ភ្នំពេញ៖ មជ្ឈមណ្ឌលសកម្មភាពកម្ចាត់មីនកម្ពុជា នឹងធ្វើការកម្ទេចចោលគ្រាប់បែកដែលរុករកឃើញចំនួន១ គ្រាប់នៅការដ្ឋាន ស្ថិតនៅភូមិសាស្ត្រភូមិកប់ស្រូវសង្កាត់គោករកា ខណ្ឌព្រែកព្នៅនៅរសៀល ថ្ងៃទី១៤ ខែកុម្ភៈ ឆ្នាំ ២០២០ វេលាម៉ោង ១៣និង០០ នាទី ។
មន្ត្រីជាន់ខ្ពស់នៃរដ្ឋបាលរាជធានីភ្នំពេញ បានថ្លែងថា គ្រាប់បែកទម្លាក់ពីលើយន្តហោះ Mark 81 (Mk 81) ដែលមានទម្ងន់ 113kg ប្រហែល 250 ផោន ប្រវែង1,88ម៉ែត្រ និងអង្កត់ផ្ចិត23សង់ទីម៉ែត្រ ដែលគេហៅឈ្មោះក្រៅថាFirecracker ។ គ្រាប់នេះត្រូវបានស្រាវជ្រាវនិងផលិតដោយយោធាសហរដ្ឋអាមេរិកក្នុងអំឡុងឆ្នាំ1950។ វាត្រូវបានប្រើប្រាស់ទម្លាក់ដំបូងបង្អស់មុនគេ នៅក្នុងសង្គ្រាមវៀតណាម និងនៅកម្ពុជា។
ជាមួយគ្នានេះ រដ្ឋបាលរាជធានីភ្នំពេញ បានសូមឲ្យម្ចាស់អាជីវកម្មដ្ឋាន ដែលប្រកបអាជីវកម្មស្ថិតនៅក្នុងភូមិសាស្ត្រតំបន់ខាងលើ ផ្អាកការដ្ឋានរបស់ខ្លួនជាបណ្ដោះអាសន្ន និងសូមបងប្អូនប្រជាពលរដ្ឋដែលរស់នៅជុំវិញតំបន់ខាងលើ កុំមានការភ្ញាក់ផ្អើលនិងសំឡេងកម្ទេចចោលនេះ។
នេះបើយោងតាមសេចក្តីជូនដំណឹង ស្ដីពីការកម្ទេចចោលគ្រាប់បែកនៅភូមិកប់ស្រូវសង្កាត់គោករកា ខណ្ឌព្រែកព្នៅ របស់រដ្ឋបាលរាជធានីភ្នំពេញ ចុះថ្ងៃទី១៣ កុម្ភៈនេះ ដែលក្នុងសេចក្តីជូនដំណឹងនេះមានន័យដើមថា
រដ្ឋបាលរាជធានីភ្នំពេញ មានកិត្តិយសសូមជម្រាបជូនដំណឹងដល់បងប្អូនប្រជាពលរដ្ឋនិងម្ចាស់អាជីវកម្មដ្ឋាននានាដែលប្រកបអាជីវកម្ម ស្ថិតនៅក្នុងភូមិសាស្ត្រតំបន់កប់ស្រូវ ឲ្យបានជ្រាបថា នៅថ្ងៃទី១៤ ខែកុម្ភៈ ឆ្នាំ ២០២០ វេលាម៉ោង ១៣និង០០ នាទី មជ្ឈមណ្ឌលសកម្មភាពកម្ចាត់មីនកម្ពុជា នឹងធ្វើការកម្ទេចចោលគ្រាប់បែកដែលរុករកឃើញចំនួន១ គ្រាប់នៅការដ្ឋានស្ថិតនៅភូមិសាស្ត្រភូមិកប់ស្រូវ សង្កាត់គោករកា ខណ្ឌព្រែកព្នៅ ដែលបានទម្លាក់ដោយយន្តហោះ អឹមខេ 81 ។ ដោយពិនិត្យឃើញគ្រាប់បែកនេះស្ថិតក្នុងស្ថានភាព និងគុណភាពអាចបង្កផ្ទុះ ហើយមិនអាចដោះបន្សាបដើម្បីដឹកជញ្ជូនចល័ត បានមជ្ឈមណ្ឌលសកម្មភាពកម្ចាត់មីនកម្ពុជា និងកម្ទេចចោលនៅនឹងកន្លែងតែម្ដង ។
ដូច្នេះដើម្បីរក្សានូវសន្តិសុខសុវត្ថិភាពនោះ រដ្ឋបាលរាជធានីភ្នំពេញ សូមឲ្យម្ចាស់អាជីវកម្មដ្ឋាន ដែលប្រកបអាជីវកម្មស្ថិតនៅក្នុងភូមិសាស្ត្រតំបន់ខាងលើ ត្រូវផ្អាកការដ្ឋានរបស់ខ្លួនជាបណ្ដោះអាសន្ន ហើយសូមបងប្អូនប្រជាពលរដ្ឋ ដែលរស់នៅជុំវិញតំបន់ខាងលើ កុំមានការភ្ញាក់ផ្អើលនិងសំឡេងកម្ទេចចោលនេះ។
ទទួលបានសេចក្តីជូនដំណឹងនេះ ក្នុងការនគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថ រដ្ឋបាលខណ្ឌព្រែកព្នៅ រដ្ឋបាលខណ្ឌសែន សុខ រដ្ឋបាលខណ្ឌពោធិ៍សែនជ័យ និងអាជ្ញាធរពាក់ព័ន្ធគ្រប់លំដាប់ថ្នាក់ ត្រូវធ្វើការផ្សព្វផ្សាយ ឲ្យបានទូលំទូលាយនិងជ្រួតជ្រាបដល់ប្រជាពលរដ្ឋ៕
លោកហេង រតនា អគ្គនាយកស៊ីម៉ាក់
សូមជំរាបជូនបន្ថែមថា នៅថ្ងៃស្អែកម៉ោង១៣:០០ (ម៉ោង១រសៀល) ថ្ងៃទី១៤ ខែកុម្ភៈ ឆ្នាំ២០២០នេះ កំលាំងជំនាញសុីម៉ាក់នឹងធ្វេីការកំទេចគ្រាប់បែកទម្លាក់ពីយន្តហោះប្រភេទMK81 មួយសំលេង ស្ថិតនៅភូមិសាស្ត្រភូមិទំនប់កប់ស្រូវ សង្កាត់គោករកា ខណ្ឌព្រែកព្នៅ រាជធានីភ្នំពេញ។ សូមថ្លែងអំណរគុណឯ.ឧ អភិបាលនៃគណៈអភិបាលរាជធានីភ្នំពេញ ដែលបានជួយចាត់ចែងនិងសហការយ៉ាងពេញលេញលេីការងារសសន្តិសុខសុវត្ថិភាពប្រជាពលរដ្ឋនិងការកម្ទេចគ្រាប់បែកនេះ៕ ដោយ៖កូឡាប
