ភ្នំពេញ៖ អង្គភាពការពារកុមារ បានផ្តល់ជូននូវរបាយការណ៍ប្រចាំឆ្នាំ២០១៩ ដល់រាជរដ្ឋាភិបាលកម្ពុជា និងក្រសួងមហាផ្ទៃ។ អង្គភាពការពារកុមារ ក្នុងកិច្ចសហប្រតិបត្តិការ ជាមួយនគរបាលជាតិកម្ពុជា បានធ្វើការស៊ើបអង្កេតបទល្មើស ទៅលើកុមារចំនួន២៧៤ករណី ក្នុងឆ្នាំ២០១៩ ដែលក្នុងនោះមានបទល្មើសឃាតកម្ម ទៅលើកុមារចំនួន២៤ករណី នេះបើតាមការផ្សាយរបស់ អង្គការ Child Protection Unit នៅថ្ងៃទី១៣ខែមីនានេះ។
នៅទីស្តីការក្រសួងមហាផ្ទៃ នាព្រឹកថ្ងៃសុក្រ ទី១៣ ខែមីនា ឆ្នាំ២០២០ លោក ប៊ុន ហុន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឱ្យលោក James McCabe នាយកទទួល បន្ទុកប្រតិបត្តិការ របស់អង្គភាពការពារកុមារ CPU ព្រមទាំងសហការី ចូលជួបសម្តែងការគួរសម និងរាយការណ៍អំពីសកម្មភាពការងារប្រចាំ២០១៩ របស់ខ្លួននាពេលកន្លងមក។
អង្គភាពការពារកុមារបានកោតសរសើរយ៉ាងខ្លាំង ទៅដល់ក្រសួងមហាផ្ទៃ ចំពោះការខឹតខំប្រឹងប្រែង និងកិច្ចសហប្រតិបត្តិការ ក្នុងការប្រឆាំងបទល្មើសលើកុមារ។
អង្គភាពការពារកុមារ ក្នុងកិច្ចសហប្រតិបត្តិការ ជាមួយនគរបាលជាតិកម្ពុជា បានធ្វើការស៊ើបអង្កេតបទល្មើស ទៅលើកុមារចំនួន២៧៤ករណីក្នុងឆ្នាំ២០១៩ ដែលក្នុងនោះមានបទល្មើសឃាតកម្ម ទៅលើកុមារចំនួន២៤ករណី។ ជាលទ្ធផលនៃការស៊ើបអង្កេតទាំនេះ អត្រានៃការចាប់ខ្លួនជនល្មើសគឺស្មើ ៨៧% ដែលនេះជាលទ្ធផលយ៉ាងល្អមួយ និងបង្ហាញពីការប្តេជ្ញាចិត្តរបស់នគរបាលជាតិកម្ពុជា និងរាជរដ្ឋាភិបាលកម្ពុជា ក្នុងការប្រឆាំងបទល្មើសទៅលើកុមារ នងធ្វើឲ្យប្រាកដថាគ្រប់ជនដែលបានប្រព្រឹត្តបទល្មើសទាំងនេះ នឹងត្រូវទទួលការផ្តន្ទាទោស។
លោក ប៊ុន ហុន បានវាយតម្លៃចំពោះសកម្មភាពការងារអង្គភាពការពារកុមារ CPU ដែលបានអនុវត្តតាមច្បាប់ស្តីពីសមាគម និងអង្គការមិនមែនរដ្ឋាភិបាល ជាពិសេសកិច្ចសហប្រតិបត្តិការលើការងារប្រយុទ្ធប្រឆាំងការរំលោភបំពានលើកុមារកម្ពុជា និងជំនួយបច្ចេកទេសនានា ដល់កងកម្លាំងនគរបាលជាតិកម្ពុជា។ លោក បានបន្ថែមថា រាជរដ្ឋាភិបាលកម្ពុជា តែងតែចាត់ទុកអង្គការសង្គមស៊ីវិលជាដៃគូអភិវឌ្ឍន៍ដ៏ល្អ សម្រាប់ព្រះរាជាណាចក្រកម្ពុជា ហើយក្នុងនាមក្រសួងមហាផ្ទៃ នៅតែបន្តគាំទ្រសកម្មភាពការងាររបស់អង្គភាពការពារកុមារ CPU។
លោក Jame McCabe បានថ្លែងអំណរគុណដល់ក្រសួងមហាផ្ទៃដែលតែងតែយកចិត្តទុកដាក់ និងផ្តល់កិច្ចសហការយ៉ាងល្អប្រសើរ ដល់សកម្មភាពការងាររបស់អង្គភាពខ្លួន ហើយបានប្រគល់របាយការណ៍ស្តីពីសកម្មភាពការងារឆ្នាំ២០១៩ ជូន លោករដ្ឋលេខាធិការ ។
អង្គភាពការពារកុមារទន្ទឹងរង់ចាំ នឹងបន្តកិច្ចសហការដ៏ល្អមួយនះ ជាមួយនគរបាលជាតិកម្ពុជា និងក្រសួងមហាផ្ទៃ ក្នុងការប្រឆាំងបទល្មើសទៅលើកុមារ ថែមទាំងបទល្មើសលើកុមារ តាមបណ្តាញអ៊ីនធឺណិតផងដែរ នៅក្នុងឆ្នាំ២០២០។ សូមអបអរសាទរដល់គ្រប់បុគ្គល និងស្ថាប័ន្តពាក់ព័ន្ធដែលបានជួយក្នុងការងារដ៏សំខាន់មួយនេះ ដើម្បីប្រឆាំងបទល្មើសទៅលើកុមារ៕ដោយ៖បញ្ញាស័ក្តិ
