ភ្នំពេញ៖ លោកសុខសុវណ្ណ វឌ្ឍនា សាប៊ុង ប្រធានគណបក្សខ្មែរក្រោក បានថ្លែងថា នៅថ្ងៃទី ២១ ខែ មករា ឆ្នាំ ២០១៩ នេះមានកិច្ចប្រជុំពិសេសមួយ ដែលប្រតិភូក្រសួងយុត្តិធម៌ បានចូលមកបំភ្លឺនឹងធ្វើបទបង្ហាញនានា តបតាមការ រកឃើញរបស់សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ ពាក់ព័ន្ធនឹងភាពមិនប្រក្រតី នៃការចូលប្រឡងជ្រើសរើសសិស្សចៅក្រម , ប្រឡងផ្ទៃក្នុងជ្រើសរើសចៅក្រមព្រះរាជអាជ្ញា , ភាពកម្សោយ ភពអសកម្មនៃតំណាងអយ្យការ , ភាពអសកម្មនៃតំណាងអយ្យការ , ការចោទមិនត្រឹមត្រូវរបស់តំណាងអយ្យការដោយខ្វះមូលដ្ឋានគតិយុត្ត , កិច្ចប្រជុំនេះប្រព្រឹត្តទៅនាវិមានសន្តិភាពទីស្ដីការនាយករដ្ឋមន្ត្រី។
ប្រធានគណបក្សខ្មែរក្រោក រូបនេះ បានថ្លែងបន្តថា កិច្ចប្រជុំពិសេសនេះ មានខ្លឹមសារនៃការសួរ នឹងចម្លើយខ្លះៗ មានដូចតទៅ ៖
១ ៖ ការរកឃើញរបស់យើងខ្ញុំ ជុំវិញការចូលប្រឡងប្រជែងផ្ទៃក្នុងជ្រើសរើសចៅក្រមព្រះរាជអាជ្ញា ដែលមាន៤បេក្ខជន បានចូលប្រឡងដោយខុសច្បាប់ ស្ដីពីលក្ខន្តិកៈនៃចៅក្រមនិងព្រះរាជអាជ្ញា មាត្រា ២៣ ។ ៖ ករណីនេះ ក្រោយការជជែកដេញដោលយ៉ាងតឹងតែង ដោយដំបូងលោកអះអាងថា ជាគោលការតែពេលខ្ញុំសួរថា គោលការណ៍មិនអាចធំជាងច្បាប់ទេ ច្បាប់បានកំណត់យ៉ាងច្បាស់ ទីបំផុតរដ្ឋមន្ត្រី បានទទួលស្គាល់ថា “ពិតជាមានចន្លោះប្រហោង” ដូចនេះយើងខ្ញុំបានបន្ថែមថា សូមឲ្យមានការពិនិត្យឡើងវិញចំពោះ ការចូលប្រឡងដោយខុសច្បាប់នេះ។
២ ៖ ការរកឃើញឯកសា មិនប្រក្រតីរបស់បេក្ខជន ឈ្មោះ សយ យូសុមនា ដែល ដាក់ពាក្យស្នើសុំប្រឡង ខុសគោលការណ៍កំណត់ថាត្រូវភ្ជាប់បរិញ្ញាបត្រ តែលើពាក្យស្នើសុំប្រឡងគឺនៅថ្ងៃ ទី ២៦ កុម្ភៈ ឆ្នាំ ២០១៩ គ្មានបរិញ្ញាបត្រភ្ជាប់ទៅជាមួយទេ ព្រោះសម័យប្រឡងបរិញ្ញារបស់បេក្ខជន គឺ នៅថ្ងៃ២៩ កក្កដា ឆ្នាំ ២០១៩ ក្រោយការដាក់ពាក្យ។ ៖ ករណីនេះ ដំបូងរដ្ឋមន្ត្រីអះអាងថា ការដាក់ពាក្យរបស់នាង គឺនាងប្រឡងបរិញ្ញារួចហើយតែមិនទាន់មានសញ្ញាបត្រតែមានលិខិតបញ្ជាក់ទេ ខ្ញុំក៏បានដេញដោលបន្ត បញ្ជាក់ថាថា នាងគ្មានអីបញ្ជាក់ទេពេលដាក់ពាក្យ ព្រោះមុនដាក់ពាក្យនាងមិនទាន់បានចូលប្រឡងច្បាប់នៅឡើយនោះទេ ។ ក្រោយការដេញដោល ប្រតិភូក្រសួងលោក កើត រិទ្ធ បានបកស្រាយថា ករណីនេះ រឿង ពាក្យស្នើសុំរបស់ សយ យូសុមនា ជារឿងឯកជន ។
៣ ៖ ស្នើសុំឲ្យបកស្រាយបំភ្លឺ តាមបណ្ដឹងរបស់បេក្ខជនគង់ ប៊ុនរិទ្ធ នឹងក្លាហានបង្ហាញលទ្ធផលប្រឡងលើមុខវិជ្ជានីមួយៗ បើសិនការរៀបចំនោះមានតម្លាភាពនិងសុច្ចរិតមែននោះ។ ៖ ករណីនេះក្រសួងបានអះអាងថា ការប្រឡងគឺត្រឹមត្រូវយុត្តិធម៌ណាស់ ហើយការបង្ហាញលទ្ធផលប្រឡងលើមុខវិជ្ជានីមួយៗ គឺមិនអាចធ្វើបាន ។
៤ ៖ ការឯកភាពគ្នារវាងសមាជិកឧត្តមប្រឹក្សាប្រតិភូគណបក្សខ្មែរក្រោក នឹងក្រសួងយុត្តិធម៌ ក្នុងការអន្តរាគមន៍បន្ទាន់ លើបញ្ហាចំនួន៥ករណី ពាក់ព័ន្ធនឹងការចាប់ខ្លួន ឃុំខ្លួន ពលរដ្ឋក្នុងរឿងដីធ្លី រួមមាន ៖ ៤.១ មិនប្រក្រតីរបស់ ព្រះរាជអាជ្ញានៅខេត្តកំពង់ធំ ចោទពលរដ្ឋដែលគ្រាន់តែប្រើប្រាស់ទឹកសាធារណៈរបស់រដ្ឋ នឹងបញ្ហាចៅក្រមខ្វះមូលដ្ឋាន ចេញដីការរក្សាការពារលើដីរដ្ឋ។ ៤.២ ករណីរឹបអូស បំផ្លាញផ្ទះតម្លៃរាប់ម៉ឺនដុល្លានិងចាប់ដាក់គុក ពលរដ្ឋនៅខេត្តកណ្ដាល គ្រាន់តែរឿងខ្ចីលុយ៥០០០ដុល្លារ។ ៤.៣ ករណីនៅក្រុងព្រះសីហនុដែល ដីចម្ងាយ ៧ គីឡូមែត្រពីគ្នា តែអ្នកមានអំណាចប្ដឹងពលរដ្ឋម្នាក់ដាក់ពន្ធនាគារ នឹងដេញចាប់ភរិយារបស់គេ ដោយអះអាងថាដីជាន់គ្នា (បច្ចុប្បន្នពលរដ្ឋបានចេញក្រៅឃុំហើយ) តែសមាជិកឧត្តមក្រុមប្រឹក្សា នឹងបញ្ជូនឲ្យក្រសួងអន្តរាគមន៍បន្ទាន់ចំពោះការចោទខ្វះមូលដ្ឋានរបស់ព្រះរាជអាជ្ញា ដើម្បីឈានដល់ការពិនិត្យសើររើនឹងទាមទារឲ្យលើកលែងការចោទប្រកាន់។ ៤.៤ករណីភាពមិនប្រក្រតីនៅអយ្យការខេត្តកំពង់ស្ពឺ ជុំវិញការចោទនឹងចាប់ពលរដ្ឋម្នាក់ ដោយខ្វះមូលដ្ឋានច្បាប់។ ៤.៥ ករណីភាពមិនប្រក្រតីរបស់អយ្យការខេត្តបន្ទាយមានជ័យ លើការចាប់ពលរដ្ឋឈ្មោះ ហឹម យឺន ដែលតវ៉ាបញ្ហាដីធ្លី ។
ពាក់ព័ន្ធបញ្ហាពុករលួយក្នុងស្ថាប័នតុលាការ បញ្ហាអសកម្មនានា រដ្ឋមន្ត្រីក្រសួងយុត្តិធម៌បានទទួលស្គាល់ នឹងបង្ហាញឆន្ទៈដោះស្រាយជាបន្តបន្ទាប់៕ដោយ៖កូឡាប
