ខេត្តព្រៃវែង៖ សម្តេចក្រឡាហោម ស ខេង បានថ្លែងថា បញ្ហាគ្រឿងញៀននិងបញ្ហាចរាចរណ៍ នៅតែជាករណីក្តៅបំផុត ដែលត្រូវរួមគ្នាទប់ស្កាត់និងដោះស្រាយ។
ថ្លែងនៅក្នុងពិធីបុណ្យឆ្លងសមិទ្ធផលនានា នៅវត្តឥន្ទមុនី ស្ថិតក្នុងភូមិព្រៃជ្រាំង ឃុំពានរោង ស្រុកស្វាយអន្ទរ ខេត្តព្រៃវែង នាព្រឹកថ្ងៃសៅរ៍ ទី៧ ខែធ្នូ ឆ្នាំ២០១៩ នេះសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានមានប្រសាសន៍ថា បញ្ហាដែលធ្វើ ឲ្យមានការព្រួយបារម្ភខ្លាំងបំផុតនៅក្នុងសង្គមនាពេលនេះ គឺទីមួយបញ្ហាគ្រឿងញៀន នៅតែរាតត្បាតតាមភូមិឬតំបន់នៅឡើយ បើទោះបីជាសម្ថកិច្ចជំនាញធ្វើការបង្ក្រាបបានជាបន្តបន្ទាប់ ជាលក្ខណៈទ្រង់ទ្រាយធំក៏ដោយ។
សម្តេចក្រឡាហោម បានបន្តថា នៅក្នុងឆ្នាំ២០១៩នេះ សមត្ថកិច្ចបានចាប់ករណីគ្រឿងញៀនទ្រង់ទ្រាយធំបានច្រើនជាបន្តបន្ទាប់ ដែលអាចនិយាយបានថារហូតមកដល់ពេលនេះគឺ ប្រហែលមួយតោនហើយ ប៉ុន្តែករណីធំៗក៏ចាប់បានតែករណីតូចៗនៅតែមានបន្តដោយសារ តែមានការឃុបឃិតនិងលួចលាក់ដែលធ្វើឲ្យយើងនៅមានការព្រួយបារម្ភនោះ។
សម្តេចក្រឡាហោម បានបញ្ជាក់បន្ថែមថា បញ្ហាទី២ គឺជាបញ្ហាគ្រោះថ្នាក់ចរាចរណ៍ ដែលករណីនេះបានធ្វើឲ្យមនុស្សស្លាប់ក្នុងមួយ ថ្ងៃប្រាំនាក់ ហើយការស្លាប់នេះគឺវាសាហាវជាងការធ្វើសង្គ្រាមទៅទៀត ដោយសារតែការមិនគោរនូវច្បាប់ចរាចរណ៍ និងការបើកបរមិនអាធ្យាស្រ័យដល់គ្នានឹងគ្នា។ សម្តេចបានបន្ថែមទៀតថា រហូតដល់ចុងឆ្នាំ២០១៩នេះ មានអ្នកស្លាប់ដោយសារចរាចរណ៍មានចំនួន១៦០០នាក់ហើយ និងរងរបួសរាប់ពាន់អ្នកផ្សេងទៀត។
សម្តេចក្រឡាហោម ស ខេង បានអំពាវនាវដល់ប្រជាពលរដ្ឋ និងសមត្ថកិច្ចរួមទាំងភាគីពាក់ព័ន្ធទាំងអស់ត្រូវរួមគ្នា ទប់ស្កាត់និងដោះស្រាយបញ្ហាទាំងពីរខាងលើនេះ បន្ថែមទៀតដើម្បីភាពរុងរឿងសង្គម និងប្រទេសជាតិទាំងមូលនោះ។
សម្តេចបានបញ្ជាក់ទៀតថា បញ្ហានេះគឺមិនមែនតែភាគីសមត្ថកិច្ចតែមួយអាចដោះស្រាយបាននោះទេ គឺត្រូវមានកិច្ចសហការជាមួយបងប្អូនប្រជាពលរដ្ឋ ដែលជាសាច់ញាតិជាឱពុកម្តាយរបស់កូន ជាតាជាយាយរបស់ចៅចូលរួមអប់រំ និងណែនាំពួកគេផង ទើបអាចទៅរួច ហើយមួយវិញទៀត ត្រូវតែជៀសវាងឲ្យឆ្ងាយពីគ្រឿងញៀន និងត្រូវតែគោរពនូវច្បាប់ចរាចរណ៍ ទើបក្រុមគ្រួសារយើងសង្គមយើងប្រទេសយើងមានភាពសុខសាន្ត និងការរីកចម្រើនខ្លាំងក្លាបន្ថែមទៀត៕ដោយ៖បញ្ញាស័ក្តិ