កងទ័ពរបស់ប្រទេសមីយ៉ានម៉ា បានទទួលស្គាល់ជាលើកដំបូងថា ទាហ៊ានរបស់ខ្លួនបានចូលរួមក្នុងការសម្លាប់ជនជាតិរ៉ូហ៊ីងយ៉ាកាន់សាសនាអ៊ីស្លាម នៅក្នុងអំពើហឹង្សាកាលពីពេលថ្មីៗនេះ នៅក្នុងរដ្ឋរ៉ាឃីន។ នេះបើតាមការចេញផ្សាយរបស់ BBC នៅថ្ងៃព្រហស្បតិ៍នេះ។
មីយ៉ានម៉ា បាននិយាយថា ការស៊ើបអង្កេតបានរកឃើញថា សមាជិកកងកំលាំងសន្តិសុខរបស់ខ្លួនចំនួន ៤នាក់បានចូលរួមក្នុងការសម្លាប់ មនុស្សចំនួន ១០នាក់នៅក្នុងភូមិ Inn Din ស្ថិតក្បែរក្រុង Maungdaw ក្នុងរដ្ឋរ៉ាឃីន។
របាយការណ៏ស៊ើបអង្កេតនិយាយទៀតថា ទាហ៊ាន ៤នាក់បានជួយក្រុមអ្នកភូមិក្នុងការវាយប្រហារសងសឹកទៅនឹង អ្វីដែលពួកគេហៅថា ភេវរករ បេងហ្គាលី។
ប្រទេសមីយ៉ានម៉ា ត្រូវបានសហគមន៏អន្តរជាតិចោទប្រកាន់ថាបានប្រព្រឹត្តិអំពើបោសសំអាតពូជសាសនៅក្នុងរដ្ឋរ៉ាឃីន។
ចាប់តាំងពីមានអំពើហឹង្សាក្នុងខែសីហា ឆ្នាំមុនមក ជនជាតិរ៉ូហ៊ីងយ៉ាច្រើនជាង ៦៥០.០០០ បានរត់ភៀសខ្លួនទៅកាន់ប្រទេសបង់ក្លាដេស ដោយសារតែរងគ្រោះដោយសារសម្លាប់ ការចាប់រំលោភ និងទារុណកម្ម។
ពួកជនជាតិរ៉ូហ៊ីងយ៉ាទាំងនោះ បានចោទប្រកាន់យោធាមីយ៉ានម៉ា ដែលគាំទ្រដោយហ្វូងអ្នកភូមិកាន់សាសនាព្រះពុទ្ធ ថាបានដុតភូមិរបស់ពួកគេ និងបានវាយប្រហារ និងសម្លាប់ជនស៊ីវិល។
ទោះបីយ៉ាងណាក៏ដោយ យោធាមីយ៉ានម៉ាបានច្រានចោទរាល់ការចោទប្រកាន់ទាំងឡាយ ដែលថាខ្លួនវាយប្រហារជនស៊ីវិល ហើយយោធាមីយ៉ានម៉ាបាននិយាយថា ពួកគេវាយប្រហារតែពួកសកម្មប្រយុទ្ធរ៉ូហ៊ីយ៉ាប៉ុណ្ណោះ៕ សុភ័ក្ត្រ
