ភ្នំពេញ ៖ នៅថ្ងៃទី ២៧ ខែ ធ្នូ ឆ្នាំ ២០១៩ នេះ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ពីគណបក្សខ្មែរក្រោក បានចូលរួមពិធីបើកសន្និបាតបូកសរុបការងារ ១៦ ខែ ដំបូង និងលើកទិសដៅការងារសម្រាប់ឆ្នាំ ២០២០ ដែលអង្គសន្និបាតនេះបើកក្រោមអធិបតីភាពដ៏ខ្ពង់ខ្ពស់របស់ សម្ដេចវិបុលសេនាភក្តី សាយឈុំ ប្រធានព្រឹទ្ធសភា និងបិទបញ្ចប់ទៅវិញក្រោមអធិបតីភាពដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោក សុខសុវណ្ណ វឌ្ឍនាសាប៊ុង ហៅ វិល្លាម បានឲ្យដឹងថា សម្ដេចតេជោ បានបញ្ជាក់ថា នៅអាណត្តិក្រោយអាចនឹងមានក្បាលម៉ាស៊ីនឧត្តមក្រុមប្រឹក្សាបន្តទៀត ព្រោះកិច្ចការរបស់ឧត្តមក្រុមប្រឹក្សាកន្លងមក ដែលចុះពិនិត្យភាពអសកម្មក្នុងការអនុវត្តន៍ច្បាប់ ពិនិត្យមើលភាពមិនប្រក្រតី ដែលកើតឡើងពីក្រុមទុច្ចរិត គឺមានប្រយោជន៍ខ្លាំងណាស់សម្រាប់សង្គមជាតិ ក្នុងន័យដដែលសម្ដេចបន្តលើកទឹកចិត្តឲ្យឧត្តមក្រុមប្រឹក្សាពិគ្រោះនិងផ្ដល់យោបល់ បន្តបេសកកម្មរបស់ខ្លួនឲ្យខ្លាំងក្លាបន្ថែមទៀត ដើម្បីចូលរួមចំណែកកសាងសង្គមជាតិ នឹងដោះស្រាយបញ្ហាប្រឈមផ្ទាល់ របស់ពលរដ្ឋឲបានទាន់ហេតុការណ៍ ។
ក្នុងការវាយតម្លៃការងាក្នុងរយៈពេល១៦ខែនេះ ការបំពេញបេសកកម្មរបស់ប្រតិភូបក្សខ្មែរក្រោក លើបញ្ហាជាច្រើនដោយផ្អែកលើពាក្យបណ្ដឹងរបស់ពលរដ្ឋ តម្រុយព័ត៌មានដែលទទួលបានពីគ្រប់ទិសទី ឈានដល់ការចុះបេសកកម្មពិនិត្យជាក់ស្ដែង គ្រប់ច្រកល្ហកលើបញ្ហានានា ទូទាំងប្រទេសរួមមាន បញ្ហាប្រឈមជាក់ស្ដែងរបស់ពលរដ្ឋ ទំនាស់ដីធ្លី ការបំពានអំណាច ការរំលោភបំពាននិងបន្លំលើខ្លឹមសារច្បាប់ ការបំពាននិងមិនអនុវត្ត តាមលិខិតបទដ្ឋានគតិយុត្តរបស់រដ្ឋាភិបាល ការក្លែងបន្លំឯកសារសាធារណៈនឹងប្រើអំណាចក្នុងមុខងារសាធារណៈ ដើម្បីយកសម្បត្តិរដ្ឋ រួមទាំងភាពអសកម្មក្នុងការអនុវត្តច្បាប់ជាដើម។
លើបណ្ដាបាតុភាពទាំងអស់ដែលសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ប្រតិភូគណបក្សខ្មែរក្រោក បានរកឃើញសុទ្ធសឹងមានមូលដ្ឋាន មកពីមន្ត្រីថ្នាក់ជាតិថ្នាក់ក្រោមជាតិ ដែលមានទំនាក់ទំនងគ្នាជាបណ្ដាញបក្ខពួក ប្រព្រឹត្តដោយចេតនាទុច្ចរិត ក្នុងការបំពានច្បាប់និង លិខិតបទដ្ឋានគតិយុត្ត ដោយពុំស្របតាមគោលនយោបាយ របស់រាជរដ្ឋាភិបាលជាហេតុនាំឲ្យបញ្ហាទាំងនោះ ក្លាយជាមហារីករ៉ាំរ៉ៃក្នុងសង្គម នឹងផ្ដល់ផលប៉ះពាល់ដល់ពលរដ្ឋឥតឈប់ឈរ។
ដោយឡែកបញ្ហាខ្លះទៀត ដែលសមាជិកឧត្តមក្រុមប្រឹក្សាប្រតិភូគណបក្សខ្មែរក្រោក បានស្រាវជ្រាវរកឃើញការពិត លើអង្គហេតុអង្គសេចក្ដី និងកសាងរបាយការណ៍ ដោយផ្អែកលើមូលដ្ឋានច្បាប់ដាក់ជូនរដ្ឋាភិបាល ឈានដល់ការទទួលបានចំណារដ៏ខ្ពង់ខ្ពស់ ពីសម្ដេចតេជោ នាំឲ្យទីស្ដីការគណៈរដ្ឋមន្ត្រី ចេញសេចក្ដីជូនដំណឹង ដល់ក្រសួង និងអង្គភាពពាក់ព័ន្ធពិនិត្យដោះស្រាយ ក៏លទ្ធផលនៃការដោះស្រាយនៅតែមាន ភាពអសកម្ម មិនប្រកបដោយ សុច្ចរិតភាពនិងតម្លាភាពដដែល ជាពិសេសក្នុងកិច្ចប្រជុំប្រចាំឆមាស របស់ឧត្តមក្រុមប្រឹក្សាកន្លងមក ទោះសម្ដេចតេជោចង្អុលបង្ហាញ ចំនូវបញ្ហាមួយចំនួនឲ្យសមត្ថកិច្ចនិងសាម៉ីក្រសួង ពិនិត្យបន្ទាន់តបតាមការលើកឡើងរបស់ប្រតិភូបក្សទៀតសោត ក៏ពុំទាន់ទទួលបានលទ្ធផលប្រកបដោយផ្លែផ្កានៅឡើយ។
ចំពោះផែនការទិសដៅការងាររបស់សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ពីគណបក្សខ្មែរក្រោក សម្រាប់ឆ្នាំ២០២០ មាន៥ចំណុច ដូចជា ៖
១. បន្តនឹងព្រីកវិសាលភាពលើភារកិច្ចចុះតាមដានការអនុវត្តច្បាប់ និងប្រសិទ្ធភាពនៃការអនុវត្តច្បាប់របស់មន្ត្រីថ្នាក់ជាតិ និងថ្នាក់ក្រោមជាតិដោយផ្អែកលើខ្លឹមសារព្រះរាជក្រឹត្យ ដើម្បីរៀបចំជារបាយការណ៍ដាក់ជូនប្រមុខរាជរដ្ឋាភិបាល ក្នុងន័យផ្ដល់តម្រុយនៃដំពោះស្រាយ ក្នុងជួយជំរុញកំណែទម្រង់ភាពខ្វះចន្លោះលើគ្រប់វិស័យ។
២. បន្តនឹងពង្រឹងសកម្មភាពចុះពិនិត្យស្រាវជ្រាវរាល់បាតុភាព ដែលជាផលប៉ះពាល់ដល់ ប្រជាពលរដ្ឋគ្រប់និន្នាការ លើបញ្ហានានាទាំងការរំលោភបំពានអំណាច ភាពអសកម្មក្នុងការបម្រើសេវាសាធារណៈ ភាពមិនប្រក្រតីរបស់មន្ត្រីក្នុងប្រព័ន្ធមន្ត្រីរដ្ឋបាល និងមន្ត្រីរាជការសាធារណៈ ជាពិសេសគឺវិស័យយុត្តិធម៌ ជាដើម ។ល។
៣. ខិតខំបន្ថែមលើការប្រមូលលទ្ធផលនឹងទិន្នន័យ នៃបញ្ហាមីក្រូដែលបានស្រាវជ្រាវរកឃើញ យកមកសិក្សាតាមលក្ខណៈវិទ្យាសាស្ត្រ ដើម្បីរកឃើញប្រភពបញ្ហា ឈានដល់ការរៀបចំសេចក្ដីព្រាងច្បាប់ និងសេចក្ដីព្រាងគោលនយោបាយ ដាក់ជូនរាជរដ្ឋាភិបាល ធ្វើការដោះស្រាយឲ្យចំបញ្ហា ដែលកើតមានក្នុងសង្គម។
៤. បន្តសិក្សារកចំណុចខ្វះខាត និងភាពអវិជ្ជមានដើម្បីប្រជុំផ្ដល់យោបល់ ជាធាតុចូលជូនក្រសួង និងសមត្ថកិច្ចពាក់ព័ន្ធលើសេចក្ដីព្រាងច្បាប់ និងព្រាងគោលនយោបាយ របស់សាម៉ីក្រសួងនានា កិច្ចប្រជុំក្រោមក្របខ័ណ្ឌឧត្តមក្រុមប្រឹក្សាពិគ្រោះ និងផ្ដល់យោបល់។
៥. បន្តស្រាវជ្រាវបញ្ហានានា និងសិក្សារកមូលដ្ឋានច្បាស់លាស់នៅភពខ្វះចន្លះ ឈានដល់ការអញ្ជើញបណ្ដាសាម៉ីក្រសួង និងអង្គភាពពាក់ព័ន្ធមកប្រជុំក្រោមក្របខ័ណ្ឌឧត្តមក្រុមប្រឹក្សាពិគ្រោះ និងផ្ដល់យោបល់ ដើម្បីចូលរួមគ្នាដោះស្រាយបញ្ហាដែលប្រឈម។
ឈរលើការលើកឡើងនៃទិសដៅការងារខាងលើ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ប្រតិភូគណបក្សខ្មែរក្រោក នឹងខិតខំឲ្យអស់ពីលទ្ធភាពក្នុង
ការអនុវត្តផែនការនេះ ស្របតាមភារកិច្ចរបស់ខ្លួន ដែលកំណត់ដោយច្បាប់ជាធរមាន ហើយយើងខ្ញុំនឹងប្រើប្រាស់ចក្ខុវិស័យទិសដៅការងារដូចដែលបានលើកឡើងខាងលើនេះ ក្នុងគោលការណ៍ពង្រីកវិសាលភាពការងារ ពង្រឹងគុណភាពការងារ នឹងកែលំអរភាពខ្វះចន្លះលើការងារប្រកប ដោយស្មារតីទទួលខុសត្រូវ ជាវិជ្ជមាន ក្នុងបេសកកម្ម បោសសម្អាតមន្ត្រីខិលខូច នឹងបម្រើប្រជាពលរដ្ឋឲ្យអស់ ពីសមត្ថភាពរបស់ខ្លួនក្នុងនាមជាអ្នកបម្រើប្រជាជន៕ដោយ៖កូឡាប
