ភ្នំពេញ៖ អភិបាលរាជធានីភ្នំពេញលោក ឃួង ស្រេង អមដំណើរដោយអភិបាលរង លោក កើត ឆែ និងលោក មាន ចាន់យ៉ាដា ព្រមទាំងអភិបាលខណ្ឌពោធិ៍សែនជ័យ ព្រមទាំងមន្ដ្រីមួយចំនួនទៀតនារសៀលថ្ងៃទី១៤ កុម្ភៈនេះ បានធ្វើដំណើរទៅកាន់ព្រលានយន្ដហោះអន្ដរជាតិភ្នំពេញ ដើម្បីទទួលស្វាគមន៍ និងជូនដំណើរក្រុមភ្ញៀវទេសចរ ជើងទី២ ចំនួន ១៤១នាក់ ដែលបានជិះនាវា Westerdam មុននឹងបន្តហោះហើរតាមយន្តហោះត្រឡប់ ទៅកាន់ប្រទេសរបស់ពួកគាត់វិញ ។
អភិបាលនៃគណៈអភិបាលរាជធានីភ្នំពេញ លោកឃួង ស្រេង ក្នុងឱកាសអញ្ជើញស្វាគមន៍ដល់ភ្ញៀវទេសចរទាំងនេះ នៅក្នុងព្រលានយន្តហោះអន្តរជាតិភ្នំពេញ បានមានប្រសាសន៍ថា សម្ដេចអគ្គមហាសេនាបតីតេជោហ៊ុន សែន បានអញ្ជើញទៅទទួលស្វាគមន៍ដោយផ្ទាល់ភ្ញៀវបរទេស ចំនួនជាង២០០០នាក់ ដែលជិះលើនាវាចូលចតនៅ ក្រុងព្រះសីហនុ ។ សម្ដេចបានយកចិត្តទុកដាក់ខ្លាំងណាស់ ចំពោះភ្ញៀវអន្តរជាតិ ដែលមកលេងនៅប្រទេសកម្ពុជា។ នេះបញ្ជាក់ឲ្យឃើញថា សម្ដេចតេជោ ហ៊ុន សែន មិនត្រឹមតែយកចិត្តទុកដាក់ ចំពោះតែប្រជាពលរដ្ឋកម្ពុជាប៉ុណ្ណោះទេ តែសម្តេចនូវបានយកចិត្តទុកដាក់ជាមួយនឹងបរទេសថែមទៀត ដែលនេះបង្ហាញពីការគោរពសិទ្ធិមនុស្ស របស់សម្ដេចតេជោ ហ៊ុន សែន ។
លោកបន្តទៀតថា ក្នុងនាមជាមន្ត្រីរាជការក្រោមការដឹកនាំរបស់រាជរដ្ឋាភិបាល ត្រូវតែអនុវត្តទៅតាមការណែនាំ របស់សម្ដេចតេជោហ៊ុន សែន បើទទួលស្វាគមន៍ភ្ញៀវទាំង២០០០នាក់នេះ ក្នុងនាមអាជ្ញាធររាជធានីភ្នំពេញ ក៏ត្រូវតែអនុវត្តនូវអ្វីដែលជាការណែនាំ របស់ប្រមុខរាជរដ្ឋាភិបាលកម្ពុជា ។ ដូច្នេះហើយទើបរដ្ឋបាលរាជធានីភ្នំពេញ នៅរសៀលថ្ងៃនេះ បានមកទទួលស្វាគមន៍ភ្ញៀវទាំងនេះ។ លោកបានបញ្ជាក់ផងដែរថា មកដល់ពេលនេះ មិនទាន់មានប្រជាពលរដ្ឋកម្ពុជាណាម្នាក់ ឆ្លងជំងឺកូរ៉ណាវីរុស នៅឡើយទេ មានតែជនជាតិចិនម្នាក់គត់ ដែលបានឆ្លងជំំងឺរលាកសួតប្រភេទកូរ៉ូណាវីរុសថ្មីនេះ ហើយបច្ចុប្បន្ននេះអ្នកជំងឺជនជាតិចិនម្នាក់នោះក៏បានជាសះស្បើយហើយដែរ ដែលនេះបញ្ជាក់ឲ្យឃើញថា ក្រសួងសុខាភិបាលរបស់កម្ពុជា ក៏មានគ្រូពេទ្យជំនាញៗ មិនចាញ់គ្រូពេទ្យបរទេសនោះដែរ។
សូមបញ្ជាក់ថា ក្រុមភ្ញៀវទេសចរនៅលើនាវា Westerdam ចំនួន១១៩នាក់ ជាក្រុមជើងទី១ បានធ្វើដំណើរតាមយន្ដហោះត្រឡប់ទៅកាន់ប្រទេសរបស់ពួកគេវិញ នៅវេលាថ្ងៃត្រង់ទី១៤ ខែកុម្ភៈ ឆ្នាំ២០២០នេះ ពេលមកដល់ព្រលានយន្តហោះអន្តរជាតិភ្នំពេញ នៅវេលាម៉ោង ៩និង២០នាទីព្រឹកមិញ ហើយនៅរសៀលថ្ងៃដដែលនេះ ក្រុមទី២ ដែលមានជាង ១០០នាក់ផងដែរនោះ ក៏បានធ្វើដំណើរចេញពីខេត្តព្រះសីហនុ និងបន្ដចាកចេញតាមព្រលានយន្ដហោះអន្ដរជាតិភ្នំពេញ ឆ្ពោះទៅកាន់ទឹកដីកំណើតរបស់ពួកគេវិញ។
បើតាមអាជ្ញាធរខេត្តព្រះសីហនុថា នៅថ្ងៃនេះអ្នកដំណើរដែលជិះលើនាវា WESTERDAM ចំនួន៤១៧នាក់ ចាកចេញពីប្រទេសកម្ពុជា តាមជើងយន្តហោះទៅកាន់ប្រទេសរបស់ពួកគេរៀងៗខ្លួន។
អ្នកដំណើរទាំង ៤១៧នាក់នេះ ត្រូវបានចែកចេញជា៣ជើងយន្តហោះ ដែលពីរជើងហោះទៅកាន់ព្រលានយន្តហោះអន្តរជាតិភ្នំពេញ ទើបបន្តហោះទៅកាន់ប្រទេសសង្ហបុរី រួចបន្តតាម ជើងហោះហើរ ទៅកាន់ប្រទេសរបស់ពួកគាត់រៀងៗខ្លួន។ ចំណែកជើងហោះហើរមួយជើងទៀត គឺត្រូវហោះពីព្រលានយន្តហោះអន្តរជាតិខេត្តព្រះសីហនុ ឆ្ពោះទៅកាន់ប្រទេសរបស់ពួកគាត់តែម្តង។
គួរបញ្ជាក់បន្ថែមទៀតថា នាវាទេសចរណ៍ Westerdam ដឹកមនុស្សសរុបជាង ២២០០នាក់ ក្នុងនោះអ្នកដំណើរ១៤៥៥នាក់ និងបុគ្គលិកនាវាចំនួន ៨០២នាក់ បានចាកចេញពីទីក្រុងហុងកុង ប្រទេសចិន កាលពីថ្ងៃទី១ ខែកុម្ភៈ ឆ្នាំ២០២០ ប៉ុន្តែត្រូវបានអាជ្ញាធរ កោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ (អាមេរិក) និងប្រទេសថៃ បដិសេធមិនឲ្យចូលចតឡើយ ដោយសារតែការព្រួយបារម្ភថា ក្នុងចំណោមមនុស្សរាប់ពាន់នាក់នៅលើនោះ អាចមានផ្ទុកវីរុសកូរ៉ូណាថ្មី (Covid-19)។ ប៉ុន្តែនៅទីបំផុត សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអនុញ្ញាតឲ្យនាវាអាមេរិកមួយនេះ ចូលចតកាលពីថ្ងៃទី១៣ ខែកុម្ភៈ ឆ្នាំ២០២០ម្សិលមិញ។
យោងតាមបញ្ជីអ្នកដំណើរបង្ហាញឲ្យឃើញថា នាវាទេសចរណ៍ខ្នាតយក្សនេះផ្ទុកអ្នកទេសចរណ៍ចំនួន ៤១ជាតិសាសន៍ ក្នុងនោះជនជាតិអាមេរិកច្រើនជាងគេ មានចំនួនរហូតដល់៦៥១នាក់ ជនជាតិកាណាដា២៧១នាក់ អង់គ្លេស១២៧នាក់ ជាតិសាសន៍ដទៃជាបន្តបន្ទាប់ ក្នុងនោះមានជនជាតិខ្មែរដែលចូលសញ្ជាតិកាណាដា ចំនួន៥នាក់៕ដោយ៖កូឡាប
