ខេត្តកំពង់ចាម ៖ ជនរងគ្រោះម្នាក់បានស្លាប់ភ្លាមៗ ក្នុងចំណោម៣នាក់ ត្រូវបានរថយន្តបុកបញ្ជាចង្កូត ដោយមន្ត្រីនគរបាលមួយរូបក្នុងសភាពស្រវឹងស្រាជោកជាំ ។
ហេតុការណ៍នេះបានកើតឡើងនៅក្បែរចំណុចបុកល្ហុងខាងក្រោមស្ពានគីហ្ស៊ូណា ក្រុងកំពង់ចាម កាលពីរសៀលថ្ងៃទី ៣ ខែកុម្ភ: ឆ្នាំ២០២០។
មន្ត្រីនគរបាលចរាចរណ៍ក្រុងកំពង់ចាម បានឲ្យដឹងថា ជនបង្កជាមន្ត្រីពាក់ស័ក្តិបួន ឈ្មោះ អ៊ុក សុបញ្ញា អាយុ៤០ឆ្នាំ មានទីលំនៅភូមិទី៦ សង្កាត់វាលវង់ ក្រុងកំពង់ចាម ត្រូវឃាត់នាំខ្លួនមកកាន់ អធិការនគរបាលក្រុងកំពង់ចាម ចាត់ការតាមច្បាប់ ។
អ្នកឃើញហេតុការណ៍នេះបាននិយាយថា នៅមុនពេលកើតហេតុ រថយន្តបង្កធ្វើ ដំណើរក្នុងសភាពរេចុះរេឡើង បានជ្រុលមកបុកអ្នកជិះម៉ូតូបណ្តាលឱ្យស្លាប់ម្នាក់ និងបន្តបុកអ្នកបើករថយន្តមួយគ្រឿងទៀត នៅក្បែរចំណុចបុកល្ហុងខាងក្រោម ស្ពានគីហ្ស៊ូណាក្រុងកំពង់ចាម ។
តាមការពិនិត្យនិងធ្វើកំណត់ហេតុរបស់ សមត្ថកិច្ចឲ្យដឹងថា សពជនរងគ្រោះ ឈ្មោះ យ៉ន យឿន អាយុ៧៣ឆ្នាំ មានទីលំនៅភូមិរលៀកឃុំអម្ពិល ស្រុកកំពង់សៀម ។ មុនពេលជួបគ្រោះថ្នាក់ ជនរងគ្រោះបើកម៉ូតូម៉ាកវ៉េវអិលហ្វាគ្មានផ្លាកលេខ បានឈប់ហើយដើររើសចុងអំពៅ នៅចំណុចកើតហេតុខាងលើ ស្ថិតក្នុងភូមិទី៣ សង្កាត់វាលវង់ ក្រុងកំពង់ចាម។
យោងតាមកំណត់ហេតុបន្តថា ជនរងគ្រោះទាំង២នាក់ ឈ្មោះ សុគន្ធ យុទ្ធិកាអាយុ១៨ឆ្នាំ នៅភូមិរលៀកដែរ កំពុងបើកបរម៉ូតូម៉ាកZOOMERXពណ៌ក្រហម និងម្នាក់ទៀតឈ្មោះ ឡាច យន់ណែត អាយុ ៣៣ឆ្នាំបើកបររថយន្តម៉ាកនីសាន់ ពណ៌ប្រផេះ ផ្លាកលេខ ភ្នំពេញ 2AQ-1165 មានទីលំនៅភូមិឈូកសណ្តល់ ឃុំរកាពប្រាំ ស្រុកត្បូងឃ្មុំ។ ខូចម៉ូតូចំនួនពីរគ្រឿង និងរថយន្តចំនួន ពីរគ្រឿងកម្រិតស្រាលដូចគ្នា។
ចំណែករថយន្តបង្កហេតុដែលបើកបុកមនុស្សស្លាប់ និងរបួសម៉ាកឡិចស៊ីសRX300 ពណ៌ខ្មៅ ផ្លាកលេខកំពង់ចាម2A7297 បើកបរដោយបុរសឈ្មោះអ៊ុក សុបញ្ញា អាយុ៤០ឆ្នាំ ជាមន្ត្រីនគរបាលពាក់ស័ក្តិ៤ ដែលមានទីលំនៅភូមិទី៦ សង្កាត់វាលវង់ ក្រុងកំពង់ចាម ត្រូវចាប់ខ្លួនបញ្ជូនមក អធិការនគរបាលក្រុងកំពង់ចាម។ ជនសង្ស័យត្រូវបាន គេរកឃើញថា មានជាតិស្រវឹងស្រាកម្រិត០,៨៤មិលី្លក្រាម ក្នុងមួយលីត្រនៃខ្យល់ ។
លោក អ៊ឹង ប៊ុនអធិការក្រុងកំពង់ចាមបាន ប្រាប់អ្នកសារព័ត៌មាន នៅព្រឹកថ្ងៃទី៤ ខែកុម្ភ: ឆ្នាំ២០២០ថា ជុំវិញករណី មន្ត្រីនគរបាលពាក់ស័ក្តិ៤ បើកបររថយន្តបុកមនុស្សស្លាប់ និងរបួសខាងលើនេះ យើងកំពុងកសាងសំណុំរឿង ដើម្បីចាត់ការតាមនីតិវិធី។
បណ្ដាញសង្គម facebook បានលើកឡើងថា ជនបង្កត្រូវបានបងប្អូនចាបថតរូប ដែលត្រូវបានគេស្គាល់ ជាមន្ត្រីសមត្ថកិច្ចនគរបាល ដែលបើកបររថយន្តទាំង ស្ថានភាពស្រវឹងស្រា បុករះបណ្តាលឲ្យមនស្សស្លាប់និងរបួស ខណៈព្យាយាមរត់។
លោកពូស្រវឹងហេតុអ្វីបើកបរ ដឹងថាអាយុជីវិតរបស់មនុស្ស យើងម្នាក់ៗមិនអាចទិញដូរលើទីផ្សារនោះទេ។
ហេតុអ្វីធ្វើឲ្យសមាជិកគ្រួសារគេមានទុក្ខជាខ្លាំង អ្នកណាក៏មិនចង់ឲ្យកើតរឿងនេះឡើងនោះទេ តែវាជាកំហុសបើកស្រវឹងម្តេចមិនដេក មកបើកបររថយន្តបុកគេពេញហ្នឹង ខ្លួនជាមន្រ្តីផងមិនគោរពច្បាប់ខ្លួនឯង ធ្វើឲ្យមន្រ្តីគេល្អៗ ខូចឈ្មោះដោយសារលោកពូ (មន្ត្រីមួយចំនួន)៕ ដោយ ៖ បញ្ញាស័ក្តិ
