បន្ទាយមានជ័យ៖ អាវុធហត្ថនិងអយ្យកាអមសាលាដំបូងទទួលស្គាល់ថា បទល្មើសគ្រឿងញៀននៅបរវិវេណកាស៊ីណូក្រោនភូមិក្បាលស្ពាន១សង្កាត់/ក្រុងប៉ោយប៉ែត ជាបទល្មើសជួញដូរ ចែកចាយនិងសេពគ្រឿងញៀនធំបង្អស់នៅខេតនតបន្ទាយមានជ័យនាដើមឆ្នាំ២០១៨នេះ ។ ត្រូវកម្លាំងអាវុធហត្ថបង្ក្រាប កាលពីម៉ោង ៤ល្ងាច ថ្ងៃទី ១៣ ខែមករា ឆ្នាំ២០១៨ ហើយថ្ងៃទី១៥មករា នេះ បានកសាងសំណុំរឿងបញ្ជូនទៅតុលការហើយ។
លោកវរសេនីយ៍ នួន នីណារ៉ូមេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឲ្យដឹងថា ៖ ការបង្ក្រាបនេះ ដោយបានទទួលបទបញ្ជាផ្ទាល់ពីលោកឧត្តមសេនីយ៍ត្រី បោនប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងដោយមានការសម្របសម្រួលពីលោកព្រះរាជអាជ្ញាមាស ច័ន្ទពិសិទ្ធិអមសាលាដំបូងខេត្តបន្ទាយមានជ័យ ។
ជាលទ្ធផល កម្លាំងចុះប្រតិបត្តិការបង្ក្រាបអ្នកលក់ ជួញដូរ ចែកចាយនិងប្រើប្រាសគ្រឿងញៀន១សំបុកដ៏ធំ ដោយបង្ក្រាបជនសង្ស័យកំពុងលួចលក់គ្រឿងញៀនដ៏គឃ្លើនបានចំនួន៤នាក់ ១. ឈ្មោះលី គឹមហូវ ភេទប្រុសអាយុ៣៣ឆ្នាំ មុនរបរមិនពិតប្រាកដ។ ២-ឈ្មោះ ប៉ង់ ប្រែង ភេទប្រុសអាយុ៣៨ឆ្នាំ មុខរបរមិនពិតប្រាកដ ។៣-ឈ្មោះ លឹម វិទូ ភេទប្រុសអាយុ១៧ឆ្នាំ គ្មានមុខរបរ ។ នសង្ស័យទាំង៤នាក់រស់នៅក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។៤- ឈ្មោះស៊ុន ម៉ាប់ ភេទប្រុស អាយុ៣៥ឆ្នាំមុខរបរជាងឡាន រស់នៅភូមិ ព្រៃឬស្សី សង្កាត់ព្រះពន្លា ក្រុងសិរីលោភ័ណ ខេត្តបន្ទាយមានជ័យ។ ទាំង៣នាក់ជាអ្នកជួញដូរ ចែកចាយនិងសេពគ្រឿងញៀន។
នៅពេលបញ្ជូនដល់បញ្ជាការដ្ឋានកងរាជអាវុធហត្ថខេត្តបន្ទាយមានជ័យ លោកឧត្តមសេនីយ៍ត្រី បោន ប៊ីន មេបញ្ជាការបានថ្លែងក្នុងសន្និសិទសារព៍ត័មានមួយថា: ក្នុងការបង្ក្រាបនោះ កំលាំងអាវុធហត្ថបានដកហូតវត្ថុតាងច្រើនសន្ធឹករួមមានកញ្ឆាស្ងួតចំនួន៣កញ្ចប់ ទម្ងន់៣.៩៨៥,៥ក្រាម(ឬ៣,៩គក្រ) , គ្រឿងញៀនមេតំហ្វេតាម៉ឺនទឹកកកចំនួន៤ថង់កិប ទម្ងន់២៤១.១ក្រាម ,គ្រឿងញៀនអ៊ិចស្តាស៊ីចំនួន៥៨៤.៥គ្រប់ និង៤កូនថង់កិបស្មើនិងទម្ងន់១៧៣.៣ក្រាម , ជញ្ជីងសម្រាប់ថ្លឹងគ្រឿងញៀន១គ្រឿង ,ដបជក់ស៊ីសាចំនួន១និងដបថ្នាំចំនួន៤ដប ,ឧបករណ៍មូលមូរកញ្ឆាចំនួន២ គ្រាប់កាំភ្លើងខ្លីចំនួន១៣គ្រាប់ សំបកគ្រាប់កាំភ្លើងខ្លីចំនួន១គ្រាប់ ស្រោមកាំភ្លើងចំនួន៤ស្រោម បង់កាំភ្លើងចំនួន១ និងសម្ភារៈមួយចំនួន។
លោកឧត្តមសេនីយ៍បោន ប៊ីន បន្តថា៖ លុះនៅថ្ងៃទី ១៤ ខែមករា ឆ្នាំ ២០១៨ នៅវេលាម៉ោង៦ល្ងាច កំលាំងអាវុធហត្ថក្រុងប៉ោងប៉ែត ដែលលោកបញ្ជាអោយដឹកនាំដោយលោកមេបញ្ជាការរងអហខេត្តនិងលោកមេបញ្ជាារមូលដ្ឋានអហក្រុងប៉ោយប៉ែត បានចុះបង្ក្រាបជនសង្ស័យជាមេខ្លោងធំបានចំនួន២នាក់បន្តទៀតនៅចំណុច បន្ទប់ជួលលេខ៣១៧ ក្នុងបរិវេណកាស៊ីណូផ្កាយប្រាំស្ថិត ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ។
ជនសង្ស័យបន្ថែមជាមេខ្លោងនោះ ១-ឈ្មោះ លី លាងគង់ ភេទប្រុសអាយុ៣៥ឆ្នាំ រស់នៅបន្ទប់ជួលលេខ៣១៧ ។២-ឈ្មោះ វុន សុភាព ភេទស្រីអាយុ២៨ឆ្នាំត្រូវជាប្រពន្ធរបស់លី លាងគង។ បុរសនេះជាមុខសញ្ញាចាស់ ហើយក៏ទើបតែចេញពីពន្ធនាគារផងដែរ។
កំលាំងអាវុធហត្ថបានដកហូតវត្ថតាងបន្ថែមទៀតនៅពេលបង្ក្រាបមេខ្លោងនេះ រួមមាន កញ្ឆាស្ងួត១ថង់ធំទម្ងន់១.៥៣៥,៨ក្រាម (ឬ១,៥គក្រ) គ្រឿងញៀនមេតំហ្វេតាមីុនទឹកកកចំនួន៣ថង់តូច ទម្ងន់៩,៧ក្រាម។ គ្រឿងញៀនអ៊ិចស្តាស៊ីចំនួន១០,៥គ្រាប់និង១ថង់តូច ទម្ងន់៤,៤ក្រាម ,ឧបការណ៍មូរកញ្ឆា ព៌ណលឿងចំនួន១ អាវុធខ្លីចំនួន២ដើម ម៉ាករូឡូ ព៌ណ ស គ្មានគ្រាប់ចំនួន១ដើម និងអាវុធខ្លី ម៉ាកbaretta(បារ៉ែតតា) ពណ៌ខ្មៅតូចចំនួន១ដើម បង់ចំនួន១គាប់កាំភ្លើង៥០គ្រាប់ ។គ្រាប់កាំភ្លើងម៉ាកកាលីឌូចំនួន២៥គ្រប់ រថយន្ត១គ្រឿងម៉ាកលុចសីុននិងសម្ភារៈផ្សេងមួយចំនួនទៀត។
ឱកាសនេះ លោកមេបញ្ជាការបានថ្លែងអំណរគុណដល់នាយឧត្តមសេនីយ៍សៅ សុខា មេបញ្ជាការកងរាជអាវុធហតហថលើផ្ទៃប្រទេសដែលបានដាក់បញ្ជានិងរំលឹកដាស់តឿនជាប្រចាំដល់កងកម្លាំងដែល លើកនេះនៅខេត្តបន្ទាយមានជ័យបានបង្ក្រាបបទល្មើសគ្រឿងញៀនដ៏ធំមួយ។ ពោលគឺតាំងពីលោកឡើងតំណែង៤ខែមកនេះ នេះជាការបង្ក្រាបគ្រឿងធំបង្អស់លើកទី២ហើយនៅក្នុងខេត្ត។
លោកក៏អរគុណដល់កងកម្លាំងអហដែលអនុវត្តប្រតិបត្តិការផ្ទាល់និងអគុណដល់លោកព្រះរាជអាជ្ញានិងគណ:បញ្ជាការកងឯកភាពរដ្ឋបាលខេត្ត ក្រុងដែលសម្របសម្រួល សហការនិងជម្រុញដល់កងកម្លាំងក្នុងការបំពេញការងារ។
ចំណែកលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យដែលចូលរួមត្រួតពិនិត្យលទ្ធផលបង្ក្រាបនេះដែរបានកោតសរសើរ ទទួលស្គាល់ស្នាដៃនិងលើកទឹកចិត្តដល់កងកម្លាំងអហក្រុងប៉ោយប៉ែតនិងខេត្តបន្ទាយមានជ័យដែលមានជំនាញនិងភាពប៉ិនប្រសប់ក្នុងការស៊ើបអង្កេត ហើយឈានដល់ការបង្ក្រាបបានបទល្មើសគ្រឿងញៀនទ្រង់ទ្រាយធំ ៕ ដោយ ៖ បន្ទាយ
