ភ្នំពេញ៖ ក្រសួងអប់រំនៅថ្ងៃទី១៦មីនានេះបានសេចក្ដីណែនាំស្ដីពី ការចាប់ផ្ដើមវិស្សមកាលតូច និងការឈប់សម្រាកមុនកាលកំណត់ សម្រាប់គ្រឹះស្ថានសិក្សាគ្រប់កម្រិត គ្រប់ប្រភេទ ទាំងសាធារណៈ និងឯកជននៅទូទាំងប្រទេសក្រសួងអប់រំដែលចេញនៅថ្ងៃនេះ។
លោកហង់ ជួនណារ៉ុន រដ្ឋមន្រ្តីក្រសួងអប់រំយុវជននិងកីឡា បានថ្លែងថា ផ្អែកតាមរបាយការណ៍ស្ថានភាពរាតត្បាតនៃវីរុសកូវីដ១៩ របស់អង្គការសុខភាពពិភពលោក ព្រមទាងការរកឃើញជាបន្តបន្ទាប់ នូវវិជ្ជមាននៃវីរុសកូវីដ១៩ លើជនជាតិខ្មែរនិងជនបរទេស ដែលធ្វើដំណើរចូលមកកម្ពុជា ដែលតម្រូវឲ្យមានវិធានការបង្ការ និងទប់ស្កាត់ជាបន្ទាន់ និងតាមការណែនាំរបស់រាជរដ្ឋាភិបាលកម្ពុជា ក្រសួងអប់រំសូមណែនាំដល់គ្រឹះស្ថានសិក្សាគ្រប់កំរិត គ្រប់ប្រភេទទាំងសាធារណៈ និងឯកជនទូទាំងប្រទេសចាប់ផ្ដើមអនុវត្ត វិស្សមកាលតូចមុនកាលកំណត់ ចាប់ពីថ្ងៃទទួលបានសេចក្តីណែនាំរហូតដល់មានការជូនដំណឹងថ្មី ។
ត្រូវប្រមូលព័ត៌មាននៅរាល់ការធ្វើដំណើរកម្មវិធីទស្សនកិច្ច កម្មសិក្សារបស់គរុសិស្ស គរុនិស្សិត និស្សិត និងបុគ្គលិកអប់រំ ទៅកាន់ប្រទេសដែលមានផ្ទុះករណីជំងឺកូវីដ ក្នុងអំឡុងពេល ១៤ ថ្ងៃមុនថ្ងៃទី ១៦ មីនា ២០២០។ ករណីដែលគរុសិស្ស គរុនិស្សិត និស្សិត និងបុគ្គលិកសិក្សា ដែលមានប្រវត្តិធ្វើដំណើរទៅកាន់ប្រទេស ពេលនេះ ហើយមានការសង្ស័យចំពោះស្ថានភាពសុខភាពផ្ទាល់ខ្លួន ឬមានរោគសញ្ញាស្រដៀងនឹងជំងឺកូវីដ ត្រូវទូរស័ព្ទជាបន្ទាន់ទៅកាន់លេខ 115 ដើម្បីពិគ្រោះយោបល់និងផ្ដល់ព័ត៌មាន មកកាន់ជនបង្គោលរបស់គ្រឹះស្ថានសិក្សា ដើម្បីរាយការណ៍មកក្រសួងអប់រំ។ ចាត់តាំងក្រុមការងារទប់ស្កាត់ការរីករាលដាលនៃជំងឺ នេះដើម្បីតាមដាននិងរាយការណ៍ ហេតុការណ៍ ដែលអាចកើតមានឡើង ចំពោះបុគ្គលិកអប់រំនិងសិស្សានុសិស្ស និងផ្ដល់ព័ត៌មាន ដល់ក្រសួងអប់រំ រៀងរាល់ថ្ងៃតាមប្រព័ន្ធទំនាក់ទំនង ដែលមានស្រាប់ ក្នុងករណីមានការសង្ស័យណាមួយ៕ដោយ៖កូឡាប
