ប្រទេសរុស្សីសំដែងការស្វាគមន៏ចំពោះលទ្ធផលនៃកិច្ចប្រជុំកន្លងទៅនេះ រវាងកូរ៉េខាងជើង និងកូរ៉េខាងត្បូង ដោយរំពឹងថា ការវិវឌ្ឍន៏ចុងក្រោយអាចលុបបំបាត់ភាពតានតឹងនៅឧបទ្វីកូរ៉េ។ នេះបើតាមការបញ្ជាក់របស់ក្រសួងការបរទេសរុស្សីនៅក្នុងសេចក្តីប្រកាស។
ក្នុងកំឡុងកិច្ចប្រជុំកាលពីថ្ងៃអង្គារកន្លងទៅនេះ ប្រទេសកូរ៉េខាងជើង បានទទួលយកសំណើរបស់កូរ៉េខាងត្បូង ក្នុងការបង្កើតកិច្ចប្រជុំយោធា ដើម្បីកាត់បន្ថយភាពតានតឹង និងការបញ្ជូនគណៈប្រតិភូកីឡា ទៅចូលរួមកីឡាអូឡាំពិចរដូវរងា ខែក្រោយនៅកូរ៉េខាងត្បូង។
នៅក្នុងសេចក្តីប្រកាស ប្រទេសរុស្សីបានថ្លែងថា “ពួកយើងសូមស្វាគមន៏ចំពោះកិច្ចព្រមព្រៀងដែលបានបង្កើតឡើងនៅកិច្ចប្រជុំកំរិតខ្ពស់ រវាងកូរ៉េខាងជើង និងកូរ៉េខាងត្បូង”។
“ពួកយើងសង្ឃឹមថា ការអនុវត្តកិច្ចព្រមព្រៀងទាំងនោះនឹងអាចជួយលុបបំបាត់ភាពតានតឹងនៅឧបទ្វីបកូរ៉េ និងពង្រឹងស្ថេរភាពនៅក្នុងអនុតំបន់”។
រុស្សីបន្ថែមទៀតថា “ពួកយើងមានជំនឿចិត្តថា កិច្ចចរចារគឺជាវិធីតែមួយគត់ក្នុងការឆ្ពោះទៅរកដំណោះស្រាយដែលអាចទទួលយកបានទៅវិញទៅមក ក្នុងការដោះស្រាយបញ្ហានៅឧបទ្វីបប្រកបដោយឥរិយាបទសន្តិភាព នយោបាយ និងការទូត”៕ សុភ័ក្ត្រ
