អាមេរិច នៅថ្ងៃសុក្រម្សិលមិញនេះ បានផ្តល់ទឹកប្រាក់ចំនួន ១០០លានដុល្លារ ទៅដល់ប្រទេសចិន និងប្រទេសរងប៉ះពាល់ផ្សេងៗទៀត ដើម្បីប្រយុទ្ធប្រឆាំងនឹងវីរុសកូរ៉ូណា ដែលមានការរីករាលដាលយ៉ាងលឿន។
“ការប្តេជ្ញានេះ ជាមួយនឹងទឹកប្រាក់ ១០០លានដុល្លារដែលផ្តល់ដោយវិស័យឯកជនអាមេរិច បង្ហាញពីការដឹកនាំដ៏រឹងមាំរបស់អាមេរិច ក្នុងការឆ្លើយតបទៅនឹងការផ្ទុះវីរុស”។ នេះជាការថ្លែងរបស់រដ្ឋមន្រ្តីការបរទេសអាមេរិចលោក Mike Pompeo នៅក្នុងសេចក្តីប្រកាស។
លោកក៏បានថ្លែងថា អាមេរិចបានបរិច្ឆាគបរិក្ខារពេទ្យជិត ១៧,៨តោនទៅឲ្យចិន រួមមានម៉ាស់ សម្លៀកបំពាក់ពេទ្យ ស្បៃរុំរបួស និងឧបករណ៍ផ្សេងៗ។
ការប្រកាសផ្តល់ប្រាក់ជំនួយនេះកើតឡើង ក្រោយពេលទីក្រុងប៉េកាំង បានចោទប្រកាន់អាមេរិចជុំវិញការឆ្លើយតបទៅនឹងវិបត្តិសុខភាព ដោយប៉េកាំងនិយាយថា ទីក្រុងវ៉ាស៊ីនតោនកំពុងតែចែកចាយភាពភ័យខ្លាច ដោយធ្វើការហាមប្រាមមិនឲ្យជនបរទេសទាំងឡាយណា ដែលធ្លាប់ធ្វើដំណើរទៅចិន ចូលក្នុងប្រទេសរបស់ខ្លួន។
ប៉ុន្តែនៅថ្ងៃសុក្រម្សិលមិញនេះ ប្រធានាធិបតីដូណាល់ ត្រាំ បានកោតសរសើរចំពោះការឆ្លើយតប ដ៏មានជំនាញរបស់ចិន ទៅលើការផ្ទុះវីរុស ក្រោយពេលលោកបាននិយាយគ្នា តាមទូរស័ព្ទជាមួយនឹងមេដឹកនាំចិន ស៊ី ជីនពីង។
សូមបញ្ជាក់ថា រហូតមកដល់ពេលនេះ អ្នកស្លាប់ដោយសារវីរុសកូរ៉ូណា បានកើនឡើងដល់ចំនួន ៧២៤ និងបានចម្លងយ៉ាងតិចទៅកាន់មនុស្សជាង ៣៤.០០០ក្នុងប្រទេសជាង ២០។
វីរុសដែលស្រដៀងទៅនឹងជំងឺផ្តាសាយ បានផ្ទុះឡើងដំបូងកាលពីខែធ្នូ ក្នុងទីក្រុងវូហាន នៃខេត្តហូបេ ប្រទេសចិន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia