជាមួយឯកឧត្តមដែលថា ទំនាក់ទំនងរវាង
ប្រទេសទាំងពីរបានឆ្លងកាត់ នូវដំណាក់កាលតឹងតែង និងធូស្រាលជាបន្តបន្ទាប់។ ទោះយ៉ាងណាក៏ដោយ ខ្ញុំយល់ថា យើងមិនត្រូវឱ្យខ្លួនយើងក្លាយជាចំណាប់ខ្មាំង នៃទំព័រខ្មៅងងឹតខ្លះនៃប្រវត្តិសាស្ត្ររបស់យើងនោះទេ ។ មានដំណាក់កាលដ៏ស្រស់បំព្រងជាច្រើនផ្សេងទៀត ដែលមានសារប្រយោជន៍ក្នុងការបំពាក់បំប៉នពូនជ្រុំសម្រាប់ធ្វើឱ្យទំនាក់ទំនងរវាងប្រទេស និងប្រជាជនយើងទាំងពីរ កាន់តែមានការរីកលូតលាស់ថែមទៀត ។ នៅពេលបច្ចុប្បន្ននេះ មួយផ្នែកនៃវិបុលភាពរបស់ប្រជាជនកម្ពុជា គឺពិតជាបានមកពីលទ្ធផលនៃការចូលរួមវិភាគទានរបស់ប្រជាជន និងរដ្ឋាភិបាលសហរដ្ឋអាមេរិក ដោយចាប់ផ្តើមពីការធ្វើប្រជាធិបតេយ្យនូបនីយកម្មដោយសន្តិវិធី ដល់ការកសាងប្រទេសជាតិ អភិបាលកិច្ចសង្គម និងការទទួលបានការចូលទីផ្សារដ៏ទូលំទូលាយ របស់សហរដ្ឋអាមេរិក។ ខ្ញុំសូមថ្លែងអំណរគុណនិងវាយតម្លៃខ្ពស់ចំពោះកាយវិការដ៏សប្បុរសធម៌នេះ។សំខាន់បំផុតខ្ញុំទទួលបាននូវការធានា តាមរយៈការអះអាងដ៏ជាក់លាក់របស់ឯកឧត្តមក្នុងការស្វែងរកការចូលរួមដ៏ពិតប្រាកដមួយ ក្នុងការអនុវត្តលទ្ធិប្រជាធិបតេយ្យ សេរីភាពបុគ្គល និង នីតិរដ្ឋជាជាងការផ្លាស់ប្តូររបប។ ជាប្រទេសមួយដែលមានលទ្ធិប្រជាធិបតេយ្យដ៏ក្មេងខ្ចី ឯកឧត្តមប្រហែលជាអាចទទួលស្គាល់ការតស៊ូរបស់យើងខ្ញុំ ក្នុងការស្វែងរកសន្តិភាពពេញលេញមួយដែលជាលក្ខខណ្ឌមិនអាចខ្វះបាន មុនពេលដែលយើងខ្ញុំអាចកសាងប្រទេសឡើងវិញ ដោយប្រកាន់ខ្ជាប់នូវប្រព័ន្ធប្រជាធិបតេយ្យពហុបក្ស ។ ខ្ញុំសូមថ្លែងអំណរគុណចំពោះការយោគយល់ និងការអត់ធ្មត់របស់ឯកឧត្តមចំពោះបញ្ហាអស់ទាំងនេះ ហើយខ្ញុំមានសេចក្តីរីករាយឲ្យក្រុមការងារកិច្ចការបរទេសរបស់យើងខ្ញុំ ធ្វើការជាមួយក្រុមការងារកិច្ចការបរទេសរបស់ឯកឧត្តម ដើម្បីស្ដារទំនុកចិត្តនិងភាពជឿជាក់ឡើងវិញនឹងកសាងឡើងវិញនូវចំណងមិត្តភាពរវាងប្រទេស និងប្រជាជនយើងទាំងពីរ ដូចដែលឯកឧត្តមបានបញ្ជាក់នៅក្នុងលិខិតរបស់ឯកឧត្តម៕ដោយ៖កូឡាប