ភ្នំពេញ ៖ អតីតមន្ត្រីជាន់ខ្ពស់ក្រសួងការបរទេស និងជាអតីតអគ្គកុងស៊ុល នៃស្ថានអគ្គកុងស៊ុល ព្រះរាជាណាចក្រកម្ពុជា ប្រចាំទីក្រុងគុនមិញ ខេត្តយូណាន ត្រូវបានអង្គភាពប្រឆាំងអំពើពុករលួយ ចាប់ខ្លួនបញ្ជូនទៅតុលាការ ហើយត្រូវតុលាការចេញដីកា ចោទប្រកាន់ ៤ បទល្មើស ហើយករណីបទល្មើសធំបំផុតរបស់ជនត្រូវចោទ គឺមិនប្រកាសទ្រព្យសម្បត្តិ និងបំណុល របស់ឈ្មោះ គ្រុយ លឹមហេង ប្រព្រឹត្តនៅព្រះរាជាណាចក្រកម្ពុជាចាប់តាំងពីឆ្នាំ២០១៥ ដល់២០១៩។
លោក គ្រុយ លឹមហេង អាយុ ៤៥ឆ្នាំ អតីតអគ្គកុងស៊ុល នៃស្ថានអគ្គកុងស៊ុលព្រះរាជាណាចក្រកម្ពុជាប្រចាំទីក្រុងគុនមិញ ខេត្តយូណាន សាធារណរដ្ឋប្រជាមានិតចិន ត្រូវបានអង្គភាពប្រឆាំងអំពើពុករលួយ ចាប់ខ្លួនពីបទពុករលួយ។
មន្ត្រីជាន់ខ្ពស់សាលាដំបូងរាជធានីភ្នំពេញបានប្រាប់បណ្តាញព័ត៌មាននៅល្ងាចថ្ងៃទី២៩ ខែធ្នូ ឆ្នាំ២០១៩នេះថា តុលាការបានចេញដីកាសម្រេចឲ្យឃុំខ្លួនលោក គ្រុយ លឹមហេង ដាក់ពន្ធនាគារហើយ ដោយ ត្រូវបានចោទប្រកាន់ ៤ បទល្មើស រួមមាន៖ ១) ករណីបំផ្លាញដោយចេតនា និងគៃបំបាត់ដោយទុច្ចរិត ២) រំលោភអំណាច ៣) វីតិក្រម ប្រព្រឹត្តដោយឈ្មោះ គ្រុយ លឹមហេង ភេទ ប្រុស អាយុ ៤៥ឆ្នាំ អតីតអគ្គកុងស៊ុល នៃស្ថានអគ្គ កុងស៊ុលព្រះរាជាណាចក្រកម្ពុជាប្រចាំទីក្រុងគុនមិញ ខេត្តយូណាន សាធារណរដ្ឋប្រជាមានិតចិន កាលពីអំឡុងឆ្នាំ២០១៦ ដល់ខែមិថុនា ឆ្នាំ២០១៨ និង៤) ករណីមិនប្រកាសទ្រព្យសម្បត្តិ និងបំណុល របស់ឈ្មោះ គ្រុយ លឹមហេង ប្រព្រឹត្តនៅព្រះរាជាណាចក្រកម្ពុជាចាប់តាំងពីឆ្នាំ២០១៥ ដល់២០១៩ ៕ ដោយ៖បញ្ញាស័ក្តិ
