ភ្នំពេញ៖ កងវិស្វកម្មលេខ៣៩៦ ចេញបំពេញបេសកកម្មរក្សាសន្តិភាពក្រោមឆត្រ អង្គការសហប្រជាជាតិនៅសាធារណរដ្ឋលី បង់ ត្រូវសិក្សាឱ្យបានច្បាស់លាស់ពីសភាពការណ៍ ភូមិសាស្ត្រ នយោបាយ និងការប្រឈមនៃបេសកកម្ម ដោយយកចិត្តទុកដាក់រៀបចំកម្លាំង និងប្រុងប្រយ័ត្នជានិច្ចចំពោះគ្រោះថ្នាក់ផ្សេងៗ ដែលអាចកើតឡើងដោយការប៉ះទង្គិចរវាងក្រុមប្រដាប់អាវុធ ការវាយពួនស្ទាក់ គ្រោះធម្មជាតិ និងជំងឺឆ្លងផ្សេងៗ។
ព្រឹកថ្ងៃទី២៩ ខែមករា ឆ្នាំ២០២០ នៅសាលាហ្វឹកហ្វឺនកងកម្លាំងពហុជាតិ(PKO)ស្ថិតក្នុងស្រុកភ្នំស្រួច ខេត្តកំពង់ស្ពឺ បានដំណើរការប្រារព្ធពិធីជូនដំណើរកងវិស្វកម្មលេខ៣៩៦ ចេញបំពេញបេសកកម្មរក្សាសន្តិភាពក្រោមឆត្រ អង្គការសហប្រជាជាតិនៅសាធារណរដ្ឋលីបង់ ក្រោមអធិបតីភាព លោក ប៉ុល សារឿន ទេសរដ្ឋមន្ត្រី ទទួលបន្ទុកកិច្ចការបញ្ជូនកងកម្លាំងចូលរួមបេសកកម្ម អ .ស .ប តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកនាយឧត្តមសេនីយ៍សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព បានថ្លែងបញ្ជាក់ថា ឆ្នាំនេះជាឆ្នាំទី១០សម្រាប់កងកម្លាំងមួកខៀវកម្ពុជា បំពេញបេសកកម្មនៅសាធារណរដ្ឋលីបង់ ។ កងលេខ៣៩៦ គឺជាកងទី១០ មានចំនួន១៨៤នាក់ ក្នុងនោះនារីចំនួន២៤នាក់ មកពីបណ្តាអង្គភាពចំណុះក្រសួងការពារជាតិ អគ្គបញ្ជាការដ្ឋាន នៃកងយោធពលខេមរភូមិន្ទ និងមជ្ឈមណ្ឌលជាតិ ដែលបានទទួលការហ្វឹកហ្វឺនច្បាស់លាស់ តាមនិយាម អ.ស.ប ដែលត្រូវចូលរួមបំពេញភារកិច្ចឈរជើងក្នុងតំបន់បេសកកម្មនាភាគខាងកើតក្នុងក្រុងម៉ាចាយ័ន (MARJAYOUN) នៃសាធារណរដ្ឋលីបង់ ដែលនឹងទទួលភារកិច្ចបោសសម្អាតមីន ដូចបណ្តាកងមុនៗដែរ ដើម្បីបម្រើឲ្យការសាងសង់ និងជួសជុលបង្គោលព្រំដែនសន្តិភាព(Blue Barrel) សាងសង់និងជួសជុលមន្ទីរពេទ្យ សំណង់ប៉ុស្តិ៍ប៉ម ថ្នល់ របាំងការពារគ្រាប់ និងសំណង់ផ្សេងៗទៀត ជូនដល់កងទ័ពមួកខៀវ មកពីបណ្តាប្រទេសមួយចំនួនប្រចាំនៅតំបន់បេសកកម្ម ស្ថិតនៅតាមព្រំដែនរវាងប្រទេសលីបង់ ស៊ីរី និងអ៊ីស្រាអែល។
លោកប៉ុល សារឿន សូមបញ្ជាក់ថា សន្តិភាព ! យើងទាំងអស់គ្នា សូមគោរពនិងអរគុណដល់សន្តិភាព មានសន្តិភាព ទើបមានការអភិវឌ្ឍ។ ដូច្នេះយើងត្រូវគោរពដឹងគុណចំពោះអគ្គមគ្គុទ្ទេសក៍ស្ថាបនិកសន្តិភាពនៅកម្ពុជាដ៏ឆ្នើមតែមួយគឺ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានអនុវត្ត នយោបាយឈ្នះឈ្នះ ពន្លត់ភ្លើងសង្គ្រាម នាំមកនូវសន្តិភាពពេញលេញជូនជាតិនិងប្រជាជនកម្ពុជា ឱ្យរស់នៅក្នុងភាពសុខដុមរមនា និងរីកចម្រើនជាលំដាប់។ សន្តិភាពជាមូលដ្ឋានគ្រឹះនៃអ្វីៗទាំងអស់។ នេះគឺជាកត្តាសត្យានុម័ត ដែលយើងទាំងអស់គ្នាត្រូវចងចាំទុកក្នុងក្រអៅបេះដូង និងជាសេចក្តីត្រូវការចាំបាច់បំផុតរបស់ប្រជាជនកម្ពុជាទាំងមូល ក៏ដូចជាមនុស្សជាតិលើពិភពលោក។ ហេតុនេះយើងទាំងអស់គ្នា សូមអរគុណដល់សន្តិភាព និងបន្តពួនជ្រុំថែរក្សាសន្តិភាពឱ្យបានស្ថិតស្ថេរគង់វង្ស ដើម្បីបន្តអភិវឌ្ឍន៍ប្រទេសជាតិឱ្យកាន់តែរីកចម្រើនរុងរឿងជានិច្ចនិរន្តរ៍។
លោកក៏បានផ្តាំផ្ញើដល់នាយទាហាន នាយទាហានរង និងពលទាហានទាំងអស់ ដែលត្រូវប្រកាន់យក ៖ អនុវត្តន៍ឱ្យបានខ្ជាប់ខ្ជួននូវអនុសាសន៍ ដែលជាបទបញ្ជា៤ចំណុចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានលើកឡើង ក្នុងពិធីសំណេះសំណាល ជូនដំណើរកងអនុសេនាធំលេខ១៣៥ ចេញបំពេញបេសកកម្មនៅប្រទេសស៊ូដង់ កាលពីថ្ងៃទី១២ ខែមេសា ឆ្នាំ២០០៦។ ឈរជាមជ្ឈមណ្ឌលសាមគ្គីឯកភាព គោរពវិន័យ ច្បាប់ បទបញ្ជា និងរក្សាកិត្តិយសរបស់កងយោធពលខេមរភូមិន្ទ និងប្រទេសជាតិ។ សិក្សាដកពិសោធន៍ រៀនសូត្រភាសាបរទេសបន្ថែម និងអភិវឌ្ឍសមត្ថភាពដើម្បីឆ្លើយតបបេសកកម្មរបស់ខ្លួន សំដៅសម្រេចភារកិច្ច។ សិក្សាឱ្យបានច្បាស់លាស់ពីសភាពការណ៍ ភូមិសាស្ត្រ នយោបាយ និងការប្រឈមនៃបេសកកម្ម ដោយយកចិត្តទុកដាក់រៀបចំកម្លាំង និងប្រុងប្រយ័ត្នជានិច្ចចំពោះគ្រោះថ្នាក់ផ្សេងៗ ដែលអាចកើតឡើងដោយការប៉ះទង្គិចរវាងក្រុមប្រដាប់អាវុធ ការវាយពួនស្ទាក់ គ្រោះធម្មជាតិ និងជំងឺឆ្លងផ្សេងៗ។ គោរពទំនៀមទម្លាប់ ទំនាក់ទំនងល្អជាមួយប្រទេស និងប្រជាជននៅទីតាំង ដែលកងកម្លាំងយើងបំពេញបេសកកម្ម និងជួយឧបត្ថម្ភ ចែករំលែកស្បៀងអាហារ ពិនិត្យព្យាបាលជំងឺ និងការពារប្រជាជននៅទីនោះ។ នេះគឺជាកាយវិការប្រកបដោយគុណធម៌ ស័ក្ដិសមជាកងយោធពលខេមរភូមិន្ទ ដែលកើតចេញពីប្រជាជន ធ្វើអ្វីៗដើម្បីប្រជាជន៕ ដោយ៖កូឡាប
