ភ្នំពេញ៖ ជនសង្ស័យ២នាក់ក្នុងចំណោមបក្ខពួកជាច្រើននាក់ផ្សេងទៀត ត្រូវបាននគរបាលប៉ុស្តិ៍រដ្ឋបាលផ្សារដេប៉ូទី៣ ខណ្ឌទួលគោក ធ្វើការឃាត់ខ្លួន ខណៈជនសង្ស័យ២នាក់នេះរួមនិង បក្ខពួកជាច្រើននាក់ផ្សេងទៀត ធ្វើសកម្មភាពឆក់កាបូបនារីម្នាក់បានសម្រេច ហើយត្រូវប្រជាពលរដ្ឋដេញចាប់បាន២នាក់នោះ។
ជនសង្ស័យ២នាក់នេះបានឃាត់ខ្លួន កាលពីថ្ងៃអាទិត្យ ១៣រោច ខែបុស្ស ឆ្នាំរកា នព្វស័ក ព.ស២៥៦១ ត្រូវនិងថ្ងៃទី១៤ ខែមករា ឆ្នាំ២០១៨ គ.ស២០១៨ វេលាម៉ោងប្រហែល ២១និង០០នាទី នៅចំណុចមុខផ្ទះលេខ៤២BEo ផ្លូវលេខ២៣៣ កែង១១២ ក្រុមទី១៣ ភូមិ៤ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។ ជនសង្ស័យ១-ឈ្មោះ សុវណ្ណ ដេវីត ហៅ វីត ភេទប្រុស អាយុ១៨ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅផ្ទះជួលពុំចាំលេខ ផ្លូវលេខ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ២-ឈ្មោះ សុខ សំណាង ហៅ ណាង ភេទប្រុស អាយុ១៦ឆ្នាំ ជនជាតិខ្មែរ មុខរបរ សិស្សថ្នាក់ទី១១A2 វិទ្យាល័យឥន្ទ្រទេវី ស្នាក់នៅផ្ទះជួល ផ្លូវហាណូយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ជនរងគ្រោះ ឈ្មោះ វី គន្ធី ភេទស្រី អាយុ២៣ឆ្នាំជនជាតិខ្មែរ មុខរបរ មេផ្ទះ ស្នាក់នៅផ្ទះជួល ផ្លូវ សង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ។ សម្ភារៈបាត់បង់មាន កាបូបស្ពាយមួយពណ៌ខ្មៅ ក្នុងនោះមាន ទូរស័ព្ទមួយគ្រឿងម៉ាក Nokia 1280 ពណ៌ខ្មៅ ចំនួន១គ្រឿង លុយខ្មែរចំនួន៥០.០០០រៀល ។ វត្ថុតាងចាប់យកមាន ម៉ូតូមួយគ្រឿងម៉ាក Honda Beat ស៊េរី2017 ពណ៌ក្រហម-ស ពាក់ស្លាកលេខ ភ្នំពេញ 1GR-9956 មានលេខតួ : 9001881 និងលេខម៉ាស៊ីន: 9002965 (ចាប់យកពីឈ្មោះ សុខ សំណាង ជាម៉ូតូជិះធ្វើសកម្មភាពឆក់ ) ។
មន្ត្រីប៉ូលីសខណ្ឌទួលគោកបានអោយដឹងថា មុនពេលកើតហេតុ ថ្ងៃទី១៤ ខែមករា ឆ្នាំ២០១៨ វេលាម៉ោងប្រហែល ២០និង៥០នាទី ជនរងគ្រោះបានដើរចេញពីផ្ទះសំណាក់សំរិទ្ធឧត្តម តាមបណ្ដោយផ្លូវលេខ២៣៣ ពីត្បូងទៅជើង ក្នុងគោលបំណងទៅទិញអាហារយកមកញ៉ាំ លុះពេលជនរងគ្រោះបានដើរមកដល់ចំណុចមុខផ្ទះលេខ៤២BEo ផ្លូវលេខ២៣៣ កែង១១២ ក្រុមទី១៣ ភូមិ៤ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ស្រាប់តែមានជនសង្ស័យឈ្មោះ សុវណ្ណដេវីត ហៅ ដេវីត និង ឈ្មោះ សុខ សំណាង ហៅ ណាង បានជិះម៉ូតូម៉ាក Honda Beat និងបក្សពួក ចំនួន០៥នាក់ទៀតជិះម៉ូតូចំនួន០៣ គ្រឿងម៉ាក Honda C125 ស៊េរី2018 ពណ៌ខ្មៅ ពីរគ្រឿង និងម៉ូតូម៉ាក Honda C125 ស៊េរី2015 ពណ៌ខ្មៅ ដោយជនសង្ស័យមានគ្នា០២នាក់ជាអ្នក បើកម៉ូតូHondaC125ស៊េរី2018 ពណ៌ខ្មៅ បានធ្វើសកម្មភាពឆក់កាបូបស្ពាយពីជនរងគ្រោះឈ្មោះ វី គន្ធី ហើយបើកម៉ូតូគេចខ្លួន ពេលនោះក៏មានអ្នកជិតខាងបានស្រែកថាចោរៗ ភ្លាម នោះក៏មានប្រជាពលរដ្ឋឈ្មោះ ឃឹម សុខា ភេទប្រុស អាយុ២៦ឆ្នាំ ជនជាតិខ្មែរ កំពុងឈរលេងនៅផ្លូវ ឃើញសកម្មភាព បានរត់ទៅទាញចាប់ជនសង្ស័យឈ្មោះ សុវណ្ណ ដេវីត និងឈ្មោះ សុខ សំណាង ដែលជាអ្នកបិទគូទ យកមកប្រគល់ឲ្យសមត្ថកិច្ចនគរបាលប៉ុស្តិ៍រដ្ឋបាលផ្សារដេប៉ូទី៣ ចាត់ការតាមផ្លូវច្បាប់តែម្ដង ចំណែកបក្ខពួក៥នាក់ជិះម៉ូតូ៣គ្រឿងទៀតយកកាបូបស្ពាយជនរងគ្រោះគេចខ្លួនបាត់ ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរ កសាងសំណុំរឿង និងបញ្ជូនជនសង្ស័យទៅសាលាដំបូងរាជធានីភ្នំពេញ ចាត់ការតាមនីតិវិធីច្បាប់ ៕ ដោយ៖បញ្ញាស័ក្តិ