ភ្នំពេញ៖ ដោយប៉ុន្មានថ្ងៃនេះ បងប្អូនប្រជាពលរដ្ឋដែលមានលំនៅដ្ឋាន និងរស់នៅជាយរាជធានីភ្នំពេញ ជួបប្រទះបញ្ហាកង្វះទឹកស្អាតប្រើប្រាស់ប្រចាំថ្ងៃ រដ្ឋបាលរាជធានីភ្នំពេញ បានបើកកិច្ចប្រជុំបន្ទាន់ លើបញ្ហាកង្វះទឹកស្អាតប្រើប្រាស់ក្នុងតំបន់ជាយរាជធានីភ្នំពេញ និងរកដំណោះស្រាយជូនបងប្អូនប្រជាពលរដ្ឋក្នុងរាជធានីភ្នំពេញ នាព្រឹកថ្ងៃសុក្រ ទី១៣ ខែមីនា ឆ្នាំ២០២០នេះ ។
ក្នុងកិច្ចប្រជុំនោះ លោកឃួង ស្រេង អភិបាលរាជធានីភ្នំពេញ បានថ្លែងថា រដ្ឋបាលរាជធានីភ្នំពេញ បានខិតខំប្រឹងប្រែងដោះស្រាយរាល់បញ្ហាជូនបងប្អូនប្រជាពលរដ្ឋក្នុងរាជធានីភ្នំពេញ ដោយប៉ុន្មានថ្ងៃនេះបងប្អូនប្រជាពលរដ្ឋដែលមានលំនៅដ្ឋាន និងរស់នៅជាយរាជធានីភ្នំពេញ ជួបប្រទះបញ្ហាកង្វះទឹកស្អាតប្រើប្រាស់ប្រចាំថ្ងៃ រដ្ឋបាលរាជធានីភ្នំពេញតម្រូវឱ្យរដ្ឋបាលខណ្ឌទាំង១៤ ក្នុងរាជធានីភ្នំពេញ ត្រូវយកចិត្តទុកដាក់ខ្ពស់ក្នុងការចូលរួមដោះស្រាយ និងត្រូវមានរថយន្តដឹកទឹកជូនបងប្អូនប្រជាពលរដ្ឋក្នុងមូលដ្ឋាន ជាពិសេសនៅតំបន់ជាយក្រុង។
លោក ឃួង ស្រេង អភិបាលរាជធានីភ្នំពេញ បានលើកឡើងថា អាជ្ញាធររាជធានី ភ្នំពេញ នឹងប្រើប្រាស់រថយន្តដឹកទឹក ដើម្បីដឹកជូនប្រជាពលរដ្ឋ ជាពិសេសនៅតំបន់ជាយក្រុង បើនៅតែមិនគ្រប់ នឹងប្រើរថយន្តអគ្គិភ័យ ដើម្បីដឹកទឹកបម្រើជូនប្រជាពលរដ្ឋបន្ថែមទៀត។
លោកអភិបាលរាជធានីភ្នំពេញ ក៏បានជំរុញឲ្យអាជ្ញាធរខណ្ឌទាំង១៤ ពិសេសខណ្ឌនៅតាមជាយក្រុង ត្រូវតែផ្ដល់ព័ត៌មានឲ្យបានជ្រាប អំពីបញ្ហាកង្វះទឹកនេះទៅដល់ប្រជាពលរដ្ឋ ម្យ៉ាងទៀតយើងត្រូវរួមគ្នា ដោះស្រាយចំពោះបញ្ហានេះ ដើម្បីផ្គត់ផ្គង់ធ្វើយ៉ាងណាឲ្យប្រជាពលរដ្ឋបានប្រើប្រាស់ និងជំរុញឲ្យការថែរក្សាស្រះទឹក ក្នុងភូមិដើម្បីដោះស្រាយទឹកមួយចំណែកលើ ការលាង ការស្រោច និងការបោកគក់ជាដើម។
លោកស៊ឹម ស៊ីថា អគ្គនាយករដ្ឋាករទឹកស្វយ័តរាជធានីភ្នំពេញ បានឲ្យដឹងថា តម្រូវការប្រើទឹកជាក់ស្តែងរបស់ប្រជាពលរដ្ឋ ក្នុងរាជធានីភ្នំពេញត្រូវការប្រើប្រាស់ច្រើន និងម្យ៉ាងទៀត ដោយសារកម្ពស់ទឹកទន្លេទាប បានធ្វើឲ្យដំណើរការបូមទឹកខ្សោយ ហើយការចែកចាយទឹកជូនទៅប្រជាពលរដ្ឋក៏រឹតតែខ្សោយដែរ ហើយស្ថានភាពផ្គត់ផ្គង់ទឹកស្អាត មិនត្រឹមតែខ្វះនៅពេលនេះទេ គឺបន្តខ្វះឲ្យតែនៅរដូវប្រាំង រហូតដល់ឆ្នាំ២០២២ ។
លោកអគ្គនាយកបានលើកឡើងទៀតថា សព្វថ្ងៃនេះ
រដ្ឋាករទឹកស្វយ័តរាជធានីភ្នំពេញ មានសមត្ថភាពផលិតទឹកស្អាតបានទំហំត្រឹមតែ ជាង៦០ម៉ឺនម៉ែត្រគុបក្នុងមួយថ្ងៃប៉ុណ្ណោះ ខណៈដែលតម្រូវការប្រើប្រាស់ជាក់ស្តែង ជាង៧០ម៉ឺនម៉ែត្រគុបក្នុង១ថ្ងៃ មានន័យថា យើងខ្វះទឹកប្រើប្រាស់ប្រមាណ១០ម៉ឺនម៉ែត្រគុបក្នុង១ថ្ងៃ ដែលបានធ្វើឲ្យទឹកតំបន់ជាយក្រុងមានការខ្វះទឹកប្រើប្រាស់ខ្លាំង។
លោកស៊ឹម ស៊ីថា បានបញ្ជាក់ថា ដើម្បីកាត់បន្ថយនៃកង្វះទឹកប្រើប្រាស់នេះ រដ្ឋាករទឹកស្វយ័តរាជធានីភ្នំពេញនៅក្នុងឆ្នាំ២០១៩នេះ បានចុះហត្ថលេខា ដើម្បីសាងសង់រោងចក្រផលិតទឹកស្អាតមួយ ដែលមានសមត្ថភាពផលិតទឹកបានប្រមាណ៤០ម៉ឺនម៉ែត្រគុបក្នុងមួយថ្ងៃ ដោយប្រើប្រាស់រយៈពេលនៃការសាងសង់ចំនួន៣ឆ្នាំ៩ខែ ហើយក្រោយពីរោងចក្រនេះ ស្ថាបនារួចរាល់នឹងអាចកាត់បន្ថយនៃការខ្វះទឹកនេះបានមួយកម្រិតទៀត។
លោកក៏បានបញ្ជាក់ថា ជុំវិញបញ្ហាខ្វះទឹកនេះមិនមែនការផលិតទឹករបស់យើងថយចុះនោះទេ តែដោយសារតម្រូវការប្រើប្រាស់កាន់តែច្រើន គឺរាជធានីភ្នំពេញមិនត្រឹមតែរីកទទឹងនិងបណ្តោយប៉ុណ្ណោះទេ សូម្បីតែកម្ពស់ក៏បានរីកឡើងខ្ពស់ផងដែរ។ ប៉ុន្តែទោះបីជាយ៉ាងណាក្តីរដ្ឋាករទឹកស្វយ័តរាជធានីភ្នំពេញ គ្រោងនឹងផលិតនូវទឹកឱ្យបានមួយលានម៉ែត្រគុបក្នុងមួយថ្ងៃនៅឆ្នាំ២០២៣ ។
ស្របពេលដែលស្ថានភាពទឹកមានការខ្វះខាតនេះ លោកស៊ឹម ស៊ីថា ក៏បានអំពាវនាវឲ្យបងប្អូនប្រជាពលរដ្ឋសន្សំសំចៃ លើការប្រើប្រាស់ទឹកស្អាតនេះ ដើម្បីឲ្យចរន្តទឹកអាចចែកចាយទៅដល់ប្រជាពលរដ្ឋដែលរស់នៅជាយទីក្រុង បានប្រើប្រាស់ផង ៕ដោយ៖កូឡាប
