ភ្នំពេញ៖ សម្តេចតេជោ ហ៊ុន សែន បានថ្លែងថា ស្ថិតក្នុងស្ថានភាពនៃការបន្តសង្គ្រោះបន្ទាន់ នៃជំងឺម្តាយក្មេកខ្ញុំ ខ្ញុំបន្តលុបចោលការចូលរួមកម្មវិធីមួយចំនួនសម្រាប់ចុងសប្តាហ៍នេះ និងសប្តាហ៍ក្រោយ ដោយប្រគល់ជូនឧបនាយករដ្ឋមន្រ្តីមួយចំនួន ចូលរួមជំនួស ព្រោះកម្មវិធីនេះ មិនអាចលើកពេលរង់ចាំវត្តមានរបស់ខ្ញុំបានឡើយ។
តាមរយៈទំព័រហ្វេសប៊ុកផ្លូវការ នៅថ្ងៃទី២៩វិច្ឆិកា សម្តេតតេជោ បានមានប្រសាសន៍ថា
សប្តាហ៍ក្រោយខ្ញុំត្រៀមទទួលអគ្គរដ្ឋទូតបរទេសពីររូប អភិបាលក្រុងប៉ារីសមួយ
រូបនិងអគ្គលេខាធិការ នៃសមាគមប្រទេសនិយាយភាសាបារាំងមួយរូបប៉ុណ្ណោះ។
សម្តេចតេជោ បានលើកឡើងថា បើទោះជាខ្ញុំមិនបានបង្ហាញមុខជាសាធារណៈ នៅក្នុងការប្រជុំទាំងនៅក្រៅប្រទេស និងកម្មវិធីនានា នៅក្នុងប្រទេសក៏ដោយ ក៏ខ្ញុំនៅតែបន្តដោះស្រាយការងារជាការពិនិត្យសម្រេច និងចុះហត្ថលេខាលើឯកសារនានា ដូចបានធ្វើកន្លងមកមិនមានការអាក់ខានឡើយ បើទោះបីខ្ញុំអត់ងងុយ និងហត់នឿយក្នុងការស្នាក់នៅមន្ទីរពេទ្យក៏ដោយ។
ខ្ញុំនឹងបន្តការតាមដានមើលថែទាំម្តាយក្មេកខ្ញុំតទៅទៀត ព្រោះពុំមានពេលផ្សេងទៀត ដើម្បីបំពេញតួនាទីជាកូនកតញ្ញូនោះឡើយ។
ខ្ញុំសង្ឃឹមថាបងប្អូនជនរួមជាតិ នឹងយោគយល់ដល់ការលំបាករបស់ខ្ញុំ និងយល់ពីអារម្មណ៍របស់ខ្ញុំ នាពេលដ៏លំបាក
នេះ។ ខ្ញុំមិនទុកឱ្យម្តាយក្មេកខ្ញុំចាកចោល ខ្ញុំដោយមិនបានលានោះឡើយ។
សូមអរគុណសម្តេច ឯកឧត្តម លោកជំទាវ ឧបនាយករដ្ឋមន្ត្រីដែលបានធ្វើជាតំណាងខ្ញុំ ចូលរួមក្នុងការប្រជុំទាំងក្នុង និងក្រៅប្រទេស៕ ដោយ៖កូឡាប